Narxlarning liberallashuvi va bozor munosabatlari rivojlanishi sharoitlarida shaxsiy yordamchi xoʻjalik egalari tuman, viloyat uyushmalarining moddiy-texnika negizini mustahkamlash, shuningdek, shaxsiy yordamchi xoʻjalik egalarini ijtimoiy himoya qilish maqsadida Vazirlar Mahkamasi qaror qiladi:

1. Vazirlar Mahkamasining “Respublika dehqon (fermer) xoʻjaliklarini yanada rivojlantirish va mustahkamlash choralari haqida” 1991-yil 30-dekabrdagi 315-son qarori 8-bandining birinchi xatboshiga qisman oʻzgartirish kiritgan holda: “Oʻzdehqonchiliksanoatbank”ga tuman va qishloq (shaharcha) uyushmalarining taqdimnomasi boʻyicha shaxsiy yordamchi xoʻjalik egalariga chorva mollari, parranda, ozuqa, urugʻlik va qurilish materiallari sotib olish uchun bir oilaga 100 ming soʻmgacha naqd pul bilan kredit berishga ruxsat etilsin;

Vazirlar Mahkamasining “Oʻzbekiston SSR Prezidentining “Shaxsiy yordamchi xoʻjaliklari boʻlgan dehqonlarga moliyaviy yordam berish va ular uyushmasining moddiy-texnika bazasini mustahkamlash toʻgʻrisida”gi Farmonini amalga oshirish chora-tadbirlari haqida” 1991-yil 19-apreldagi 107-son qarorining 13-bandiga qisman oʻzgartirish kiritgan holda smeta qiymati 500 ming soʻmgacha boʻlgan kichik sexlar va ishlab chiqarish ahamiyatiga ega boʻlgan boshqa obyektlarni loyihalash va qurishning texnikaviy hujjatlarini tuman uyushmasi, smeta qiymati 1 mln soʻmgacha boʻlganini — viloyat uyushmasi va 1 mln soʻmdan ortiq boʻlganini — uyushmaning Respublika kengashi tasdiqlashi belgilansin.

Vazirlar Mahkamasining 1991-yil 19-apreldagi 107-son qarori bilan tasdiqlangan shaxsiy yordamchi xoʻjaliklarni rivojlantirishga madad jamgʻarmasi va undan foydalanish maqomi toʻgʻrisidagi Nizomga tegishli oʻzgartirishlar kiritilsin.

2. Shaxsiy yordamchi xoʻjaliklar egalari uyushmasi huzurida tashkil etilgan kichik korxonalarga shaxsiy tomorqalarning egalaridan meva-sabzavot mahsulotlari va qishloq xoʻjaligi xomashyosini qayta ishlash, sotish va xalq isteʼmoli mollariga, yogʻoch-qurilish hamda boshqa materiallarga almashtirish uchun naqd pul bilan hisob-kitob qilib sotib olishga ruxsat berilsin.