Oʻzbekiston Respublikasi Tashqi iqtisodiy faoliyat milliy banki maqomini oshirish, chet el kreditlari va investitsiyalariga xizmat koʻrsatish boʻyicha Hukumat va Markaziy bankning vakili sifatida milliy bank zimmasiga yuklatilgan vazifalarning imkoni boricha toʻla-toʻkis bajarilishi uchun shart-sharoitlar yaratish, xorijiy sheriklar uchun ishonchli kafolatlar yaratish maqsadida Vazirlar Mahkamasi qaror qiladi:

1. Oʻzbekiston Respublikasi Tashqi iqtisodiy faoliyat milliy banki Ustavining yangi tahriri Oʻzbekiston Respublikasi Oliy Kengashining “Banklar va bank faoliyati toʻgʻrisida”gi Oʻzbekiston Respublikasi Qonunini kuchga kiritish tartibi haqidagi qaroriga muvofiq tasdiqlansin (ilova qilinadi).

2. Oʻzbekiston Respublikasi Vazirlar Mahkamasi Milliy bank ustav jamgʻarmasi umumiy hajmining kamida 60 foizining asosiy egasi etib belgilansin va bu maqsadlar uchun respublika budjetidan 2 milliard soʻm va 200 million AQSH dollari ajratilsin.

Moliya vazirligi bir hafta muddat ichida Milliy bank ustav jamgʻarmasiga respublika Hukumati toʻlagan ulush sifatida koʻrsatib oʻtilgan mablagʻlarni ajratsin.

Tashqi iqtisodiy faoliyat milliy banki Boshqaruvi bank ustav jamgʻarmasini shakllantirish uchun xorijiy muassislarni va Oʻzbekiston Respublikasi rezidentlarini jalb etish masalasini ishlab chiqsin va bu xususda takliflar kiritsin.

4. Tashqi iqtisodiy faoliyat milliy banki Boshqaruviga beriladigan kreditlar boʻyicha foiz stavkalarining miqdorini mustaqil belgilash huquqi berilsin.

5. Respublikaning Tashqi iqtisodiy faoliyat subyektlariga xizmat koʻrsatishni takomillashtirish, joylarda valyuta investitsiyalaridan foydalanishni nazorat qilish uchun Oʻzbekiston Respublikasi Tashqi iqtisodiy faoliyat milliy banki tarmogʻini rivojlantirish maqsadida:

Oʻzbekiston Respublikasi Markaziy banki Oʻzbekiston Respublikasi hududida va uning tashqarisida Milliy bank filiallarini tashkil etishga koʻmaklashsin;

Andijon, Jizzax, Navoiy, Surxondaryo, Sirdaryo viloyatlari hokimliklari Tashqi iqtisodiy faoliyat milliy bankining filiallarini ochish uchun viloyatlarning markazlarida tegishli binolar ajratilishini taʼminlasinlar;

Tashqi iqtisodiy faoliyat milliy banki Boshqaruvi Oʻzbekiston Respublikasi Markaziy banki bilan birgalikda Moskva, Sankt-Peterburg, Odessa, Chop, Brest shaharlarida Tashqi iqtisodiy faoliyat milliy banki filiallarini ochish chora-tadbirlarini koʻrsin;

Oʻzbekiston Respublikasining Rossiya Federatsiyasidagi elchixonasi Oʻzbekiston Respublikasi Tashqi iqtisodiy faoliyat milliy bankining Moskva filialini ochish uchun Elchixona mehmonxonasi yangi binosining 1-qavatida joy ajratsin.

6. Moliya vazirligi Oʻzbekiston Respublikasi Tashqi iqtisodiy faoliyat milliy banki bilan birgalikda 10 kun muddat ichida Milliy bankning soliq solish bazasini rivojlanish uchun sarflanadigan mablagʻlar miqdorida kamaytirishga doir taklifni koʻrib chiqsin va respublika Hukumatiga kiritsin.

7. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari Oʻ.T. Sultonov va B.S. Hamidov oʻrtoqlar zimmasiga yuklatilsin.

1. Oʻzbekiston Respublikasi Tashqi iqtisodiy faoliyat milliy banki (keyingi oʻrinlarda Bank deb ataladi) Oʻzbekiston Respublikasi Prezidentining 1991-yil 7-sentabrdagi PF-244-son Farmoni bilan tashkil etilgan.

2. Oʻzbekiston Respublikasi Vazirlar Mahkamasi Bankning muassisi hisoblanadi. Bank xoʻjalik yuritish huquqiga asoslangan unitar korxona shaklida tashkil etiladi.

