Harakatdagi va harakatsiz obyektlarning turgan joyini va holatini doimiy ravishda radiolashtirilgan nazorat qilish yo‘li bilan xalq xo‘jaligi tarmoqlarining vazifalarini shoshilinch hal etishni ta’minlash maqsadida Vazirlar Mahkamasi qaror qiladi:

1. Toshkent shahar hokimligining “O‘zistiqbolstat” davlat qo‘mitasi va O‘zbekiston Respublikasi Moliya vazirligi bilan kelishilgan yer usti jamoat transporti ishiga “Peleng” elektron-axborot tizimini davlat markazlashtirilgan sarmoya mablag‘lari hisobidan joriy etishni Toshkent shahar hokimligi kapital qurilishining 1996-1997-yillardagi aniq manzilli dasturiga kiritish to‘g‘risidagi taklifi qabul qilinsin.

2. “Peleng” tizimini joriy etish bo‘yicha vazifalar quyidagi tartibda taqsimlansin:

Toshkent shahar hokimligiga “Peleng” tizimi buyurtmachisi funksiyasi yuklatilsin;

Toshkent shahar hokimligi huzuridagi “Sietl” ilmiy-texnika ishlab chiqarish firmasi bosh pudratchi etib belgilansin, unga boshqa loyihalash va ishlab chiqarish tashkilotlari va korxonalarini ishga jalb etish huquqi berilsin.

3. Toshkent shahar hokimligi:

1995-yil dekabr oyida ularni nazorat qilish birinchi navbatda “Peleng” tizimi orqali amalga oshiriladigan transport vositalarining turlari va sonini, ular joylashgan joyni surash davriyligini va harakat yo‘nalishlarini ko‘rsatgan holda texnik vazifani ishlab chiqsin va bosh pudratchiga bersin;

“Sietl” ilmiy-texnika ishlab chiqarish firmasi manfaatdor davlat va xo‘jalik tashkilotlari bilan birgalikda jinoyatchilikka qarshi kurash vazifalarini hal etish, transport majmui, kommunal va ekologik xizmatlar, sog‘liqni saqlash, geologiya va respublika iqtisodiyotining boshqa tarmoqlari ishi samaradorligini oshirish, shuningdek yetishmayotgan asbob-uskunalar va butlovchi materiallarni ishlab chiqarishga buyurtma berish yo‘li bilan sanoat korxonalarini ish bilan ta’minlash uchun respublika hududida “Peleng” tizimini rivojlantirish dasturini ishlab chiqsin va shu yilning IV choragida Vazirlar Mahkamasiga taqdim etsin;

Radiochastotalar bo‘yicha davlat komissiyasi va O‘zbekiston Respublikasi Aloqa vazirligi bilan birgalikda “Peleng” elektron-axborot tizimi mahalliy tarmog‘idan foydalanishning tashkiliy tuzilmasini belgilasin.

4. Mazkur qarorning bajarilishini nazorat qilish Bosh vazirning birinchi o‘rinbosari I.H. Jo‘rabekov zimmasiga yuklansin.