Chet mamlakatlarda O‘zbekistondagi ijtimoiy-iqtisodiy va siyosiy islohotlarning borishi to‘g‘risida haqqoniy axborotlar tarqatish, milliy axborot agentliklari va xalqaro axborot markazlari bilan aloqalarni rivojlantirish, respublikaning jahon axborot makoniga qo‘shilishini jadallashtirish maqsadida Vazirlar Mahkamasi qaror qiladi:

1. O‘zbekiston Respublikasi Tashqi ishlar vazirligi huzurida yuridik shaxs huquqlariga ega bo‘lgan Axborot agentligi tashkil etilsin.

Agentlik to‘g‘risidagi Nizom va uning tuzilmasi 1 va 2-ilovalarga muvofiq tasdiqlansin.

2. Axborot agentligi xodimlari soni 67 kishidan, shu jumladan, O‘zbekiston Respublikasining chet mamlakatlardagi vakolatxonalaridagi – 10 kishidan iborat qilib belgilansin.

3. Quyidagilar Axborot agentligining asosiy vazifalari etib belgilansin:

chet mamlakatlarni O‘zbekistonning siyosiy, ijtimoiy-iqtisodiy va madaniy hayoti to‘g‘risida o‘z vaqtida hamda malakali xabardor qilish uchun milliy axborot agentliklari va xalqaro axborot markazlari bilan doimiy aloqani ta’minlash;

keng xalqaro hamkorlik uchun respublikaning mavjud imkoniyatlarini aks ettiruvchi axborot byulletenlari, ma’lumotnomalar, kataloglar, bukletlar, gazetalar va jurnallarni, boshqa bosma, kompyuter, foto hamda audiovizual mahsulotlarni nashr etish va chet mamlakatlarda tarqatish;

chet mamlakatlardagi iqtisodiy faoliyatning siyosiy-huquqiy va boshqa shart-sharoitlari, jahon bozori konyunkturasi, xalqaro tashkilotlar, O‘zbekiston bilan hamkorlik qilishdan manfaatdor bo‘lgan yetakchi xorijiy kompaniyalar va firmalarning faoliyati to‘g‘risida axborotlar to‘plash va respublikada ommalashtirish.

4. Belgilab qo‘yilsinki, Axborot agentligi faoliyatini mablag‘ bilan ta’minlash budjet mablag‘lari, o‘z xo‘jalik faoliyati, shuningdek, yuridik shaxslarning ixtiyoriy badallari hisobiga, keyinchalik agentlikning moliyaviy-xo‘jalik faoliyatini xo‘jalik hisobi prinsiplariga o‘tkazgan holda, amalga oshiriladi.

5. Moliya vazirligi Tashqi ishlar vazirligi buyurtmanomasiga binoan, Axborot agentligi faoliyatini tashkil etish uchun belgilangan tartibda Vazirlar Mahkamasining zaxira jamg‘armasidan so‘mlarda zarur mablag‘lar ajratsin.

6. Axborot agentligi, bo‘shagan mablag‘larni agentlikning moddiy-texnika bazasini rivojlantirishga yo‘naltirish sharti bilan ro‘yxatdan o‘tkazilgan kundan boshlab besh yil muddatga daromad (foyda) solig‘i, bojxona poshlinalari va yig‘imlari to‘lashdan ozod qilinsin.

7. Axborot agentligi Tashqi ishlar vazirligining Toshkent shahar, O‘zbekiston ko‘chasi, 9-uydagi binosiga joylashtirilsin.

8. “Toshshaharyo‘lovchitrans” uyushmasi Axborot agentligi direksiyasini shartnoma asosida xizmat transporti bilan ta’minlasin.

9. O‘zbekiston Respublikasi Aloqa vazirligi:

Axborot agentligini, uning bo‘limlarini va muxbirlik punktlarini zarur aloqa kanallari va vositalari bilan ta’minlasin;

Axborot agentligining va unga qarashli tashkilotlar xat-xabarlarining uzatilishini hukumat telegrammalari toifasi bo‘yicha, telefondagi so‘zlashuvlarini ikkinchi shoshilinchlik toifasi bo‘yicha ta’minlasin.