3. Bank faoliyatining asosiy yoʻnalishlari Oʻzbekiston Respublikasi Hukumatining xalqaro iqtisodiy munosabatlar sohasidagi siyosatini roʻyobga chiqarish, boshqa mamlakatlar bilan iqtisodiy hamkorlikni rivojlantirish va mustahkamlashga, respublikaning eksport imkoniyatini kengaytirishga, tovarlar hamda koʻrsatiladigan xizmatlar eksporti va importi tarkibini yaxshilashga koʻmaklashish, tashqi iqtisodiy faoliyatga xizmat koʻrsatish, valyuta mablagʻlari toʻplash hamda valyuta manfaatlarini himoya qilishdan iboratdir.

4. Bank Hukumat va Markaziy bankning topshirigʻiga binoan boshqa davlatlarning banklari, xalqaro moliya institutlari va boshqa moliya-kredit tashkilotlari bilan munosabatlarda Oʻzbekiston Respublikasining manfaatlarini ifodalaydi.

5. Bank oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga hamda Oʻzbekiston Respublikasining boshqa normativ-huquqiy hujjatlariga, shuningdek ushbu Ustavga amal qiladi.

6. Bank yuridik shaxs hisoblanadi, oʻzining alohida mulki va mustaqil balansiga ega boʻladi, oʻz nomidan huquq va majburiyatlar olishi, sudda daʼvogar hamda javobgar boʻlishi mumkin.

Bank unga xoʻjalik yuritish huquqi bilan tegishli boʻlgan mol-mulkka, shuningdek bank faoliyatini amalga oshirish davomida sotib olinadigan (olinadigan) va Bankning oʻz mulki boʻlgan boshqa mol-mulkdan qonun hujjatlarida va ushbu Ustavda belgilangan tartibda egalik qiladi, foydalanadi va tasarruf etadi.

7. Bank uning filiallari va vakolatxonalar Oʻzbekiston Respublikasining Davlat gerbi tasviri tushirilgan doira shaklidagi muhrga, oʻz nomi oʻzbek, ingliz va rus tillarida yozilgan shtamplar hamda ish qogʻozlariga ega boʻladi.

Oʻzbekiston Respublikasi Tashqi iqtisodiy faoliyat milliy banki Toshkent shahar, Istiqbol koʻchasi, 23-uyda joylashgan.

Bankning elektron pochta manzili: info@central.nbu.uz va webmaster@central.nbu.uz.;

Bankning firma nomi:

davlat tilida: toʻliq nomi — “Oʻzbekiston Respublikasi Tashqi iqtisodiy faoliyat milliy banki”, qisqartirilgan nomi “Oʻzmilliybank”;

rus tilida: toʻliq nomi — “Natsionalniy bank vneshney ekonomicheskoy deyatelnosti Respubliki Uzbekistan”, qisqartirilgan nomi “Uznatsbank”;

ingliz tilida: toʻliq nomi — “National Bank for Foreign Economic Activity of the Republic of Uzbekistan”, qisqartirilgan nomi — NBU”.

8. Bank oʻz faoliyatini tijorat asosida amalga oshiradi.

9. Bank Oʻzbekiston Respublikasining majburiyatlari yuzasidan javobgar boʻlmaydi, Oʻzbekiston Respublikasi Bank majburiyatlari yuzasidan javobgar boʻlmaydi, Oʻzbekiston Respublikasi oʻz zimmasiga bunday majburiyat olgan hollari bundan mustasno.

10. Bank oʻz faoliyati maqsadlariga erishishi uchun:

eksport, import aʼmollari va savdo-sotiqqa taalluqli boʻlmagan aʼmollar boʻyicha respublikaning xalqaro hisob-kitoblarini, shuningdek, boshqa xalqaro hisob-kitoblarni tashkil etadi va amalga oshiradi;

Oʻzbekiston Respublikasining topshirigʻiga binoan Oʻzbekiston Respublikasi nomidan qarz oluvchi, kafil va kreditor sifatida ish koʻrish huquqiga ega;

qonun hujjatlariga va xalqaro bank amaliyotiga muvofiq kreditlar, depozitlar, omonatlar shaklida, shuningdek boshqa shakllarda xorijiy valyutadagi mablagʻlarni jalb etishi mumkin;

hukumatlararo bitimlarning toʻlov shartlarini ishlab chiqishda qatnashadi;

xorijiy davlatlar bilan valyuta-moliya va kredit-hisob-kitob munosabatlarini takomillashtiradi, bu munosabatlarning samaradorligini oshiradi, hisob-kitob qilish va kreditlar berishning eng tejamli va ilgʻor shakllarini qoʻllaydi;

