O‘zbekiston Respublikasi Prezidentining “O‘zbekiston Respublikasida jismoniy tarbiya va sportni yanada takomillashtirish va ommalashtirish chora-tadbirlari to‘g‘risida” 2020-yil 24-yanvardagi PF-5924-son Farmoniga muvofiq, shuningdek mamlakatimizda yoshlarni sportga keng jalb etish, ularni harbiy-vatanparvarlik ruhida tarbiyalash, sog‘lom turmush tarziga va sport bilan shug‘ullanishga targ‘ib qilish ishlarini yanada takomillashtirish maqsadida Vazirlar Mahkamasi qaror qiladi:

1. O‘zbekiston Respublikasi Turizm va sport vazirligi hamda O‘zbekiston Respublikasi Milliy gvardiyasining O‘zbekiston Respublikasi Turizm va sport vazirligi tizimidagi Toshkent shahar, Olmazor tumani 2-son bolalar va o‘smirlar sport maktabi hamda Namangan viloyati, Yangiqo‘rg‘on tumani 1-son bolalar va o‘smirlar sport maktabi filialini O‘zbekiston Respublikasi Milliy gvardiyasi tizimiga o‘tkazish va ularning negizida amaldagi moliyalashtirish tartibini saqlab qolgan holda “Yosh gvardiyachilar” bolalar va o‘smirlar sport maktablari (keyingi o‘rinlarda — sport maktablari) faoliyatini tashkil etish to‘g‘risidagi takliflari ma’qullansin.

2. Quyidagilar sport maktablarining asosiy vazifalari etib belgilansin:

yoshlarni harbiy-vatanparvarlik ruhida tarbiyalash, ularni sog‘lom turmush tarziga targ‘ib etish va sport bilan muntazam ravishda shug‘ullanishlarini tashkil etish;

notiqlik va yetakchilik xislatlariga ega, jismonan rivojlangan, chidamli, mard va jasur Vatan himoyachilarini, shuningdek, O‘zbekiston Respublikasi Milliy gvardiyasi uchun kadrlar rezervini shakllantirish maqsadida respublikaning oliy, oliy harbiy va ixtisoslashtirilgan ta’lim muassasalariga o‘qishga kirishi uchun munosib nomzodlarni tayyorlashda ko‘maklashish;

olimpiya va milliy sport turlari bo‘yicha yangi ilmiy-metodik tavsiyalar va yutuqlar asosida sport zaxiralarini, terma jamoalarga yuqori mahoratli sportchilarni tayyorlash;

o‘quvchilarning jismoniy tayyorgarligi va texnik-taktik ko‘nikmalarini takomillashtirish, professional fazilatlarini rivojlantirish, shuningdek sportni rivojlantirish xalqaro talablariga muvofiq holda O‘zbekiston milliy terma jamoalari zaxirasini tayyorlash darajasini oshirish;

o‘quvchi-sportchilar va trenerlar tarkibining professional mahoratini oshirish uchun xorijiy sport maktablari va klublari bilan tajriba almashish bo‘yicha hamkorlikni kengaytirish.

3. Belgilab qo‘yilsinki:

sport maktablari faoliyati Vazirlar Mahkamasining “Sport maktablari faoliyatini hamda sport maktablari trenerlari va mutaxassislari mehnatini moddiy rag‘batlantirish tizimini yanada takomillashtirish to‘g‘risida” 2010-yil 23-sentabrdagi 211-son qaroriga muvofiq amalga oshiriladi;

sport maktabi direktorini lavozimga tayinlash O‘zbekiston Respublikasi Turizm va sport vazirligi bilan kelishilgan holda O‘zbekiston Respublikasi Milliy gvardiyasi tomonidan amalga oshiriladi;

sport maktablari o‘quvchilarining mashg‘ulot davriga xalaqit bermagan holda O‘zbekiston Respublikasi Milliy gvardiyasi harbiy xizmatchi va xodimlariga sport maktablarining sport inshootlaridan foydalanishi uchun ruxsat beriladi.

4. O‘zbekiston Respublikasi Milliy gvardiyasi:

a) bir oy muddatda:

Turizm va sport vazirligi bilan birgalikda sport maktablarining ustavini tasdiqlash va belgilangan tartibda davlat ro‘yxatidan o‘tkazilishini;

sport maktablarida mashg‘ulot olib boradigan sportchilarga sport inshootida to‘liq shart-sharoitlar yaratilishini ta’minlasin;

b) 2022-yil 1-sentabrga qadar O‘zbekiston Respublikasi Milliy gvardiyasi Qo‘riqlash bosh boshqarmasi mablag‘lari hisobidan sport inshootlarining moddiy-texnika bazasini mustahkamlash hamda yopiq turdagi yangi sport inshootlarini qurish, mavjudlarini rekonstruksiya qilish, ta’mirlash va jihozlash ishlarini amalga oshirsin.

5. O‘zbekiston Respublikasi Turizm va sport vazirligi:

O‘zbekiston Respublikasi Milliy gvardiyasi bilan birgalikda bir oy muddatda belgilangan tartibda sport inshootlarini topshirish-qabul qilish ishlari amalga oshirilishini ta’minlasin;

sport maktablariga bolalar, o‘smirlar va yoshlarni jismoniy tarbiya va sport bilan muntazam shug‘ullanishlari uchun keng jalb etsin hamda sport zaxirasi va yuqori mahoratli sportchilarni tayyorlash bo‘yicha o‘quv-mashq jarayonini samarali tashkil etsin;

yuqori malakali trener kadrlar bilan ta’minlash va sport zaxirasini tayyorlash ishlarini olib borsin.

6. Mazkur qarorning bajarilishini nazorat qilish O‘zbekiston Respublikasi Bosh vaziri o‘rinbosari — turizm va sport vaziri A.A. Abduxakimov hamda O‘zbekiston Respublikasi Milliy gvardiyasi qo‘mondoni R.M. Djurayev zimmasiga yuklansin.