Respublikada oliy ta’limning talab yuqori bo‘lgan yo‘nalishlarida o‘qitishni hududlarda tashkil etish, yoshlarning oliy ta’lim bilan qamrovini oshirish, talabalarni o‘qishga qabul qilish jarayonida shaffoflikni ta’minlash, yuqori malakali mutaxassislar tayyorlash sifatini oshirish, ta’lim jarayoniga raqamli va pedagogik texnologiyalar hamda zamonaviy usullarni keng joriy etishga alohida e’tibor qaratilmoqda.

Shu munosabat bilan Vazirlar Mahkamasining “2020 — 2022-yillarda Samarqand viloyatining Kattaqo‘rg‘on shahrini ijtimoiy-iqtisodiy rivojlantirish va kambag‘allikni qisqartirish chora-tadbirlari to‘g‘risida” 2020-yil 23-sentabrdagi 580-son qarorida belgilangan vazifalardan kelib chiqib, Samarqand viloyatida yuqori malakali kadrlar tayyorlash tizimini kengaytirish va yanada takomillashtirish maqsadida Vazirlar Mahkamasi qaror qiladi:

1. O‘zbekiston Respublikasi Oliy va o‘rta maxsus ta’lim vazirligi, Iqtisodiy taraqqiyot va kambag‘allikni qisqartirish vazirligi hamda Samarqand viloyati hokimligining Samarqand viloyati Kattaqo‘rg‘on shahrida Samarqand davlat universitetining Kattaqo‘rg‘on filialini (keyingi o‘rinlarda — Filial) tashkil etish to‘g‘risidagi taklifiga rozilik berilsin.

2. Quyidagilar Filialning asosiy vazifalari etib belgilansin:

hududda pedagogika, iqtisodiyot, transport logistikasi sohalarining rivojlanish istiqbollari va ustuvor vazifalarini, shuningdek, zamonaviy texnika hamda texnologiyalarning rivojlanish tendensiyalarini hisobga olgan holda ehtiyoj yuqori bo‘lgan mutaxassisliklar bo‘yicha amaliy ko‘nikmalarni egallagan professional oliy ma’lumotli kadrlarni tayyorlash;

xorijiy yetakchi va nufuzli oliy ta’lim muassasalarining ilg‘or tajribasini tatbiq etish asosida malaka talablari, o‘quv rejalari va fan dasturlarini ishlab chiqish, o‘quv va ilmiy-metodik ta’minotni takomillashtirish va amaliyotga joriy etish;

ta’lim jarayoniga raqamli texnologiyalarni joriy etish, zamonaviy axborot-kommunikatsiya va ta’lim texnologiyalarining mustahkam integratsiyasini ta’minlash;

tegishli soha yo‘nalishlari bo‘yicha kadrlar malakasini oshirish va ularni qayta tayyorlash, ijtimoiy va iqtisodiy muammolarni hal etishga qaratilgan innovatsion tadqiqotlarni faol rivojlantirish;

respublika va xorijiy oliy ta’lim muassasalari hamda ilmiy markazlarga iqtidorli yosh bitiruvchilarni magistratura va doktoranturaga muntazam yuborish orqali Filial ilmiy-pedagogik salohiyatini oshirib borish;

zamonaviy bilim va ko‘nikmalarga ega yuqori malakali mutaxassislar tayyorlash jarayoniga ilg‘or ta’lim texnologiyalari, shu jumladan masofaviy o‘qitish uslublarini joriy etish;

Filialning mintaqa va xalqaro miqyosdagi nufuzini oshirish maqsadida xorijiy fuqarolar uchun ta’lim olish imkoniyatini kengaytirish va ilg‘or xalqaro tajribani tatbiq etish.

3. Belgilansinki:

Filial Samarqand davlat universitetining yuridik shaxs maqomiga ega bo‘lgan tarkibiy bo‘linmasi hisoblanadi, O‘zbekiston Respublikasi Davlat gerbi tasviri tushirilgan va o‘z nomi davlat tilida yozilgan muhrga va blankalarga, mustaqil balansga hamda O‘zbekiston Respublikasi Moliya vazirligining G‘aznachiligida shaxsiy g‘azna hisobvaraqlariga ega bo‘ladi;

Filialda ta’lim faoliyati 2021/2022 o‘quv yilidan boshlanadi;