10. Tashqi iqtisodiy aloqalar vazirligi, Fan va texnika davlat qo‘mitasi, Davlat matbuot qo‘mitasi, O‘zbekiston milliy axborot agentligi, Davlat matbuot qo‘mitasi, O‘zbekiston milliy axborot agentligi, “O‘zdavteleradio” kompaniyasi O‘zbekiston Respublikasi Tashqi ishlar vazirligi huzuridagi Axborot agentligiga xalqaro aloqalarni amalga oshirishda, chet mamlakatlardagi xuddi shunday axborot va boshqa turdosh tashkilotlar bilan aloqalar o‘rnatishda, xalqaro axborot markazlari bilan bitimlar tuzishda ko‘maklashsinlar.

11. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosarlari O‘.T.Sultonov, B.S.Hamidov, S.S.Saidqosimov zimmasiga yuklansin.

1. O‘zbekiston Respublikasi Tashqi ishlar vazirligi huzuridagi Axborot agentligi, bundan keyin “Agentlik” deb ataladi, chet mamlakatlarni O‘zbekistondagi ijtimoiy-iqtisodiy va siyosiy islohotlarning borishi to‘g‘risida xabardor qilishni yaxshilash, milliy axborot agentliklari va xalqaro axborot markazlari bilan aloqalarni o‘rnatish hamda kengaytirish, respublikaning axborot almashlash tizimiga qo‘shilishini jadallashtirish maqsadida tashkil etilgan.

2. Agentlik O‘zbekiston Respublikasi Tashqi ishlar vazirligiga qarashli tashkilot hisoblanadi.

3. Agentlik yuridik shaxs hisoblanadi, o‘z nomi o‘zbek va ingliz tillarida yozilgan muhrga ega bo‘ladi. Agentlik amaldagi qonunchilikka muvofiq ijodiy va xo‘jalik mustaqilligiga, o‘z mol-mulkiga, mustaqil balansga, banklarda, shu jumladan, chet mamlakatlar banklarida schyotlarga ega bo‘ladi, o‘z nomidan mulkiy va nomulkiy huquqlarga ega bo‘ladi, tegishli majburiyatlar bo‘yicha javob beradi.

4. Agentlik o‘z faoliyatini axborotlarning haqqoniyligi va ochiqligi prinsiplariga muvofiq amalga oshiradi, O‘zbekiston Respublikasi Konstitutsiyasiga, qonunlariga va Oliy Majlisining boshqa qarorlariga, Prezident farmonlariga, Vazirlar Mahkamasining qarorlari va farmoyishlariga, O‘zbekiston Respublikasi Tashqi ishlar vazirligining buyruqlariga, O‘zbekiston Respublikasi qatnashchisi bo‘lgan ommaviy axborot vositalari sohasidagi xalqaro shartnomalarga, shuningdek, ushbu Nizomga amal qiladi.

5. Agentlikka O‘zbekiston Respublikasi Tashqi ishlar vaziri tomonidan lavozimga tayinlanadigan va lavozimdan ozod etiladigan direktor boshchilik qiladi.

6. Agentlikning axborot, boshqa mahsulot va xizmatlardan foydalanuvchilar bilan, moliya-xo‘jalik faoliyati bo‘yicha boshqa sheriklar bilan o‘zaro munosabatlari shartnomaviy asoslarda amalga oshiriladi.

7. Agentlikning milliy va chet el valyutasidagi daromadlarini shakllantirish amaldagi qonunchilikka muvofiq turli manbalar, shu jumladan, xorijiy yuridik shaxslarning ixtiyoriy badallari hisobiga amalga oshiriladi.

8. Agentlikning tijorat faoliyat natijalarida va badallar hisobiga tashkil topadigan valyuta mablag‘lari ustavdagi maqsad vazifalarni amalga oshirishga, moddiy-texnika va ijtimoiy rivojlanishga, shu jumladan, ishga jalb etiladigan xorijiy fuqarolar ko‘rsatadigan xizmatlarga haq to‘lashga sarflanadi.