chet el banklari, konsernlari, firmalari va boshqa sheriklar tomonidan shartnomalarni bajarish chogʻida ularning aybi bilan toʻliq olinmaydi qolgan mablagʻlarni undirishga koʻmaklashadi;

eksport va importning oʻrnini bosadigan ishlab chiqarishlarni tashkil etish va ularni rivojlantirish uchun chet el valyutasida kreditlar berishni amalga oshiradi;

yangi ish joylarini ochishga, respublika mahsulotlarining jahon bozoriga chiqishiga koʻmaklashuvchi qishloq xoʻjalik xom ashyosini qayta ishlash, hozirgi zamon asbob-uskunalarini asosida sanoat korxonalarini takomillashtirib, ularda yangi texnikalar oʻrnatish, xalq isteʼmoli mollari ishlab chiqarish yuzasidan ish jarayoni takomiliga yetkazilgan ilgʻor texnologiyalarni respublikaga jalb etishga doir loyiha va dasturlarga kredit beradi;

xorijiy banklar bilan bevosita gumashtachilik munosabatlari oʻrnatadi;

valyuta mablagʻlarini jamlaydi;

valyuta mablagʻlarini respublika uchun maqbul boʻlgan shartlarda ichki, xalqaro moliya bozorlarida joylashtiradi;

innovatsiya va investitsiya faoliyatini amalga oshiradi;

tadbirkorlik faoliyatini subyektlari faoliyatida sarmoya bilan, shu jumladan xoʻjalik jamiyatlarida ishtirokchi yoki aksiyador sifatida, mol-mulkning bir qismini belgilangan tartibda xoʻjalik yuritishiga bergan holda unitar korxonalar (shuʼba korxonalar) tashkil etish va qonun hujjatlarida nazarda tutilgan boshqa shakllarda qatnashadi;

iqtisodiy va ijtimoiy rivojlanish davlat rejalarini, pul-kredit siyosati bosh yoʻnalishlarini, jamlanma valyuta rejasini, valyuta tushumi hajmlari va bank aʼmollari boʻyicha toʻlovlarga doir takliflarni ishlab chiqishda qatnashadi;

Oʻzbekiston Respublikasi hududida valyuta boshqaruvi va bank faoliyati boʻyicha qonunchilik hujjatlari va normativ hujjatlar loyihalarini ishlab chiqishda qatnashadi;

qonun hujjatlari doirasida, shuningdek xalqaro bank amaliyotiga muvofiq boshqa bank operatsiyalarini amalga oshiradi.

11. Bank respublika Hukumati va Markaziy bankining topshirigʻiga binoan boshqa xizmatlarni ham bajaradi.

12. Bankka xoʻjalik yuritish huquqi bilan tegishli boʻlgan mol-mulk pul mablagʻlari va unga tegishli boʻlgan binolar, inshootlar, asbob-uskunalar, transport va boshqa boyliklardan iboratdir.

Bankning koʻchmas mol-mulki, majburiyatlarni (Bank oldidagi qarzlarni) qaytarish hisobiga Bankka oʻtgan koʻchmas mol-mulkdan tashqari, sotilishi, ijaraga berilishi va garovga qoʻyilishi, shuningdek xoʻjalik yurituvchi subyektlarning ustav fondiga ulush sifatida kiritilishi yoki Bank Kengashining qaroriga koʻra boshqacha usulda oʻzgaga berilishi mumkin.

Bankning qolgan mol-mulki, shu jumladan majburiyatlarni (Bank oldidagi qarzlarni) qaytarish hisobiga Bankka oʻtgan mol-mulk sotilishi, ijaraga berilishi va garovga qoʻyilishi, shuningdek xoʻjalik yurituvchi subyektlarning ustav fondiga ulush sifatida kiritilishi yoki Bank Kengashi tomonidan belgilangan tartibda boshqacha usulda oʻzgaga berilishi mumkin.

13. Bankning ustav fondi ustav fondini koʻpaytirishga Oʻzbekiston Respublikasi Vazirlar Mahkamasi tomonidan toʻlangan mablagʻlar va Bank foydasini kapitallashtirish mablagʻlari hisobiga 79 000 000 000,00 (yetmish toʻqqiz milliard) soʻmni va Markaziy bankning mablagʻlar oʻtkazilgan kundagi kursi boʻyicha soʻmga ekvivalent boʻlgan 400 000 000,00 (toʻrt yuz million) AQSH dollarini tashkil qiladi.