Filialga talabalarni bakalavriat ta’lim yo‘nalishlari va magistratura mutaxassisliklari bo‘yicha davlat granti va to‘lov-kontrakt asosida teng ulushda qabul qilish soni har yili belgilangan tartibda tasdiqlanadigan respublika oliy ta’lim muassasalariga o‘qishga qabul qilish parametrlaridan kelib chiqqan holda belgilanadi;

Filial Samarqand viloyatining Kattaqo‘rg‘on, Narpay, Paxtachi, Ishtixon va Nurobod tumanlaridagi umumta’lim maktablari, o‘rta maxsus ta’lim muassasalarida tegishli fanlardan dars mashg‘ulotlarini olib boruvchi o‘qituvchilarga doimiy ravishda ilmiy-metodik yordam ko‘rsatib boradi;

Filialning pedagogik va ilmiy salohiyatini oshirish, ta’lim jarayonini sifatli tashkil etish uchun yuqori malakali mutaxassislarni jalb qilish maqsadida, shuningdek, joylashuv hududini inobatga olib, Filial professor-o‘qituvchilari va xodimlariga mehnatga haq to‘lashda mos ravishda yagona tarif setkasi razryadlariga ko‘ra tarif koeffitsiyentlari va bazaviy lavozim maoshlari 1,4 baravar miqdorda hisoblanadi.

4. O‘zbekiston Respublikasi Oliy va o‘rta maxsus ta’lim vazirligi 2021-yil 1-iyulga qadar:

Filial tuzilmasi oliy ta’lim muassasalari uchun belgilangan normativlarga muvofiq tasdiqlanishini ta’minlasin;

Filial ustavini belgilangan tartibda tasdiqlasin va uni davlat ro‘yxatidan o‘tkazish choralarini ko‘rsin;

Filialni tanlov asosida, shu jumladan respublika oliy ta’lim muassasalarida faoliyat yuritayotgan amaliy tajribaga ega bo‘lgan yuqori malakali professor-o‘qituvchilar bilan ta’minlasin;

Filialda o‘quv-metodik jarayonning tashkil etilishi yuzasidan zarur chora-tadbirlarni amalga oshirsin;

belgilangan tartibda Filialning shtatlar jadvali va xarajatlar smetasi tasdiqlanishini va ro‘yxatdan o‘tkazilishini ta’minlasin;

Filial axborot-resurs markazini qo‘shimcha o‘quv, ilmiy va badiiy adabiyotlar bilan ta’minlash choralarini ko‘rsin.

5. Respublika oliy ta’lim tizimidagi mavqeyi, ilmiy salohiyati, uzoq yillar davomida shakllangan an’analarini inobatga olgan holda, Samarqand davlat universiteti Filialga quyidagi yo‘nalishlarda ko‘mak berib borsin:

salohiyatli kadrlarni jalb etgan holda ta’lim va ilmiy faoliyatni sifatli tashkil etish;

ta’lim, tarbiya, ilmiy va metodik jarayonlarni samarali boshqarish;

ta’lim jarayoniga zamonaviy pedagogik texnologiyalarni joriy etish;

darslik, o‘quv qo‘llanmalari, o‘quv-metodik materiallar va axborot resurslari bilan ta’minlash;

professor-o‘qituvchilarning malakasini oshirish va iqtidorli yoshlar seleksiyasini amalga oshirish;

ilmiy-tadqiqot ishlari uchun qo‘shimcha sharoitlar yaratish va ilmiy maktablarni rivojlantirish.

6. O‘zbekiston Respublikasi Oliy va o‘rta maxsus ta’lim vazirligi, Iqtisodiy taraqqiyot va kambag‘allikni qisqartirish vazirligi, Innovatsion rivojlanish vazirligi Filialni salohiyatli professor-o‘qituvchilar bilan ta’minlash maqsadida respublikaning yetakchi oliy ta’lim muassasalarida tegishli sohalar bo‘yicha 2021/2022 o‘quv yilidan boshlab magistraturada va 2022-yildan boshlab tayanch doktoranturada kadrlarni maqsadli tayyorlash choralarini ko‘rsin.

7. Samarqand viloyati, Kattaqo‘rg‘on shahar, Amir Temur ko‘chasi, 27-uy manzilida joylashgan sobiq Samarqand davlat chet tillar instituti huzuridagi 2-son akademik litseyining bino va inshootlari Filialga operativ boshqaruv huquqi asosida bepul berilsin.

