Ushbu Qonunning maqsadi fazoviy ma’lumotlar sohasidagi munosabatlarni tartibga solishdan iborat.

Fazoviy ma’lumotlar to‘g‘risidagi qonunchilik ushbu Qonun va boshqa qonunchilik hujjatlaridan iboratdir.

Agar O‘zbekiston Respublikasining xalqaro shartnomasida O‘zbekiston Respublikasining fazoviy ma’lumotlar to‘g‘risidagi qonunchiligida nazarda tutilganidan boshqacha qoidalar belgilangan bo‘lsa, xalqaro shartnoma qoidalari qo‘llaniladi.

Ushbu Qonunda quyidagi asosiy tushunchalar qo‘llaniladi:

fazoviy ma’lumotlar — fazoviy obyektlar to‘g‘risidagi, shu jumladan ularning joylashgan yeri, shakli va muayyan shaklda hamda fazoviy-vaqt koordinatalari tizimlarida taqdim etilgan boshqa xossalari haqidagi ma’lumotlarni o‘z ichiga olgan ma’lumotlar;

fazoviy ma’lumotlarga ishlov berish — fazoviy ma’lumotlar va metama’lumotlarni yaratish, yig‘ish, tizimlashtirish, saqlash, o‘zgartirish, yangilash, vizuallashtirish, ulardan foydalanish, ularni taqdim etish, tarqatish va uzatish bo‘yicha bir yoki bir nechta harakatlar yig‘indisini amalga oshirish;

metama’lumotlar — fazoviy ma’lumotlarning to‘plamlari, servislari va boshqa xususiyatlarini tavsiflash imkonini beradigan, ularni identifikatsiya qilish, izlash, inventarizatsiyalash va ulardan foydalanish uchun zarur bo‘lgan ma’lumotlar;

Fazoviy ma’lumotlar milliy infratuzilmasining geoportali — geoaxborot resurslari to‘g‘risidagi metama’lumotlarni saqlab turadigan va ulardan foydalanishni Internet jahon axborot tarmog‘i orqali ta’minlaydigan fazoviy ma’lumotlarning internet vositalari va servislarining majmuasi;

fazoviy ma’lumotlardan foydalanuvchi (bundan buyon matnda foydalanuvchi deb yuritiladi) — fazoviy ma’lumotlardan foydalanadigan jismoniy yoki yuridik shaxs;

fazoviy obyektlar — joylashgan yeri belgilangan fazoviy-vaqt koordinatalari tizimida aniqlanishi mumkin bo‘lgan tabiiy va sun’iy obyektlar.

Ushbu Qonunning asosiy prinsiplari quyidagilardan iborat:

qonuniylik;

fazoviy ma’lumotlarning aniqligi va ishonchliligi;

bazaviy fazoviy ma’lumotlarning ochiqligi va ulardan foydalana olish;

fazoviy ma’lumotlar va metama’lumotlarning himoyalanganligi.

Fazoviy ma’lumotlar sohasidagi munosabatlar O‘zbekiston Respublikasining Konstitutsiyasiga, ushbu Qonunga va boshqa qonunchilik hujjatlariga muvofiq amalga oshirilishi kerak.

Fazoviy ma’lumotlarning aniqligi va ishonchliligi:

davlat geodeziya, nivelir va gravimetriya tarmoqlarini ishlash holatida saqlab turish;

davlat topografik xaritalarini kartografik monitoring qilish va uzluksiz yangilab borish tizimini joriy etish;

tartibga solingan koordinatalar tizimlaridan va mavjud bazaviy fazoviy ma’lumotlardan davlat axborot resurslarini hamda yangi bazaviy fazoviy ma’lumotlarni yaratishda foydalanish;

bazaviy va sohaga oid fazoviy ma’lumotlar hamda metama’lumotlarning doimiy monitoringi, ilmiy-texnik ekspertizasi va nazoratini amalga oshirish hisobidan ta’minlanadi.