14. Ustav fondi maqsadli tushumlar, respublika budjeti mablagʻlari va qonun hujjatlarida taqiqlanmagan boshqa manbalar hisobiga hosil boʻladi. Ustav fondi miqdori ushbu Ustavda belgilangan tartibda oʻzgartirilishi mumkin.

15. Bankda zaxira jamgʻarmasi tashkil etiladi va ushbu jamgʻarma bank operatsiyasi boʻyicha ehtimoliy zararlarni qoplash uchun moʻljallanadi hamda ustav fondining 15 foiziga yetgunga qadar sof foydadan yillik ajratmalar (kamida 5 foiz) hisobiga shakllantiriladi.

16. Bankning mol-mulkini realizatsiya qilish (sotish) va ijaraga berishdan tushgan mablagʻlar uning tasarrufida qoladi va Bank tomonidan ustav faoliyatiga muvofiq mustaqil foydalanilishi mumkin.

17. Bankning kredit resurslari:

ustav, zaxira jamgʻarmalari va boshqa jamgʻarmalar mablagʻi;

mijozlarning Bank hisoblaridagi mablagʻlari, shu jumladan, muddatli omonatlar va depozitlar;

boshqa banklarning kreditlari;

imzolangan bitim va shartnomalarga muvofiq jalb etiladigan boshqa davlatlar korxonalari, firmalari va banklarining mablagʻlari;

qimmatli qogʻozlar chiqarish natijasida olingan mablagʻlar;

fuqarolarning muayyan va oʻzlari talab qilib olgunga qadar jalb etiladigan omonatlari;

jalb etilgan boshqa mablagʻlar hisobiga hosil qilinadi.

Bankning yil davomida taqsimlanmagan foydasidan kredit berish resursi sifatida foydalanish mumkin.

18. Bank kredit, moliya, hisob-kitob-kassa xizmatlarini va bankka taalluqli boshqa xizmatlarning butun majmuini bajaradi. Shu jumladan:

boshqa davlatlarning banklari, kredit va boshqa tashkilotlari (shu jumladan, xalqaro) bilan gumashtachilik munosabatlari oʻrnatish, eksport, import aʼmollari, savdo-sotiqqa taalluqli boʻlmagan va boshqa aʼmollar boʻyicha xalqaro hisob-kitoblarini amalga oshirish shartlari va tartibi toʻgʻrisida, kreditlar berish va olish haqida, ushbu Ustavda nazarda tutilgan boshqa aʼmollarni bajarish xususida shartnomalar (bitimlar) tuzadi;

chet el banklari va xalqaro banklar hamda boshqa tashkilotlardan xalqaro bank amaliyotida qoʻllanadigan shakllarda kredit va qarzlar oladi, shuningdek veksellar, obligatsiyalar tarzida olingan kredit va qarzlarni hamda Bankning boshqa majburiyatlarini taʼminlaydi;

Bankning tashqi iqtisodiy faoliyati bilan bogʻliq boʻlgan mijozlariga eksport qilinadigan va importning oʻrnini bosadigan mollar ishlab chiqarishni, barpo etish va ularni rivojlantirish uchun bunday mijozlarning kundalik faoliyatini taʼminlash uchun soʻmlarda, shuningdek, chet el valyutasida qarzlar beradi;

Bank aʼmollarini bajarish va pul mablagʻlarini saqlash uchun banklarda, shu jumladan, chet el banklarida gumashtachilik hisoblari ochadi;

banklardan, shu jumladan, chet el banklari, xalqaro banklar va boshqa tashkilotlardan, shuningdek, Oʻzbekiston Respublikasi fuqarolaridan, xorijiy davlatlarning fuqarolaridan hisoblariga hamda omonatga qoʻyish uchun soʻm va chet el valyutalarida mablagʻlar qabul qiladi, chet el xalqaro banklaridagi va boshqa kredit muassasalaridagi hisoblar va omonatlarga, qimmatli qogʻozlarga va boshqa moliyaviy vositalarga mablagʻlar joylashtiradi;

shartnoma asosida Oʻzbekiston Respublikasi banklari, chet el banklari hamda xalqaro banklar, boshqa moliya muassasalarining gumashtachilik hisoblaridagi mablagʻlarni tasarruf etish tartibini, bunday hisoblarni ochish va yuritish tartibini hamda Bankdagi omonatga soʻm va chet el valyutasida mablagʻ joylashtirish shartlarini belgilaydi;

