Vazirlar Mahkamasi qaror qiladi:

1. “Oʻzboshyogʻochqurilish” birlashmasi va “IMPEKS-GROUP” firmasining gugurt ishlab chiqarish boʻyicha “Oʻzellas” qoʻshma korxonasini tashkil etish toʻgʻrisidagi taklifi qabul qilinsin.

2. “Oʻzboshyogʻochqurilish” birlashmasi “IMPEKS-GROUP” firmasi bilan birgalikda “Oʻzellas” qoʻshma korxonasini belgilangan tartibda roʻyxatdan oʻtkazish uchun 1993-yil 15-martgacha zarur hujjatlarni tayyorlasin va Oʻzbekiston Respublikasi Moliya vazirligiga taqdim etsin.

3. Qoʻshma korxonaning inshootlarini qurish boʻyicha bosh pudratchi etib “Oʻzboshyogʻochqurilish” birlashmasi belgilansin.

4. “Oʻzogʻirsanoat” instituti “Oʻzboshyogʻochqurilish” birlashmasining talabnomasiga binoan gugurt ishlab chiqarish boʻyicha texnologik liniyalarni joylashtirish uchun yogʻochga kompleks ishlov berish korxonasining mavjud ishlab chiqarish maydonlarini qaytadan qurishning loyiha-smeta hujjatlarini ishlab chiqsin.

5. Quyidagilar maʼlumot uchun qabul qilinsin:

“IMPEKS-GROUP” firmasi oʻzining ustav fondidagi ulushi (33 foiz) hisobiga Gretsiyadagi uskunalarni qismlarga ajratib Toshkentga olib keladi va montaj qilib, ishga tushirish, sozlash ishlarini bajaradi va kadrlarni oʻqitadi;

qoʻshma korxona uchun ajratilgan yer uchastkasining, binolar va inshootlarning qiymati 1,5 mln AQSH dollariga baholangan hamda “Oʻzboshyogʻochqurilish” birlashmasining ustav fondidagi ulushi (67 foiz) deb hisoblanadi.

6. “Oʻzistiqbolstat” davlat qoʻmitasi, Oʻzbekiston Respublikasi Moliya vazirligi va Oʻzsanoatqurilish banki mazkur qoʻshma korxona inshootlari qurilishini mablagʻ bilan taʼminlash uchun 3,5 mln AQSH dollari “Oʻzboshyogʻochqurilish” birlashmasining ustav fondidagi ulushi va imtiyozli kredit ajratishni nazarda tutsinlar.

7. “Oʻzshartnomasavdo” “Oʻzboshyogʻochqurilish” birlashmasining buyurtmanomasiga binoan gugurt ishlab chiqarish uchun zarur boʻlgan kimyoviy xom ashyo yetkazib berishni belgilangan tartibda hal etsin.

8. Ushbu qarorning bajarilishini nazorat qilish Bosh vazirning oʻrinbosari oʻrtoq K.N. Toʻlaganov zimmasiga yuklatilsin.