Bazaviy fazoviy ma’lumotlarning ochiqligi va ulardan foydalana olish:

bazaviy fazoviy ma’lumotlar tarkibida davlat sirlarini va qonun bilan qo‘riqlanadigan boshqa sirni, shuningdek foydalanilishi qonunchilikka muvofiq cheklangan boshqa axborotni tashkil etadigan ma’lumotlarning mavjud emasligi;

foydalanuvchilarga bazaviy fazoviy ma’lumotlardan erkin foydalanish, shu jumladan umumiy foydalanishdagi telekommunikatsiyalar tarmoqlari, shuningdek Internet jahon axborot tarmog‘i orqali foydalanish imkoniyatini berish hisobidan ta’minlanadi.

Fazoviy ma’lumotlar va metama’lumotlarga ishlov berish ularning himoyalanganligi yuzasidan qonunchilikda belgilangan talablarga muvofiq amalga oshirilishi kerak.

Fazoviy ma’lumotlar va metama’lumotlarni himoya qilish:

shaxs, jamiyat va davlat xavfsizligiga tahdidlarning oldini olish;

qonunchilikda belgilanadigan hollarda ushbu ma’lumotlarning maxfiyligini saqlash;

ularning buzilishi va soxtalashtirilishining oldini olish maqsadida amalga oshiriladi.

Fazoviy ma’lumotlar sohasidagi davlat siyosatining asosiy yo‘nalishlari quyidagilardan iborat:

fazoviy ma’lumotlar sohasidagi davlat dasturlarini va boshqa dasturlarni ishlab chiqish hamda amalga oshirish;

davlat va xo‘jalik boshqaruvi organlarining, mahalliy davlat hokimiyati organlarining, shuningdek fazoviy ma’lumotlarga ishlov berishni amalga oshiradigan shaxslarning fazoviy ma’lumotlar sohasidagi faoliyatini muvofiqlashtirish;

Fazoviy ma’lumotlar milliy infratuzilmasini rivojlantirish;

bazaviy fazoviy ma’lumotlarning, ular metama’lumotlarining barcha manfaatdor subyektlar uchun ochiqligini va ulardan foydalana olishni ta’minlash;

xalqaro hamkorlikni rivojlantirish.

O‘zbekiston Respublikasi Vazirlar Mahkamasi:

fazoviy ma’lumotlar sohasida yagona davlat siyosati amalga oshirilishini ta’minlaydi;

fazoviy ma’lumotlar sohasidagi davlat dasturlarini va boshqa dasturlarni tasdiqlaydi;

Fazoviy ma’lumotlar milliy infratuzilmasini yuritish tartibini tasdiqlaydi;

ommaviy foydalanish uchun ochiq bo‘lgan fazoviy ma’lumotlar ro‘yxatlarini belgilaydi;

Fazoviy ma’lumotlar milliy infratuzilmasini rivojlantirish bo‘yicha Muvofiqlashtiruvchi kengash to‘g‘risidagi nizomni va uning tarkibini tasdiqlaydi.

O‘zbekiston Respublikasi Vazirlar Mahkamasi qonunchilikka muvofiq boshqa vakolatlarni ham amalga oshirishi mumkin.

Kadastr agentligi fazoviy ma’lumotlar sohasidagi maxsus vakolatli davlat organidir (bundan buyon matnda maxsus vakolatli davlat organi deb yuritiladi).

Maxsus vakolatli davlat organi:

fazoviy ma’lumotlar sohasidagi yagona davlat siyosatini shakllantirish va amalga oshirishda ishtirok etadi;

fazoviy ma’lumotlar sohasidagi davlat dasturlari va boshqa dasturlar loyihalarini ishlab chiqadi hamda O‘zbekiston Respublikasi Vazirlar Mahkamasiga kiritadi;

respublika ijro etuvchi hokimiyat organlarining, xo‘jalik boshqaruvi organlarining, mahalliy ijro etuvchi hokimiyat organlarining, shuningdek fazoviy ma’lumotlarga ishlov berishni amalga oshiradigan shaxslarning fazoviy ma’lumotlar hamda Fazoviy ma’lumotlar milliy infratuzilmasini rivojlantirish sohasidagi faoliyatini muvofiqlashtiradi;

fazoviy ma’lumotlar sohasidagi davlat dasturlarining va boshqa dasturlarning amalga oshirilishini ta’minlaydi;