Oʻzbekiston Respublikasi hududida va uning tashqarisida chet el valyutasi (banknot, kaznachey biletlari, tangalar), chet el valyutasida toʻlov hujjatlari (cheklar, veksellar, akkreditivlar va shu kabilar) hamda boshqa valyuta boyliklari sotib oladi va sotadi, shuningdek, valyuta boyliklari bilan bogʻliq boʻlgan boshqa bitimlar tuzadi hamda aʼmollarni bajaradi;

Xalqaro bank amaliyotiga muvofiq ravishda xorijiy mamlakatlarda chet el valyutasi (diling) sotib olish va sotish hamda boshqa valyuta aʼmollarini bajaradi;

uchinchi shaxslar nomidan ijrosi pul shaklida amalga oshirilishi nazarda tutilgan kafillik kafolatlar va boshqa majburiyatlarni oʻz zimmasiga oladi;

tovarlar yetkazib berish va xizmatlar koʻrsatish shartlaridan kelib chiqadigan talablar qoʻyish huquqini oladi, bunday talablarni va ularga taalluqli inkassatsiyalar (faktoring) ijrosini tavakkal qilib oʻz zimmasiga oladi;

asbob-uskuna, hisob-kitob terminallari, bankomatlar, transport vositalari va boshqa mol-mulkni sotib oladi hamda ijara va lizing shartlarida beradi;

investitsiyalarning egasi yoki tasarruf etuvchisining topshirigʻiga binoan kapital mablagʻlarni pul bilan taʼminlashni amalga oshiradi;

toʻlov hujjatlari va boshqa qiymatli qogʻozlarni chiqaradi;

davlat toʻlov hujjatlarini va boshqa qiymatli qogʻozlarni sotib oladi, sotadi, saqlaydi hamda ular bilan bogʻliq boshqa aʼmollarni bajaradi;

hozirgi zamon texnikasi va texnologiyalarini (kredit va elektron varaqalarni joriy etish, Bankni jahon banklararo telekommunikatsiya tarmogʻiga qoʻshish va h. q) orqali mijozlarga xizmat koʻrsatish shakllarini takomillashtiradi;

qimmatbaho metallarni hisoblar va omonatlarga jalb etadi hamda joylashtiradi, ham ichki bozorda, ham xalqaro bozorda qimmatbaho metallarni, tabiiy qimmatbaho metallarni sotib oladi, sotadi hamda ular bilan bogʻliq boshqa aʼmollarni bajaradi;

mijozlarning topshirigʻiga binoan mablagʻlarni jalb etish va joylashtirish, qiymatli qogʻozlarni boshqarish hamda boshqa aʼmollardan iborat ishonch aʼmollarini bajaradi;

mijozlar va gumashta-banklarning hisobini yuritadi;

mijozlar bilan tuzilgan shartnomalar asosida chet el valyutasini, qimmatbaho metallarni, valyuta va boshqa boyliklarni saqlashga, komissiyaga qabul qiladi;

bank faoliyati bilan bogʻliq maslahatlar beradi va marketing xizmatlari koʻrsatadi.

qimmatli qogʻozlarning uyushgan savdolarida qimmatli qogʻozlarga doir bitimlar natijalari boʻyicha pul mablagʻlarining hisob-kitoblarini amalga oshiradi;

qimmatli qogʻozlarga doir narxlar, talab va taklif darajasini saqlab turish (qimmatli qogʻozlar bozori likvidliligi) uchun market-meyker xizmatlari koʻrsatadi;

qonun hujjatlariga muvofiq boshqa bank operatsiyalarini amalga oshiradi.

19. Bank:

oʻz mablagʻlari bilan, shu jumladan, ulushbay asosda korxonalar, tashkilotlar va boshqa tijorat tuzilmalarini tashkil etishda va ularning xoʻjalik faoliyatida, shu jumladan, xolding asosida ishtirok etishi;

korxonalar va tashkilotlarning bergan ishonchnomasi boʻyicha moliya va xoʻjalik idoralarida ularning nomidan vakillik qilishi mumkin.