9. Quyidagilar Agentlikning asosiy vazifalari hisoblanadi:

chet mamlakatlarni O‘zbekistonning siyosiy, ijtimoiy-iqtisodiy va madaniy hayoti to‘g‘risida o‘z vaqtida hamda malakali xabardor qilish uchun milliy axborot agentliklari va xalqaro axborot markazlari bilan doimiy aloqani ta’minlash;

keng xalqaro hamkorlik uchun respublikaning mavjud imkoniyatlarini aks ettiruvchi axborot byulletenlari, ma’lumotnomalar, kataloglar, bukletlar, gazetalar va jurnallarni, boshqa bosma, kompyuter, foto hamda audioviziual mahsulotlarni nashr etish va chet mamlakatlarda tarqatish;

chet mamlakatlardagi iqtisodiy faoliyatning siyosiy-huquqiy va boshqa shart-sharoitlari, jahon bozori konyunkturasi, xalqaro tashkilotlar, O‘zbekiston bilan hamkorlik qilishdan manfaatdor bo‘lgan yetakchi xorijiy kompaniyalar va firmalarning faoliyati to‘g‘risidagi axborotlarni to‘plash va respublikada ommalashtirish.

10. Agentlik ko‘rsatilgan vazifalarni ta’minlash uchun O‘zbekiston Respublikasi qonunchiligiga muvofiq:

O‘zbekiston va chet mamlakatlarda axborot mahsulotlarining barcha turlari va toifalarini to‘plash, ishlash, tahlil qilish, chiqarish va tarqatishni amalga oshiradi;

boshqa axborot agentliklari, shu jumladan, chet el xalqaro axborot markazlari bilan, almashish yoki tijorat shartlarida axborotning barcha turlarini berish (sotib olish) to‘g‘risida bitimlar tuzadi;

O‘zbekiston Respublikasi qonunchiligiga muvofiq, Agentlikning ushbu Nizom bilan belgilangan maqsad va vazifalariga zid bo‘lmagan turli shakllardagi tashqi iqtisodiy faoliyatni amalga oshiradi;

Agentlik oldida turgan vazifalarni bajarish uchun belgilangan tartibda O‘zbekiston Respublikasi va chet mamlakatlarda, shu jumladan, xorijiy sheriklar bilan tarkibiy tuzilmalar tashkil qiladi;

axborotlarni tarqatish maqsadida O‘zbekiston Respublikasi qonunchiligiga muvofiq tasvir, ovoz va ma’lumotlarni uzatishning chastotalari va boshqa kanallaridan foydalanadi;

O‘zbekiston Respublikasi vazirliklari, idoralari, hokimliklari, yuridik shaxslari va xorijiy muassasalardan o‘z vazifalari va faoliyatini amalga oshirish uchun Agentlikka zarur bo‘lgan axborotlarni belgilangan tartibda so‘rab oladi;

respublikada va chet mamlakatlarda o‘zining axborotnomalarini, boshqa matbuot, kompyuter, foto va audiovizual va boshqa mahsulotlarni nashr etadi va tarqatadi, ushbu faoliyatni yuritish uchun xorijiy fuqarolarni yollaydi yoki bu vazifalarni bitimlar asosida xorijiy fuqarolarni yollaydi yoki bu vazifalarni bitimlar asosida xorijiy agentliklarga, firmalarga va boshqa tashkilotlarga topshiradi;

axborotlarni shartnoma asosida xorijiy va O‘zbekiston gazetalariga, jurnallariga, radio, televideniyesiga, axborot agentliklariga va boshqa ommaviy axborot vositalariga, hukumat hamda nohukumat muassasalariga, jamoat tashkilotlariga va xususiy shaxslarga beradi;

o‘zlari tomonidan tayyorlanadigan va tarqatiladigan axborotlarni, O‘zbekiston Respublikasi qonunchiligi bilan taqiqlanmagan boshqa mahsulotlar va xizmatlarni shartnoma asosida belgilanadigan narxlar va tariflar bo‘yicha sotadi;