Fazoviy ma’lumotlar milliy infratuzilmasini rivojlantirish bilan bog‘liq ishlarning bajarilishini ta’minlaydi;

bazaviy fazoviy ma’lumotlarga ishlov berishni, Fazoviy ma’lumotlar milliy infratuzilmasining geoportalini yaratishga va uning faoliyat ko‘rsatishiga doir ishlarni amalga oshiradi;

ilmiy-tadqiqot, tajriba-konstruktorlik va tajriba-texnologik ishlarni bajaradi, fazoviy ma’lumotlar sohasida texnik va dasturiy vositalar yaratilishini ta’minlaydi;

o‘z vakolatlari doirasida normativ-huquqiy hujjatlarni va texnik jihatdan tartibga solish sohasidagi normativ hujjatlarni ishlab chiqadi va tasdiqlaydi;

fazoviy ma’lumotlarga ishlov berish jarayonlari ustidan davlat nazoratini amalga oshiradi;

fazoviy ma’lumotlar sohasida xalqaro hamkorlikni amalga oshiradi.

Maxsus vakolatli davlat organi qonunchilikka muvofiq boshqa vakolatlarni ham amalga oshirishi mumkin.

O‘zbekiston Respublikasi Mudofaa vazirligi:

fazoviy ma’lumotlar sohasidagi yagona davlat siyosatini shakllantirish va amalga oshirishda ishtirok etadi;

fazoviy ma’lumotlar sohasidagi davlat dasturlarini va boshqa dasturlarni ishlab chiqish hamda amalga oshirishda ishtirok etadi;

maxsus vakolatli davlat organi, shuningdek boshqa davlat organlari va fazoviy ma’lumotlarga ishlov berishni amalga oshiradigan shaxslar bilan hamkorlikda qonunchilikka muvofiq milliy xavfsizlikni hamda davlat mudofaasini ta’minlash maqsadida fazoviy ma’lumotlarni yaratishni, Fazoviy ma’lumotlar milliy infratuzilmasining texnik va dasturiy vositalarini ishlab chiqishni tashkil etadi;

Fazoviy ma’lumotlar milliy infratuzilmasini rivojlantirish bilan bog‘liq ishlarda ishtirok etadi.

O‘zbekiston Respublikasi Mudofaa vazirligi qonunchilikka muvofiq boshqa vakolatlarni ham amalga oshirishi mumkin.

Davlat organlari, shu jumladan mahalliy ijro etuvchi hokimiyat organlari:

fazoviy ma’lumotlar sohasidagi yagona davlat siyosatini shakllantirishga doir takliflarni ishlab chiqish va kiritishda ishtirok etadi hamda uning amalga oshirilishini ta’minlaydi;

fazoviy ma’lumotlar sohasidagi davlat dasturlarini va boshqa dasturlarni ishlab chiqish hamda amalga oshirishda ishtirok etadi;

Fazoviy ma’lumotlar milliy infratuzilmasini rivojlantirish bilan bog‘liq ishlarda ishtirok etadi;

maxsus vakolatli davlat organi bilan hamkorlikda tegishli tarmoq uchun sohaga oid fazoviy ma’lumotlar ishlab chiqilishini hamda tarmoqqa oid geoaxborot resurslarini ishlab chiqishga va Fazoviy ma’lumotlar milliy infratuzilmasining geoportallarini yaratish hamda saqlab turishga doir ishlarning bajarilishini tashkil etadi;

bazaviy fazoviy ma’lumotlarning va metama’lumotlarning maxsus vakolatli davlat organiga taqdim etilishini ta’minlaydi;

sohaga oid ochiq fazoviy ma’lumotlardan foydalanilishini ta’minlaydi;

tegishli tarmoq yoki hudud uchun sohaga oid fazoviy ma’lumotlarga ishlov berilishini amalga oshiradi.

Davlat organlari qonunchilikka muvofiq boshqa vakolatlarni ham amalga oshirishi mumkin.