20. Bankning mijozlar va boshqa kontragentlar bilan munosabatlari shartnoma asosida quriladi.

21. Bank:

kredit berilgan korxonalar va tashkilotlardan ularning toʻlov qobiliyatini, shuningdek, berilgan kreditlar qaytarilishining taʼminlanganligini tasdiqlovchi hisobotlar, balanslar va hujjatlar olishga;

bankning oʻz mablagʻlari yoki kreditlar bilan ishtirokida amalga oshirilishi moʻljallanayotgan obyektlarning qurilishi, ularni texnika bilan qurollantirish va boshqa xoʻjalik faoliyati boʻyicha loyiha yechimlarini ekspertizadan oʻtkazishni talab qilishga;

kredit shartnomalarida nazarda tutilgan majburiyatlar buzilganda, hisobotlarning notoʻgʻriligi yoki buxgalteriya hisobining chalkashligi aniqlangan hollarda kredit berishini toʻxtatib qoʻyishga, berilgan kredit summasini muddatidan oldin undirishga;

qonunda belgilangan hollar qarzdorlarni toʻlov qobiliyatiga ega emas deb eʼlon qilishga;

shartnomalar asosida aktiv va passiv aʼmollar oʻtkazish uchun foiz stavkalari, shuningdek, koʻrsatilgan xizmatlar uchun komission tarzda taqdirlash miqdorlarini belgilashga haqlidir.

22. Bank, muassis sifatida, Oʻzbekiston Respublikasi Vazirlar Mahkamasiga hisobot beradi.

Oʻzbekiston Respublikasi Vazirlar Mahkamasi:

Bank Ustavini, unga kiritiladigan oʻzgartirish va qoʻshimchalarni tasdiqlaydi;

Bank Ustav fondini oʻzgartirish toʻgʻrisida qaror qabul qiladi;

Bankni tugatish yoki qayta tashkil etish toʻgʻrisida qaror qabul qiladi;

Bank Kengashi faoliyati toʻgʻrisidagi hisobotlarni eshitadi;

qonun hujjatlariga muvofiq boshqa vakolatlarni amalga oshiradi.

23. Quyidagilar Bankning boshqaruv organi hisoblanadi:

Bank Kengashi;

Bank Boshqaruvi.

Bank Kengashi Bank boshqaruvining yuqori kollegial organi hisoblanadi va yetti nafar aʼzodan, jumladan Bank Kengashiga boshchilik qiladigan Raisdan iborat. Bank Kengashining tarkibi Oʻzbekiston Respublikasi Vazirlar Mahkamasining qarori bilan tasdiqlanadi.

24. Bank Kengashi Majlisi har yili kamida ikki marta chaqiriladi. Zarurat boʻlganda Bank Kengashining Navbatdan tashqari majlislari:

Vazirlar Mahkamasi;

Markaziy bank;

Bank Kengashi Raisi;

Bank Kengashining ikki va undan ortiq aʼzolari;

Bank Boshqaruvi;

ichki audit xizmati rahbari;

Bankning tashqi auditori tashabbusi bilan chaqiriladi.

Bank Kengashi majlisida qarorlar qatnashchilarning 3/4 ovozi bilan qabul qilinadi. Kengash majlisida Kengashning har bir aʼzosi bitta ovozga ega boʻladi.

Bank Kengashi Majlisi unda Bank Kengashi aʼzolari roʻyxatdagi tarkibining kamida 75 foizi qatnashgan taqdirda vakolatli hisoblanadi. Bunda majlislarda Kengash Raisining qatnashishi majburiy hisoblanadi.

Bank Kengashi oʻz faoliyatida Oʻzbekiston Respublikasining amaldagi qonun hujjatlariga va ushbu Ustavga amal qiladi.

25. Bank Kengashi:

Bank faoliyatini, kreditlash va mablagʻlarni investitsiyalashning toʻgʻriligini nazorat qiladi (omonatchilar, kreditorlar va muassislarning manfaatlarini himoya qilish maqsadida);

Bankning muqobil kapitallashuvini qoʻllab-quvvatlaydi;

Bank siyosatini shakllantiradi;

Oʻzbekiston Respublikasi Vazirlar Mahkamasiga Bank Ustavi, unga oʻzgartirish va qoʻshimchalar loyihalarini tasdiqlash uchun kiritadi;

Bank Ustav fondini oʻzgartirish toʻgʻrisidagi takliflarni Oʻzbekiston Respublikasi Vazirlar Mahkamasiga tasdiqlash uchun taqdim etadi;

Bank faoliyatining yillik natijalarini tasdiqlaydi;

Bank Boshqaruvining taqdimnomasi boʻyicha foydani taqsimlash, shuningdek zararlarni qoplash tartibini tasdiqlaydi;

Bankning yillik biznes-rejasini tasdiqlaydi;

Bank Boshqaruvi aʼzolari tarkibini tasdiqlaydi, Bank Raisi va Bank Raisining oʻrinbosarlari bundan mustasno;

