Elektr energetika tarmog‘iga to‘g‘ridan-to‘g‘ri xorijiy investitsiyalarni jalb etgan holda elektr energiyasini ishlab chiqarish quvvatlarini oshirish, aholini va iqtisodiyot tarmoqlarini energiya resurslari bilan barqaror ta’minlash maqsadida:

1. Quyidagilar:

a) O‘zbekiston Respublikasi Hukumati nomidan Investitsiyalar va tashqi savdo vazirligi “Nidro Enerji Elektrik Uretim Sanayi A.Ş.” (Turkiya Respublikasi) kompaniyasi (keyingi o‘rinlarda — Investor) bilan Xorazm viloyatida quvvati 174 MVt bo‘lgan gaz-porshenli elektr stansiyasini qurish investitsiya loyihasi (keyingi o‘rinlarda — Investitsiya loyihasi) amalga oshirilishi rejalashtirilganligi;

b) Investitsiya loyihasini amalga oshirish maqsadida Investor tomonidan “Odaş Enerji SA” MCHJ (keyingi o‘rinlarda — Loyiha kompaniyasi) tashkil etilganligi;

v) O‘zbekiston Respublikasi Hukumati nomidan Investitsiyalar va tashqi savdo vazirligi, Investor va Loyiha kompaniyasi o‘rtasida 2021-yil 4-martda investitsiya bitimi imzolanganligi (keyingi o‘rinlarda — Investitsiya bitimi) hamda unga muvofiq Investor va Loyiha kompaniyasi:

Xorazm viloyatida quvvati 174 MVt bo‘lgan gaz-porshenli elektr stansiyasini loyihalashtirishi, moliyalashtirishi, qurishi va 25 yil davomida ekspluatatsiya qilishi;

yuzaga kelishi mumkin bo‘lgan xavf-xatarlarni o‘z zimmasiga olgan holda, jami 105 mln AQSH dollari miqdorida to‘g‘ridan-to‘g‘ri xorijiy investitsiyalarni jalb etishi;

g) 2021-yil 4-martda “O‘zbekiston milliy elektr tarmoqlari” AJ va Loyiha kompaniyasi o‘rtasida Elektr energiyasini sotib olish to‘g‘risidagi bitim hamda 2024-yil 20-sentabrda “O‘zbekiston milliy elektr tarmoqlari” AJning ushbu bitimda belgilangan huquq va majburiyatlarini “O‘zenergosotish” AJga o‘tkazish orqali qayta rasmiylashtirish haqidagi qo‘shimcha bitim (keyingi o‘rinlarda — Elektr energiyasini sotib olish to‘g‘risidagi bitim) imzolanganligi va shunga muvofiq:

Loyiha kompaniyasi qurilish davridagi o‘z majburiyatlari lozim darajada bajarilishining ta’minoti sifatida 1,3 mln AQSH dollari miqdorida bank kafolatini taqdim etishi;

Loyiha kompaniyasi ishlab chiqarilgan elektr energiyasini kafolatlangan tarzda “O‘zenergosotish” AJ timsolida yagona xaridorga sotish majburiyatini olganligi;

“O‘zenergosotish” AJ Elektr energiyasini sotib olish to‘g‘risidagi bitim shartlariga muvofiq 25 yil davomida elektr energiyasini kafolatlangan tarzda xarid qilish majburiyatini olishi va elektr energiyasi uchun to‘lovni milliy valyutada amalga oshirishi;

“O‘zenergosotish” AJ elektr energiyasini uch oy mobaynida sotib olishni qoplash uchun majburiyatlar bajarilishining ta’minoti sifatida Loyiha kompaniyasi foydasiga chet el valyutasida imtiyozli, qoplanmaydigan shartsiz bank kafolati taqdim etishi ma’lumot uchun qabul qilinsin.

2. O‘zbekiston Respublikasi Hukumati nomidan Investitsiyalar va tashqi savdo vazirligi, Investor va Loyiha kompaniyasi o‘rtasida imzolangan Investitsiya bitimi tasdiqlansin.

Belgilansinki, Investitsiya bitimi unda ko‘rsatilgan shartlarga muvofiq kuchga kiradi.

3. Elektr energiyasini sotib olish to‘g‘risidagi bitim ma’qullansin.

4. Investitsiyalar va tashqi savdo vazirligi, “O‘zenergosotish” AJga:

Loyiha kompaniyasi tomonidan ishlab chiqariladigan elektr energiyasini uch oy mobaynida sotib olishni qoplash uchun majburiyatlar bajarilishining ta’minoti sifatida Loyiha kompaniyasi foydasiga “O‘zsanoatqurilishbank” ATBning chet el valyutasida tasdiqlangan, tiklanadigan, qaytarib berilmaydigan va shartsiz bank kafolatini taqdim etishga;

Investitsiya loyihasi ehtiyoji uchun tabiiy gaz yetkazib beruvchi sifatida ishtirok etishga hamda Investitsiya bitimi va Elektr energiyasini sotib olish to‘g‘risidagi bitimga muvofiq ushbu bitimlarning amal qilish muddati davomida O‘zbekiston Respublikasi hududida ishlab chiqarilgan elektr energiyasi narxlarini chet el valyutasiga bog‘lagan holda belgilashga ruxsat berilsin.