Ushbu Qonunda Fazoviy ma’lumotlar milliy infratuzilmasi deganda tashkiliy tuzilmani, ilmiy-texnika siyosatini, texnik va dasturiy vositalarni, bazaviy va sohaga oid fazoviy ma’lumotlarni, metama’lumotlarni hamda metama’lumotlar bazalarini, fazoviy ma’lumotlar servislarini, normativ-huquqiy hujjatlarni, shuningdek O‘zbekiston Respublikasi hududida foydalanilishi mumkin bo‘lgan fazoviy ma’lumotlarni ishlab chiqish, yangilash, ularga ishlov berish va integratsiyalash masalalari bo‘yicha texnik jihatdan tartibga solish sohasidagi normativ hujjatlarni o‘z ichiga oladigan tizim tushuniladi.

Fazoviy ma’lumotlar milliy infratuzilmasini yuritish tartibi:

Fazoviy ma’lumotlar milliy infratuzilmasining fazoviy ma’lumotlariga va metama’lumotlariga ishlov berish tartibini;

maxsus vakolatli davlat organining fazoviy ma’lumotlar sohasidagi faoliyati tartibini;

fazoviy ma’lumotlarga ishlov berishni amalga oshiradigan shaxslarning maxsus vakolatli davlat organi bilan hamkorlik qilish tartibini;

ishlov berilishi tegishli davlat organlari hamda fazoviy ma’lumotlarga ishlov berishni amalga oshiradigan shaxslar tomonidan tashkil etiladigan bazaviy va sohaga oid fazoviy ma’lumotlar turlarini;

Fazoviy ma’lumotlar milliy infratuzilmasi fazoviy ma’lumotlarining, metama’lumotlarining, texnik va dasturiy vositalarining operatsiyaviy jihatdan mosligini ta’minlovchi talablarni;

Fazoviy ma’lumotlar milliy infratuzilmasini rivojlantirishga doir ishlarning holati haqidagi har yilgi hisobotning tuzilishini, mazmunini, uni tayyorlash tartibini va hisobotni O‘zbekiston Respublikasi Vazirlar Mahkamasiga taqdim etish muddatlarini belgilaydigan qoidalarni o‘z ichiga oladi.

Maxsus vakolatli davlat organi tomonidan Fazoviy ma’lumotlar milliy infratuzilmasi tarkibida Fazoviy ma’lumotlar milliy infratuzilmasining geoportallari tarmog‘i yaratiladi va uning fazoviy ma’lumotlarning quyidagi servislari bilan faoliyat ko‘rsatishi ta’minlanadi:

axborot tarmoqlaridagi fazoviy ma’lumotlarni va fazoviy ma’lumotlar servislarini aniqlashni ta’minlaydigan qidiruv;

fazoviy ma’lumotlarni, geofazoviy obyektlarning xususiyatlari va metama’lumotlarning mazmuni to‘g‘risidagi axborotni ko‘rib chiqish;

fazoviy ma’lumotlarga ishlov berish imkoniyatini va (yoki) ularning ko‘chirma nusxalarini olishni ta’minlashga doir foydalanish;

fazoviy ma’lumotlar koordinatalarini bir koordinatalar tizimidan yoki kartografik proyeksiyadan boshqasiga o‘zgartirishni ta’minlaydigan koordinatalar operatsiyalari.

Fazoviy ma’lumotlar milliy infratuzilmasining geoportallari tarmog‘i Fazoviy ma’lumotlar milliy infratuzilmasining geoportalini va davlat organlarining geoportallarini o‘z ichiga oladi.

Fazoviy ma’lumotlar milliy infratuzilmasining geoportaliga ushbu Qonunga muvofiq taqdim etiladigan bazaviy va sohaga oid fazoviy ma’lumotlar, metama’lumotlar joylashtiriladi.

Davlat organlarining geoportallariga davlat organlari tomonidan tarmoqqa oid vazifalarni amalga oshirish uchun yaratilgan sohaga oid fazoviy ma’lumotlar va metama’lumotlar joylashtiriladi.