Kreditlash, aktivlar va passivlarni boshqarish, investitsiyalarni amalga oshirish va Bank mijozlariga xizmatlarning yangi turlarini koʻrsatish sohasida Bank siyosatining asosiy yoʻnalishlarini belgilaydi;

Bank Boshqaruvi hisobotlarini, Bank ichki auditi xizmati rahbarining axborotini eshitadi;

Bankka aloqador boʻlgan shaxslar bilan bitimlar tuzish toʻgʻrisida qarorlar qabul qiladi;

qiymati bunday bitimni tuzish toʻgʻrisida qaror qabul qilingan kunda Bank aktivlari balans qiymatining yigirma besh foizidan ortiqni tashkil etadigan bitimlar yoki bir necha oʻzaro bogʻliq bitimlar tuzish toʻgʻrisida qaror qabul qiladi;

Bankning koʻchmas mol-mulkini (majburiyatlar va qarzlarni qoplash hisobiga Bankka oʻtgan koʻchmas mol-mulk bundan mustasno) realizatsiya qilish, ijaraga berish va garovga qoʻyish, shuningdek xoʻjalik yurituvchi subyektlarning ustav fondiga ulush sifatida kiritish yoki boshqa usulda oʻzgaga berish toʻgʻrisida qarorlar qabul qiladi;

majburiyatlar va qarzlarni qoplash hisobiga Bankning mulkiga oʻtgan mol-mulkni Bank tomonidan realizatsiya qilish tartibini belgilaydi;

Bankning filiallari, vakolatxonalari, xoʻjalik jamiyatlari va unitar korxonalarini tashkil etish, qayta tashkil etish va tugatish toʻgʻrisida qaror qabul qiladi hamda ularning nizomlarini va ustavlarini tasdiqlaydi.

Bank Boshqaruvi faoliyati tartibini belgilab beradigan hujjatlarni tasdiqlaydi;

qonun hujjatlariga va ushbu Ustavga muvofiq Bank Kengashining vakolatlariga tegishli boʻlgan boshqa masalalar boʻyicha qarorlar qabul qiladi.

26. Bankning ijro etuvchi organi 15 nafar aʼzodan, jumladan Boshqaruvni boshqaradigan Raisdan iborat boʻlgan Boshqaruv hisoblanadi.

Bank Boshqaruvi Raisi va uning oʻrinbosarlari lavozimga Oʻzbekiston Respublikasi Vazirlar Mahkamasi tomonidan tayinlanadilar.

Bank Boshqaruvi Raisi Bankning yuqori mansabdor shaxsi hisoblanadi, u Bank Ustavi bilan oʻziga berilgan vakolatlarga muvofiq Bank faoliyatiga rahbarlik qiladi va Bankka yuklangan vazifalarning bajarilishi uchun shaxsan javob beradi.

Boshqaruv Raisi va uning oʻrinbosarlari bilan bir qatorda, Boshqaruv tarkibiga, Bank Kengashi qaroriga binoan, Bankning tarkibiy boʻlinmalari rahbarlari lavozimiga koʻra kiradilar.

Bank Boshqaruvi:

Bank faoliyatini tashkil qiladi va unga tezkor rahbarlikni amalga oshiradi, Ustavdagi vazifalarning, Oʻzbekiston Respublikasi Vazirlar Mahkamasi qarorlari va farmoyishlarining hamda Bank Kengashi qarorlarining bajarilishini taʼminlaydi;

ushbu Ustavga koʻra Bank Kengashi va Oʻzbekiston Respublikasi Vazirlar Mahkamasi tomonidan koʻrib chiqilishi kerak boʻlgan barcha masalalarni oldindan koʻrib chiqadi, ular boʻyicha tegishli materiallar, takliflarni va qarorlar loyihalarini tayyorlaydi;

Bank tuzilmasini belgilaydi;

Boshqaruv koʻrib chiqishi uchun kiritilgan boshqa masalalarni koʻrib chiqadi va hal qiladi.

Bank Boshqaruvi Hukumatning valyuta-moliya munosabatlari sohasidagi siyosatini, Bankni rivojlantirish va joriy faoliyatini Bank tomonidan amalga oshirish bilan bogʻliq barcha masalalarni bamaslahat va Boshqaruv aʼzolari fikr-mulohazalarini hisobga olgan holda koʻrib chiqadi.

Boshqaruv qarorlari ularni qabul qilish uchun Boshqaruv aʼzolari roʻyxatdagi tarkibining kamida toʻrtdan uch qismi ovoz bergan taqdirda qabul qilingan hisoblanadi.