5. “O‘ztransgaz” AJ “O‘zenergosotish” AJ bilan Elektr energiyasini sotib olish to‘g‘risidagi bitimda ko‘zda tutilgan hajmlarga va parametrlarga muvofiq Loyiha kompaniyasiga tabiiy gaz yetkazib berish bo‘yicha shartnomalar imzolanishini ta’minlasin.

Bunda, “O‘ztransgaz” AJning aybi bilan tabiiy gaz yetkazib berilmasligi natijasida “O‘zenergosotish” AJ tomonidan Loyiha kompaniyasiga yetkazilgan zararlar, shu jumladan barcha turdagi jarima va boy berilgan foyda summalarini to‘lab berish majburiyati yuzasidan, agarda shartnomada boshqa shartlar ko‘rsatilmagan bo‘lsa, tabiiy gaz yetkazib beruvchilar “O‘zenergosotish” AJ oldida qonunchilik hujjatlariga muvofiq regress tartibida javobgar bo‘lishi belgilab qo‘yilsin.

6. Suv xo‘jaligi vazirligi Elektr energiyasini sotib olish to‘g‘risidagi bitimda ko‘zda tutilgan hajmlarga va parametrlarga muvofiq Loyiha kompaniyasiga texnik suv yetkazib berish bo‘yicha shartnomalar imzolanishini ta’minlasin.

7. Investitsiya loyihasini amalga oshirish doirasida Loyiha kompaniyasiga to‘lanishi lozim bo‘lgan barcha soliqlar va yig‘imlar amalga oshirilgan holda, xorijiy kreditorlarning loyihalarni moliyalashtirishda an’anaviy qo‘llaydigan riskni boshqarish talablariga muvofiq kredit mablag‘lari sarfini nazorat qilish, chet el valyutasidagi mablag‘larni olish va ulardan foydalanish uchun chet eldagi xorijiy banklarda bank hisobvaraqlarini ochishga hamda respublikada ochilgan bank hisobvaraqlaridan xorijda ochilgan bank hisobvaraqlariga Investitsiya loyihasi doirasida olingan kreditlarni qaytarish maqsadida pul mablag‘larini o‘tkazishga ruxsat berilsin.

8. Xorazm viloyati hokimligi bir oy muddatda Investitsiya bitimi va Elektr energiyasini sotib olish to‘g‘risidagi bitimda ko‘rsatilgan shartlarga mos keladigan yer uchastkasining Davlat aktivlarini boshqarish agentligiga doimiy foydalanish huquqi bilan ajratilishini ta’minlasin.

Davlat aktivlarini boshqarish agentligi mazkur bandga asosan ajratilgan yer uchastkasini Investitsiya loyihasini amalga oshirish muddatiga teng davrga Loyiha kompaniyasiga ijaraga berilishini ta’minlasin.

9. Adliya vazirligi Investitsiya loyihasini amalga oshirish doirasida Investitsiya bitimi qoidalariga muvofiq imzolangan bitimlar yuzasidan yuridik xulosalar bersin.

10. Ekologiya va atrof-muhitni muhofaza qilish davlat qo‘mitasi loyiha hujjatlari belgilangan tartibda davlat ekologiya ekspertizasidan o‘tkazilishini hamda Investitsiya loyihasini amalga oshirishda tabiatni muhofaza qilishga oid qonunchilikka rioya etilishini ta’minlasin.

11. Loyiha kompaniyasining talabnomalariga (buyurtmanomalariga) asosan:

Tashqi ishlar vazirligi Investitsiya loyihasini amalga oshirish doirasida jalb qilinadigan xorijiy mutaxassislar va ularning oila a’zolari uchun kirish vizalarini belgilangan tartibda rasmiylashtirilishini (muddati uzaytirilishini) ta’minlasin;

Ichki ishlar vazirligi Investitsiya loyihasini amalga oshirishda ishtirok etadigan xorijiy mutaxassislarga, shuningdek, ularning oila a’zolariga ko‘p martalik vizalar rasmiylashtirilishini, berilishini (muddati uzaytirilishini) hamda vaqtincha yashash joyi bo‘yicha vaqtinchalik ro‘yxatdan o‘tishini va uning muddati uzaytirilishini belgilangan tartibda ta’minlasin.

12. Mazkur qarorning ijrosini samarali tashkil etish hamda Loyiha kompaniyasiga talab etiladigan hajmlar va parametrlarda tabiiy gaz yetkazib berish uchun mas’ul va shaxsiy javobgar etib energetika vaziri A.S. Sultanov belgilansin.

Qaror ijrosini har chorakda muhokama qilib, ijro uchun mas’ul vazirlik va idoralar faoliyatini muvofiqlashtirish, nazorat qilish O‘zbekiston Respublikasi Bosh vazirining o‘rinbosari S.U. Umurzakov zimmasiga yuklansin.

Amalga oshirilayotgan chora-tadbirlar natijadorligi yuzasidan har chorak yakunida O‘zbekiston Respublikasi Prezidentiga axborot berib borilsin.