Fazoviy ma’lumotlar milliy infratuzilmasini rivojlantirishga doir faoliyatning muvofiqlashtirilishini ta’minlash maqsadida maxsus vakolatli davlat organi huzurida Fazoviy ma’lumotlar milliy infratuzilmasini rivojlantirish bo‘yicha Muvofiqlashtiruvchi kengash (bundan buyon matnda Muvofiqlashtiruvchi kengash deb yuritiladi) tashkil etiladi.

Muvofiqlashtiruvchi kengash yuridik shaxs maqomiga ega bo‘lmagan kollegial organdir.

Muvofiqlashtiruvchi kengash fazoviy ma’lumotlar sohasidagi davlat siyosatini amalga oshirishda maslahat-kengashuv vazifasini amalga oshiradi.

Muvofiqlashtiruvchi kengash davlat organlari, ilmiy-tadqiqot va oliy ta’lim tashkilotlari hamda fuqarolik jamiyati institutlari vakillaridan iborat bo‘ladi.

Fazoviy ma’lumotlar sohasidagi ishlar quyidagi turlarga bo‘linadi:

fazoviy ma’lumotlarni va metama’lumotlarni yaratish, yig‘ish, tizimlashtirish, saqlash, o‘zgartirish, yangilash, vizuallashtirish, ulardan foydalanish, ularni taqdim etish, tarqatish va uzatish;

turli maqsadlarga mo‘ljallangan fazoviy ma’lumotlar va geoaxborot tizimlari servislarini ishlab chiqish hamda taqdim etish;

fazoviy ma’lumotlarga ishlov berish uchun foydalaniladigan texnik va dasturiy vositalarni yaratish;

geoportallarni yaratish va ularning faoliyat ko‘rsatishini ta’minlash;

fazoviy ma’lumotlarning va metama’lumotlarning sifatini ilmiy-texnik ekspertizadan o‘tkazish;

fazoviy ma’lumotlar bazalarini, metama’lumotlar bazalari va kataloglarini, fazoviy ma’lumotlar servislarini, geoaxborot tizimlarini, geoportallarni, fazoviy ma’lumotlar sohasidagi boshqa texnik va dasturiy vositalarni yaratish bo‘yicha ilmiy-tadqiqot, tajriba-texnologik hamda tajriba-konstruktorlik ishlarini bajarish;

normativ-huquqiy hujjatlar va texnik jihatdan tartibga solish sohasidagi normativ hujjatlarni ishlab chiqish;

Fazoviy ma’lumotlar milliy infratuzilmasining faoliyat ko‘rsatishini hamda rivojlantirilishini ta’minlash maqsadida boshqa mahsulotni yaratish va (yoki) boshqa ishlarni bajarish.

Fazoviy ma’lumotlarga ishlov berish O‘zbekiston Respublikasida foydalanish uchun qabul qilingan koordinatalar tizimlarida Fazoviy ma’lumotlar milliy infratuzilmasini yuritish tartibiga muvofiq amalga oshiriladi.

Fazoviy ma’lumotlar bazaviy va sohaga oid fazoviy ma’lumotlarga bo‘linadi.

Hamma foydalana oladigan, fazoviy ma’lumotlarga ishlov berish jarayonlari uchun birxillashtirilgan raqamli koordinata-fazoviy asosni tashkil etadigan fazoviy ma’lumotlar bazaviy fazoviy ma’lumotlardir.

Bazaviy fazoviy ma’lumotlar quyidagi obyektlar haqidagi ma’lumotlarni o‘z ichiga oladi:

geodeziya, nivelir va gravimetriya tarmoqlarining punktlari;

O‘zbekiston Respublikasining Davlat chegarasi, ma’muriy-hududiy birliklarning chegaralari;

gidrografik obyektlar va gidrotexnika inshootlari;

aholi punktlari va ularning ko‘cha-yo‘l tarmog‘i;

sanoat, qishloq xo‘jaligi obyektlari va ijtimoiy-madaniy obyektlar;

binolar va inshootlar;

avtomobil yo‘llari;

temir yo‘llar;

magistral quvurlar;

muhandislik kommunikatsiyalari;

aeroportlar, daryo bandargohlari;

o‘simlik qoplami va tuproqlar;

yer uchastkalarining chegaralari;