27. Bank Raisi:

Bank faoliyatiga doir barcha masalalarni hal etadi, ushbu Ustavda Oʻzbekiston Respublikasi Vazirlar Mahkamasining Bank Kengashi va Boshqaruvining vakolatiga kiritilgan masalalar bundan mustasnodir;

ishonchnomasiz Bank nomidan ish koʻradi, respublika organlari, korxonalari va tashkilotlarida, shuningdek boshqa davlatlarda Bank faoliyatiga doir barcha masalalar boʻyicha Bank nomidan vakillik qiladi;

Bank Kengashi tomonidan belgilanadigan tartibda bank mol-mulkini tasarruf etadi, koʻchmas mulk bundan mustasno;

shartnomalar, bitimlar, shu jumladan, mehnat shartnomalari tuzadi;

ishonchnomalar beradi;

mablagʻlarni, shu jumladan, xayriya ehsonlari uchun tasarruf etish huquqidan foydalanadi, xizmat safariga, vakillik qilishga va boshqa maqsadlarga sarflanadigan xarajatlarning eng yuqori miqdorini belgilaydi;

Bank uning filiallari va vakolatxonalarining shtat jadvalini tasdiqlaydi;

Bank xodimlarining mehnatiga toʻlanadigan haq, shuningdek boshqa daromadlari shakli va miqdorini mustaqil belgilaydi;

xodimlarni mukofotlash toʻgʻrisidagi, tuzilma boʻlinmalari haqidagi, Bank xodimlari lavozim yoʻriqnomalarini tasdiqlaydi;

Bankning barcha xodimlari uchun majburiy boʻlgan buyruq, farmoyishlar chiqaradi;

Oʻzbekiston Respublikasi Markaziy bankida kelishishni va tasdiqlashni talab qilmaydigan Bankning uslubiy koʻrsatmalarini, yoʻriqnomalarini tasdiqlaydi.

Bank faoliyatiga doir boshqa masalalarni koʻrib chiqadi, hal etadi.

28. Bankning mehnat jamoasi — mehnat shartnomasi (kontrakti, bitimi) asosida, shuningdek, Bank bilan xodim oʻrtasidagi mehnat munosabatlarini tartibga solishning boshqa shakllari asosida Bank faoliyatida oʻz mehnati bilan ishtirok etadigan barcha xodimlardan tashkil topadi.

29. Bankning barcha xodimlari Milliy bank xodimlari Kodeksiga rioya etishlari, Bankning aʼmollari, hisoblari va omonatlariga, mijozlari va gumashtalariga doir sirlarni oshkor etmasliklari shart.

30. Bank har bir xodimining mehnat daromadlari Bank ishining pirovard natijalari hisobga olgan holda, shaxsan qoʻshgan mehnat hissasiga qarab belgilanadi va ulardan qonun hujjatlarida belgilangan tartibda soliq va boshqa majburiy toʻlovlar toʻlanadi.

31. Oʻzbekiston Respublikasi Davlat budjetiga hamda davlat maqsadli jamgʻarmalariga soliqlar va boshqa majburiy toʻlovlar toʻlangandan keyin sof foyda bankning tasarrufida qoladi va undan Bank Kengashi tomonidan belgilanadigan tartibda foydalaniladi.

32. Bankda buxgalteriya hisobi va hisobot Oʻzbekiston Respublikasi Markaziy bankning yagona qoidalariga muvofiq amalga oshiriladi. Bank Oʻzbekiston Respublikasi Markaziy banki belgilangan hajm va muddatlarda unga buxgalteriya balansi, hisobotlar va boshqa materiallarni taqdim etadi.

33. Taqdim etilgan maʼlumotlarning toʻgʻriligini auditorlik tashkiloti tasdiqlab bergandan keyin Bank Oʻzbekiston Respublikasi Markaziy banki belgilagan shaklda va muddatlarda yillik balansni, foyda va zararga doir hisob-kitobni eʼlon qiladi.

34. Bankning aʼmollarini bajaradigan yili 1-yanvarda boshlanadi va 31-dekabrda tugaydi.

35. Bankning moliya-xoʻjalik faoliyati ustidan nazorat qilish va Bank faoliyatini tekshirish (audit) Bankning Ichki audit xizmati, mustaqil auditorlik tashkilotlari, shuningdek qonun hujjatlariga muvofiq bunday tekshirishlarni amalga oshirish vakolati berilgan nazorat organlari tomonidan amalga oshiriladi.

36. Bank faoliyati Oʻzbekiston Respublikasi qonunchiligiga muvofiq Oʻzbekiston Respublikasi Hukumatining qaroriga binoan toʻxtatiladi.