Mamlakatimiz va xorijiy tadbirkorlar, shu jumladan kichik va xususiy biznes korxonalari o‘rtasida barqaror iqtisodiy aloqalarni rivojlantirish hamda chuqurlashtirish, eksport salohiyatini oshirish, respublikaga investitsiyalar va zamonaviy texnologiyalarni jalb etish maqsadida:
1. O‘zbekiston Respublikasi Savdo-sanoat palatasi, Tashqi iqtisodiy aloqalar agentligi, Iqtisodiyot vazirligining xorijiy mamlakatlar, birinchi navbatda Koreya Respublikasi, Xitoy Xalq Respublikasi, Rossiya Federatsiyasi va Germaniya Federativ Respublikasida (Avstriya Respublikasidagi ishlarni qamrab olgan holda) savdo-sanoat palatasi vakolatxonalarini, shu jumladan savdo-investitsiya uylarini tashkil etish to‘g‘risidagi taklifi qabul qilinsin.
2. Belgilansinki, savdo-investitsiya uylari O‘zbekiston Respublikasining va ular qaysi davlat hududida tashkil etilsa o‘sha davlatning qonun hujjatlarida belgilangan tartibda o‘zini-o‘zi qoplash va o‘zini-o‘zi moliyalash prinsiplari asosida faoliyat yuritadi.
3. O‘zbekiston Respublikasi Savdo-sanoat palatasiga savdo-investitsiya uylari orqali quyidagilarni amalga oshirish tavsiya etilsin:
O‘zbekistonning investitsiya imkoniyatlarini rivojlantirish uchun shart-sharoitlar yaratish hamda O‘zbekistondagi xorijiy investorlar va sheriklar uchun axborot-maslahat ishlarini tashkil etish;
O‘zbekiston tadbirkorlariga manfaatli shartlarda yetkazib berish uchun ilg‘or mini-texnologiyalarni tanlab olish;
4. O‘zbekiston Respublikasi Prezidentining “O‘zbekiston Savdo-sanoat palatasini tashkil etish to‘g‘risida” 2004-yil 7-iyuldagi PF-3453-son Farmoni 4-bandining ikkinchi xatboshidagi “O‘zbekiston Respublikasining xorijdagi elchixonalari mutaxassislarini jalb etish orqali” so‘zlari “xorijdagi diplomatiya vakolatxonalarining savdo-iqtisodiy masalalalar bo‘yicha maslahatchilari, ular bo‘lmagan hollarda esa — tegishli mas’ul xodimlarining O‘zbekiston Respublikasi Savdo-sanoat palatasi va uning xorijiy mamlakatlardagi vakolatxonalari bilan to‘g‘ridan to‘g‘rihamkorligini tashkil etishni ta’minlash orqali” degan so‘zlar bilan almashtirilsin.
5. Vazirlar Mahkamasi bir hafta muddatda O‘zbekiston Respublikasining xo‘jalik yurituvchi subyektlari xorijiy mamlakatlarda tashkil etgan savdo uylari, vakolatxonalari, korxonalari orqali, shuningdek O‘zbekiston Respublikasi Savdo-sanoat palatasining chet ellardagi savdo-investitsiya uylari orqali olib keladigan tovarlarni bojxonada rasmiylashtirish tartibi to‘g‘risidagi nizomni tasdiqlasin.
6. Mazkur Farmonning ijrosini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov va O‘zbekiston Respublikasi Bosh vazirining o‘rinbosari E.M. G‘aniyev zimmalariga yuklansin.