muhofaza etiladigan tabiiy hududlar va madaniy meros obyektlari;

aholi punktlarining chegaralari va zonalashtirish obyektlari, shuningdek shahar atrofidagi zonalar;

muhofaza etiladigan zonalar hamda hududlardan foydalanishning alohida shartlariga ega bo‘lgan zonalar;

aholi punktlari hududidagi va undan tashqaridagi ko‘chalarning reyestrlari hamda obyektlarning manzillari;

geografik obyektlarning nomlari;

joy relyefi;

ortofotoxaritalar, aero- va kosmik suratlar hamda Yerni masofadan turib zond bilan tekshirishga doir ishlarning natijalari.

Bazaviy fazoviy ma’lumotlarda davlat sirlarini va qonun bilan qo‘riqlanadigan boshqa sirni, shuningdek foydalanilishi qonunchilikka muvofiq cheklangan boshqa axborotni tashkil etadigan ma’lumotlar bo‘lmasligi kerak.

Bazaviy fazoviy ma’lumotlar asosida yaratiladigan mavzuga oid fazoviy ma’lumotlar sohaga oid fazoviy ma’lumotlardir.

Bazaviy va sohaga oid fazoviy ma’lumotlarga, ularning tarkibi va mazmuniga, ularning metama’lumotlariga doir talablar Fazoviy ma’lumotlar milliy infratuzilmasini yuritish tartibiga muvofiq hamda boshqa hujjatlarda belgilanadi.

Metama’lumotlar fazoviy ma’lumotlar hamda fazoviy ma’lumotlar servislarining tarkibi, tuzilmasi, sifati, ishonchliligi, hududiy qamrovi, vazifalari, ulardan foydalanish, foydalanishni cheklash shartlari, fazoviy ma’lumotlarni ishlab chiqaruvchi, ularning yaratilish vaqti, ularni yangilash davriyligi to‘g‘risidagi axborotni o‘z ichiga oladi hamda boshqa axborotni ham o‘z ichiga olishi mumkin.

Davlat organlarining buyurtmasiga ko‘ra yaratilgan fazoviy ma’lumotlar davlat mulki hamda Fazoviy ma’lumotlar milliy infratuzilmasining tarkibiy qismidir.

Fazoviy ma’lumotlar va metama’lumotlar davlat organlariga o‘z vakolatlarini amalga oshirishi uchun — beg‘araz asosda, boshqa foydalanuvchilarga esa — maxsus vakolatli davlat organi tomonidan O‘zbekiston Respublikasi Moliya vazirligi bilan kelishilgan holda belgilanadigan miqdorlardagi haq evaziga taqdim etiladi.

Davlat organlari, fazoviy ma’lumotlarga ishlov berishni amalga oshiradigan shaxslar Fazoviy ma’lumotlar milliy infratuzilmasini yuritish tartibiga muvofiq fazoviy ma’lumotlardan va metama’lumotlardan foydalanishni cheklashi mumkin.

Bazaviy fazoviy ma’lumotlar foydalanuvchilarga Fazoviy ma’lumotlar milliy infratuzilmasining geoportali servislaridan, “Elektron hukumat” tizimining idoralararo integratsiyalashgan platformasidan foydalangan holda yoxud Fazoviy ma’lumotlar milliy infratuzilmasini yuritish tartibiga hamda maxsus vakolatli davlat organi bilan kelishuvga muvofiq uzatish yo‘li bilan taqdim etilishi mumkin.

Davlat organlari va fazoviy ma’lumotlarga ishlov berishni amalga oshiradigan shaxslar o‘zlari yaratgan va yangilagan bazaviy fazoviy ma’lumotlarni maxsus vakolatli davlat organiga taqdim etishi shart.

Fazoviy ma’lumotlar milliy infratuzilmasini yuritish tartibiga muvofiq tegishli bazaviy fazoviy ma’lumotlarga ishlov berish uchun javobgar bo‘lgan davlat organlari bazaviy fazoviy ma’lumotlarni maxsus vakolatli davlat organiga:

fazoviy ma’lumotlarning servislaridan foydalanish imkoniyatini berish;

kelishilgan formatda va sifatda fazoviy ma’lumotlarni uzatish yo‘li bilan taqdim etadi.

