Toshkent shahrida barpo etilayotgan yer usti metro liniyalari ostida joylashgan yer maydonlaridan samarali foydalanish, bunda yer usti metro liniyasiga yaqin hududda istiqomat qilayotgan aholiga qulay sharoitlarga ega bo‘lgan dam olish va sog‘lomlashtirish zonalarini barpo etish hamda xizmat ko‘rsatish va servis sohasida qo‘shimcha yangi ish o‘rinlari yaratish maqsadida Vazirlar Mahkamasi qaror qiladi:
1. O‘zbekiston Respublikasi Prezidentining “Toshkent shahrida yer usti halqa metro liniyalarining qurilishi” loyihasini amalga oshirish chora-tadbirlari to‘g‘risida” 2017-yil 19-maydagi PQ-2979-son qarori doirasida:
uzunligi 11,2 kilometr bo‘lgan “Do‘stlik-Qo‘yliq” va 6,9 kilometr bo‘lgan “Sergeli-Olmazor” yo‘nalishlari bo‘yicha yer usti metro liniyasi barpo etilganligi va foydalanishga topshirilganligi;
uzunligi 8,5 kilometr bo‘lgan “Qo‘yliq — Quruvchilar” yo‘nalishida hozirda qurilish-montaj ishlari olib borilayotganligi;
er usti metro liniyasining konsepsiyasiga asosan 2023 — 2025-yillarda bosqichma-bosqich metroning keyingi yo‘nalishlarida qurilish ishlari amalga oshirilishi rejalashtirilganligi ma’lumot uchun qabul qilinsin.
2. Toshkent shahar hokimligi va Transport vazirligining Ohangaron shoh ko‘chasida joylashgan Toshkent metropolitenining “Do‘stlik-Qo‘yliq” yer usti metro yo‘nalishi 1 — 5 bekatlari oralig‘idagi yer maydonlaridan samarali foydalanish maqsadida piyodalar va velosiped yo‘laklari, avtoturargohlar, aholi sayr qilishi uchun sayilgohlar, bolalar va sport maydonchalarini tashkil etish hamda hududni obodonlashtirish va ko‘kalamzorlashtirish to‘g‘risidagi takliflariga rozilik berilsin.
Toshkent metropolitenining yer usti metro yo‘nalishlari ostida joylashgan Transport vazirligi huzuridagi “Toshkent metropoliteni” DUKga doimiy foydalanish huquqi bilan ajratilgan yer maydonlari xatlovdan o‘tkazilgan holda ularning yer usti metro yo‘nalishlari faoliyatiga ta’sir qilmaydigan qismi (metro ustunlari va ustunning ikki metr radiusidan tashqari qismi) Toshkent shahar hokimligi zaxirasiga o‘tkaziladi;
Toshkent shahar hokimligi zaxirasiga olingan yer maydonlari shahar arxitektura qiyofasini saqlagan holda fudtrak hamda yengil turdagi qurilmalarni qurish va joylashtirish uchun “E-Auksion” elektron savdo platformasi (keyingi o‘rinlarda — auksion savdolari) orqali 5 yil muddatga ijara huquqi bilan, istisno tariqasida, 12 oyda teng ulushlarda bo‘lib to‘lash sharti bilan savdoga chiqariladi;
auksion savdolari orqali olingan yer uchastkalarida savdo va xizmat ko‘rsatish, tayyor holdagi ovqatlanish mahsulotlari bilan savdo qilish shoxobchalari, kitob do‘konlari, shuningdek, avtoturargohlar hamda madaniy hordiq chiqarish va sport maskanlarini (keyingi o‘rinlarda — tadbirkorlik va ijtimoiy loyihalar) barpo etishga ruxsat beriladi.
4. Transport vazirligi Davlat soliq qo‘mitasi huzuridagi Kadastr agentligi bilan birgalikda bir oy muddatda “Toshkent metropoliteni” DUKga doimiy foydalanish huquqi bilan ajratilgan yer maydonlarining yer usti metro yo‘nalishi faoliyatiga ta’sir qilmaydigan qismini to‘liq xatlovdan o‘tkazsin hamda xatlov natijalari bo‘yicha aniqlangan yer maydonlarini belgilangan tartibda Toshkent shahar hokimligi zaxirasiga topshirsin.
5. Transport vazirligi Qurilish vazirligi, Favqulodda vaziyatlar vazirligi, Toshkent shahar hokimligi va Transport vazirligi huzuridagi “Toshkent metropoliteni” DUK birgalikda ikki oy muddatda:
tadbirkorlik va ijtimoiy loyihalarni joylashtirish va muvofiqlashtirish, bunda yer usti metro yo‘nalishlari tayanch ustunlari va metro yo‘liga zarar yetkazmaslik, yerto‘la qismini qurmaslik hamda metro tayanch ustunlari himoya hududini muhofaza qilish talablarini;
er usti metro yo‘nalishlari ostida joylashgan yer uchastkalarida ruxsat berilmaydigan faoliyat turlari ro‘yxatini tasdiqlasin.
6. Toshkent shahar hokimligi va Qurilish vazirligi bir oy muddatda Toshkent metropolitenining “Do‘stlik-Qo‘ylik” yer usti metro yo‘nalishi 1 — 5 bekatlari oralig‘idagi yer maydonlarida tadbirkorlik va ijtimoiy loyihalarni amalga oshirish konsepsiyasini tasdiqlasin hamda qurilish-montaj ishlari shaharsozlik normalari va qoidalariga rioya qilingan holda bajarilishini qat’iy nazoratga olsin.
7. Mazkur qarorning ijrosini nazorat qilish O‘zbekiston Respublikasi Bosh vazirining birinchi o‘rinbosari A.J. Ramatov va Toshkent shahar hokimi J.A. Artikxodjayev zimmasiga yuklansin.