Uy-joy sharoitlarini yaxshilashga muhtoj shaxslarni qo‘llab-quvvatlash hamda yoshlarning oliy ta’lim tashkilotlarida ta’lim olish imkoniyatlarini yanada kengaytirish maqsadida:

1. Moliya vazirligi, Iqtisodiy taraqqiyot va kambag‘allikni qisqartirish vazirligi hamda Markaziy bankning Moliya vazirligi tomonidan tijorat banklariga ipoteka va ta’lim kreditlari uchun ajratiladigan resurs mablag‘lari bo‘yicha foiz stavkalarini 2022-yil yakuniga qadar, istisno tariqasida, amaldagi foiz stavkalarida, ya’ni ipoteka krediti bo‘yicha 13 foiz, ta’lim krediti bo‘yicha 10 foiz miqdorida saqlab qolish to‘g‘risidagi taklifi ma’qullansin.

Bunda, 10 foiz stavkada ajratilgan resurslar hisobidan ta’lim kreditlari tijorat banklari tomonidan kredit oluvchiga 14 foizdan ajratiladi.

2. Belgilansinki, Moliya vazirligi tomonidan ajratilgan resurs mablag‘lari hamda tijorat banklarining ipoteka va ta’lim kreditlari bo‘yicha foiz stavkalarini mutanosib ravishda kamaytirish mexanizmi Markaziy bankning asosiy stavkasi 14 foizdan pasayganda qo‘llaniladi.

3. Moliya vazirligi Iqtisodiy taraqqiyot va kambag‘allikni qisqartirish vazirligi bilan birgalikda 2022-yil yakuniga qadar ipoteka va ta’lim kreditlari uchun ajratiladigan mablag‘lar bo‘yicha 2023-yil uchun foiz stavkalari yuzasidan Vazirlar Mahkamasiga taklif kiritsin.

4. Mazkur qarorning ijrosini nazorat qilish Bosh vazir o‘rinbosari J.A. Qo‘chqorov va Markaziy bank raisi M.B. Nurmuratov zimmasiga yuklansin.