Maxsus vakolatli davlat organi:

bazaviy fazoviy ma’lumotlarni, shuningdek metama’lumotlarni qabul qilib olish va nazorat qilish hamda ularni Fazoviy ma’lumotlar milliy infratuzilmasining geoportaliga joylashtirishni;

geoaxborot tizimlarida, resurslar va ma’lumotlar bazalarida mavjud bo‘lgan, davlat xizmatlari ko‘rsatish uchun zarur axborotni va ma’lumotlarni “Elektron hukumat” tizimining idoralararo integratsiyalashgan platformasiga taqdim etishni;

Fazoviy ma’lumotlar milliy infratuzilmasining dasturiy ta’minotini ishlab chiqish va joriy etishni;

Fazoviy ma’lumotlar milliy infratuzilmasining texnik va texnologik ta’minotini;

Fazoviy ma’lumotlar milliy infratuzilmasi ma’lumotlarini saqlashni va himoya qilishni;

fazoviy ma’lumotlar servislari yaratilishini va ularga xizmat ko‘rsatilishini ta’minlashni;

foydalanuvchilarning Fazoviy ma’lumotlar milliy infratuzilmasi geoportaliga joylashtirilgan fazoviy ma’lumotlar va metama’lumotlardan foydalanishini ta’minlashni amalga oshiradi.

Maxsus vakolatli davlat organi fazoviy ma’lumotlar mulkdorining yoki egasining roziligi bilan:

qog‘ozdagi fazoviy ma’lumotlarni elektron shaklga o‘zgartirishni amalga oshiradi;

fazoviy ma’lumotlarga, shu jumladan bazaviy va sohaga oid fazoviy ma’lumotlarga hamda ularning metama’lumotlariga ishlov berishni amalga oshiradi;

foydalanuvchilarga bazaviy fazoviy ma’lumotlarni va metama’lumotlarni Fazoviy ma’lumotlar milliy infratuzilmasini yuritish tartibiga muvofiq taqdim etadi.

Davlat organlari, shuningdek fazoviy ma’lumotlarga ishlov berishni amalga oshiradigan shaxslar:

fazoviy ma’lumotlarga va metama’lumotlarga ishlov berilishini ta’minlaydi;

o‘z vakolatlarini amalga oshirish uchun fazoviy ma’lumotlardan va metama’lumotlardan foydalanadi;

fazoviy ma’lumotlarning va metama’lumotlarning qonuniyligini, aniqligi, ishonchliligi va himoyalanganligini, shuningdek bazaviy fazoviy ma’lumotlarning ochiqligini hamda ulardan foydalana olishni ta’minlaydi;

fazoviy ma’lumotlarning va metama’lumotlarning maxsus vakolatli davlat organiga taqdim etilishini ta’minlaydi;

o‘z fazoviy ma’lumotlari va metama’lumotlaridan maxsus vakolatli davlat organining foydalanishini ta’minlaydi;

o‘z rasmiy veb-saytlariga Fazoviy ma’lumotlar milliy infratuzilmasining geoportali orqali fazoviy ma’lumotlardan foydalanish shartlari haqidagi axborotni joylashtiradi.

Fazoviy ma’lumotlar sohasida yuzaga keladigan nizolar qonunchilikda belgilangan tartibda hal etiladi.

Fazoviy ma’lumotlar to‘g‘risidagi qonunchilikni buzganlikda aybdor shaxslar belgilangan tartibda javobgar bo‘ladi.

O‘zbekiston Respublikasi Davlat soliq qo‘mitasi huzuridagi Kadastr agentligi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi o‘rtasida tushuntirilishini ta’minlasin.

O‘zbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

davlat boshqaruvi organlari ushbu Qonunga zid bo‘lgan o‘z normativ-huquqiy hujjatlarini qayta ko‘rib chiqishlari va bekor qilishlarini ta’minlasin.

Ushbu Qonun rasmiy e’lon qilingan kundan e’tiboran uch oy o‘tgach kuchga kiradi.