Yevropa tiklanish va taraqqiyot banki ishtirokidagi loyihalar tayyorlanishini jadallashtirish, loyiha tayyorlanishidan uning toʻliq amalga oshirilishigacha boʻlgan butun davr mobaynida amaliy natija beradigan monitoringni taʼminlash maqsadida Vazirlar Mahkamasi qaror qiladi:

1. Yevropa tiklanish va taraqqiyot banki bilan birgalikda amalga oshirish moʻljallangan loyihalar roʻyxati 1-ilovaga* muvofiq maʼqullansin.

2. Yevropa tiklanish va taraqqiyot banki bilan qoʻshma loyihalarni amalga oshirishga doir birinchi navbatdagi chora-tadbirlar jadvali 2-ilovaga* muvofiq tasdiqlansin.

3. Yevropa tiklanish va taraqqiyot banki bilan qoʻshma loyihalarni tayyorlash va amalga oshirish uchun masʼul boʻlgan Oʻzbekiston Respublikasi Vazirlar Mahkamasi komplekslari rahbarlari:

ikki hafta muddatda ishchi guruhlarni shakllantirsinlar va ularning rahbarlarini tayinlasinlar;

Yevropa tiklanish va taraqqiyot banki bilan qoʻshma loyihalarni tayyorlash va amalga oshirish boʻyicha ijroiya agentliklar sifatida belgilangan respublika vazirliklari va idoralari bilan birgalikda bir oy muddatda loyihalarni amalga oshirishga jadal tayyorgarlik koʻrilishini taʼminlaydigan chora-tadbirlarning tegishli rejalarini tasdiqlasinlar, bunda texnik-iqtisodiy asoslash oʻz vaqtida ekspertizadan oʻtkazilishini, mablagʻ bilan taʼminlash manbalari va qarz mablagʻlari qaytarilishini kelishishni nazarda tutsinlar;

qoʻshma loyihalarning tayyorlanishidan ularning toʻliq amalga oshirilishigacha boʻlgan butun davr mobaynida amaliy natija beradigan monitoringni taʼminlasinlar.

4. Belgilansinki:

Yevropa tiklanish va taraqqiyot banki ishtirokida ishlab chiqilayotgan loyihalarning texnik-iqtisodiy asoslanishi yuzasidan texnik vazifalar ishchi guruhlar tomonidan majburiy tartibda Oʻzbekiston Respublikasi Makroiqtisodiyot va statistika vazirligi hamda Moliya vazirligiga kelishish uchun taqdim etiladi;

yangi loyihalarni mablagʻ bilan taʼminlashga buyurtmanomalar Yevropa tiklanish va taraqqiyot bankiga Oʻzbekiston Respublikasi Vazirlar Mahkamasining tegishli komplekslari rahbarlari bilan kelishilgandan keyin Vazirlar Mahkamasining Tashqi iqtisodiy aloqalar va xorijiy investitsiyalar departamenti orqali yuboriladi.

5. Oʻzbekiston Respublikasi Makroiqtisodiyot va statistika vazirligi xalqaro moliyaviy tashkilotlar bilan hamkorlik doirasida amalga oshirilayotgan loyihalar tayyorlanishi va roʻyobga chiqarilishi jarayonini muvofiqlashtirish va nazorat qilish uchun vazirlikning markaziy apparati tuzilmasida 4 kishidan iborat monitoring guruhini tashkil etsin.

6. Bosh vazirning oʻrinbosari, Makroiqtisodiyot va statistika vaziri R.S.Azimov texnik koʻmak olish, shuningdek Oʻzbekiston Respublikasi Hukumati kafolati ostida moliyaviy koʻmak olish yuzasidan Yevropa tiklanish va taraqqiyot bankiga buyurtmanomalarni imzolashga vakil qilinsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S.Azimov zimmasiga yuklansin.