8. Filial faoliyatini moliyalashtirish manbalari etib O‘zbekiston Respublikasi Davlat budjeti mablag‘lari, talabalarning to‘lov-kontrakt asosida ta’lim olishidan, xo‘jalik faoliyati va shartnomalar asosida xizmat ko‘rsatishdan tushadigan mablag‘lar, xalqaro moliya tashkilotlarning grantlari, jismoniy va yuridik shaxslarning homiylik xayriyalari, shuningdek, qonunchilik hujjatlari bilan taqiqlanmagan boshqa manbalar belgilansin.

9. O‘zbekiston Respublikasi Iqtisodiy taraqqiyot va kambag‘allikni qisqartirish vazirligi manfaatdor vazirliklar va idoralar bilan birgalikda Oliy va o‘rta maxsus ta’lim vazirligi tomonidan taqdim etilgan asoslangan hisob-kitoblarga binoan tasdiqlangan loyiha-smeta hujjatlariga muvofiq Filial uchun qo‘shimcha o‘quv binosi, 2 ta talabalar turar joyi binolari, sport inshootini qurish hamda mavjud bino va inshootlarini rekonstruksiya qilish, kapital ta’mirlash hamda jihozlash loyihalarini 2022-yil hamda keyingi yillarga mo‘ljallangan O‘zbekiston Respublikasining ijtimoiy va ishlab chiqarish infratuzilmasini rivojlantirish dasturiga belgilangan tartibda kiritilishini ta’minlasin.

10. Belgilab qo‘yilsinki:

mazkur qarorda nazarda tutilgan xarajatlarni moliyalashtirish 2021-yilda O‘zbekiston Respublikasining respublika budjetidan birinchi darajali budjet mablag‘larini taqsimlovchi sifatida O‘zbekiston Respublikasi Oliy va o‘rta maxsus ta’lim vazirligiga ajratiladigan mablag‘lar doirasida, 2022-yildan boshlab esa O‘zbekiston Respublikasi Davlat budjeti parametrlarida nazarda tutiladi;

Filialning boshlang‘ich faoliyatini samarali tashkil etish maqsadida unga ajratilgan bino va inshootlarni joriy ta’mirlash va jihozlash (mebel, kompyuter texnikasi, o‘quv adabiyotlari va boshqa moddiy-texnika vositalarini xarid qilish) ishlari Samarqand davlat universitetining budjetdan tashqari mablag‘lari hamda O‘zbekiston Respublikasi Oliy va o‘rta maxsus ta’lim vazirligining Oliy ta’lim muassasalarini rivojlantirish jamg‘armasi mablag‘lari hisobiga qoplanadi;

Filialda qo‘shimcha sport inshootlari barpo etilguniga qadar Filial talabalari, shu jumladan sport faoliyati bakalavriat ta’lim yo‘nalishida ta’lim oluvchilarning sport mashg‘ulotlari Kattaqo‘rg‘on shahar bolalar va o‘smirlar sport maktabining bazasida bepul amalga oshiriladi.

11. O‘zbekiston Respublikasi Oliy va o‘rta maxsus ta’lim vazirligi Axborot texnologiyalari va kommunikatsiyalarini rivojlantirish vazirligi bilan birgalikda respublikadagi yetakchi oliy ta’lim muassasalari tomonidan ularning yuqori malakali professor-o‘qituvchilarini jalb qilgan holda Filialda onlayn ma’ruza o‘tkazish hamda masofaviy ta’lim texnologiyalarini joriy etish uchun uch oy muddatda belgilangan tartibda telekommunikatsiya jihozlari va infratuzilma bilan ta’minlash, shuningdek, Filialni yuqori tezlikdagi Internet jahon axborot tarmog‘i hamda “Elektron ta’lim” milliy tarmog‘iga ulash choralarini ko‘rsin.

12. Samarqand viloyati hokimligi Filial faoliyatini samarali tashkil etish maqsadida faoliyat yuritish uchun jalb etiladigan malakali professor-o‘qituvchilarni belgilangan tartibda xizmat uylari bilan ta’minlasin.

13. Filialga 2 ta, shu jumladan 1 ta xizmat va 1 ta navbatchi yengil avtotransport vositalarini saqlash uchun limit ajratilsin.

14. O‘zbekiston Respublikasi Oliy va o‘rta maxsus ta’lim vazirligi manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

15. Mazkur qarorning bajarilishini nazorat qilish O‘zbekiston Respublikasi Bosh vazirining ijtimoiy rivojlantirish masalalari bo‘yicha o‘rinbosari B.A. Musayev, O‘zbekiston Respublikasi oliy va o‘rta maxsus ta’lim vaziri A.X. Toshkulov hamda Samarqand viloyati hokimi E.O. Turdimov zimmasiga yuklansin.