O‘zbekiston Respublikasi tashqi siyosatining samarali davom ettirilishini ta’minlash, xorijiy davlatlar bilan o‘zaro manfaatli va ko‘p qirrali hamkorlikni kengaytirish hamda mamlakatimizning xalqaro maydonda nufuzi va obro‘sini yanada oshirish maqsadida:
1. O‘zbekiston Respublikasi Prezidenti Administratsiyasi tuzilmasiga amaldagi shtat birliklari doirasida O‘zbekiston Respublikasi Prezidentining tashqi siyosat masalalari bo‘yicha maxsus vakili (keyingi o‘rinlarda — Maxsus vakil) lavozimi kiritilsin.
O‘zbekiston Respublikasi Prezidentining tashqi siyosat sohasidagi xalqaro va mintaqaviy tashabbuslarining samarali ilgari surilishini ta’minlash;
O‘zbekiston Respublikasi Prezidentiga mamlakat tashqi siyosatining ustuvor yo‘nalishlari va xalqaro hamkorlikni mustahkamlash bo‘yicha aniq takliflar kiritish;
global va mintaqaviy muammolar, tashqi siyosat masalalari bo‘yicha O‘zbekiston Respublikasi pozitsiyasini yetkazish maqsadida xorijiy davlatlar va xalqaro tashkilotlarning rasmiy vakillari bilan doimiy ishchi aloqalarini o‘rnatish;
O‘zbekiston Respublikasi Prezidentining alohida topshiriqlariga asosan tashqi siyosat va xalqaro hamkorlikning dolzarb masalalari bo‘yicha maxsus missiyalarni bajarish;
O‘zbekiston Respublikasi Prezidenti ishtirokida o‘tkaziladigan xalqaro tadbirlar va uchrashuvlarni tayyorlashda ko‘maklashish.
Maxsus vakil O‘zbekiston Respublikasi Prezidenti tomonidan lavozimga tayinlanadi va lavozimdan ozod qilinadi;
Maxsus vakil maqomi, mehnatga haq to‘lash, tibbiy va transport xizmati ko‘rsatish shart-sharoitlari bo‘yicha O‘zbekiston Respublikasi Prezidenti maslahatchisi o‘rinbosariga tenglashtiriladi.
4. Oliy Majlis palatalari, Vazirlar Mahkamasi, Tashqi ishlar vazirligi hamda Investitsiyalar va tashqi savdo vazirligiga Maxsus vakilning faoliyati samarali amalga oshirilishida har tomonlama ko‘maklashish vazifasi yuklatilsin.
5. O‘zbekiston Respublikasi Prezidenti Administratsiyasi rahbari ikki hafta muddatda O‘zbekiston Respublikasi Prezidenti Administratsiyasining shtatlar jadvaliga tegishli o‘zgartirishlar kiritsin.
6. Adliya vazirligi bir oy muddatda qonunchilik hujjatlariga mazkur Farmondan kelib chiqadigan o‘zgartirish va qo‘shimchalar to‘g‘risida takliflar kiritsin.
7. Mazkur Farmonning ijrosini nazorat qilish O‘zbekiston Respublikasi Prezidenti Administratsiyasi rahbari Z.Sh. Nizomiddinov zimmasiga yuklansin.