O‘zbekiston bilan chet mamlakatlar ommaviy axborot vositalari o‘rtasidagi axborot almashinuvida vositachilik va vakillik vazifasini amalga oshiradi;

O‘zbekiston Respublikasi qonunchiligiga muvofiq O‘zbekiston Respublikasida va chet mamlakatlarda axborot, madaniyat, xayriya, insonparvarlik va boshqa xil jamg‘armalarni, shuningdek, uyushmalar, jamiyatlar, tashkilotlar, korxonalar va boshqa xil xo‘jalik yurituvchi subyektlarni ta’sis etishda va ularning ishida qatnashadi;

O‘zbekistonning tashqi iqtisodiy aloqalarini kengaytirishga ko‘maklashadi;

kreditlar oladi, o‘z nomidan shartnomalar va kontraktlar tuzadi, mulkiy huquqlarga ega bo‘ladi, sudda, xo‘jalik va xolislik sudida da’vogar va javob beruvchi bo‘ladi;

chet mamlakatlardagi axborot agentliklari ish tajribasini, axborot to‘plash, tahlil qilish va tarqatish sohasida yuridik va jismoniy shaxslarga xizmat ko‘rsatishning boshqa turlarini o‘rganadi;

bir xil shaklga keltirilgan dasturlar va texnik vositalardan foydalangan holda mahalliy, mintaqaviy va xorijiy axborot-analitik markazlar, muammoli axborotlar bazalarini va ma’lumotlar banki tarmog‘ini, shuningdek, axborot berishning rivojlangan tarmoqlarini tashkil etadi.

11. Agentlik mazkur Nizom bilan belgilangan vazifalarni hal etish uchun O‘zbekiston Respublikasi qonunchiligi bilan taqiqlanmagan faoliyatning boshqa turlarini amalga oshirish huquqiga egadir.

12. Agentlik direktori amaldagi qonunchilikka, mazkur Nizomga va O‘zbekiston Respublikasi Tashqi ishlar vazirligining normativ hujjatlariga muvofiq:

Agentlikka rahbarlik qiladi va uning joriy faoliyatiga javob beradi, yuridik va jismoniy shaxslar bilan shartnomalar tuzadi;

Agentlikning barcha xizmatlari va bo‘linmalari tomonidan ijro etilishi majburiy bo‘lgan buyruqlar, farmoyishlar, yo‘riqnomalar chiqaradi;

O‘zbekiston Respublikasi Tashqi ishlar vaziriga:

amaldagi qonunchilikka muvofiq Agentlikning tarkibiy birliklari, bo‘limlari, muxbirlik punktlari va o‘ziga qarashli boshqa korxonalarni va tashkilotlarni tashkil etish, qayta tashkil etish va tugatish;

tuzilmani va shtatlarni takomillashtirish, Agentlik, uning bo‘limlari, muxbirlik punktlari va o‘ziga qarashli korxonalar va tashkilotlar xodimlari sonini hamda ish haqini belgilash;

O‘zbekiston Respublikasi amaldagi qonunchiligi bilan nazarda tutilgan tartibda va ishga kiruvchilar bilan kontraktlar imzolash asosida xodimlarni, shu jumladan, xorijiy mutaxassislarni ishga qabul qilish yuzasidan takliflar kiritadi.

13. Agentlikning mol-mulki va mablag‘lari:

Agentlikning to‘liq xo‘jalik ixtiyorida bo‘lgan asosiy fondlar va oborot mablag‘lardan, shuningdek, o‘ziga qarashli tarkibiy bo‘linmalarga foydalanish uchun berilgan asosiy fondlar va oborot mablag‘lardan;

axborot va boshqa xizmatlar ko‘rsatishdan, Agentlik mahsulotlarini O‘zbekiston va xorijiy ommaviy axborot vositalariga, korxonalar, tashkilotlar va xususiy shaxslarga sotishdan olingan daromadlardan;

aksiyalar va qimmatli qog‘ozlarga dividendlardan, o‘ziga qarashli va qo‘shma korxonalarning ustav sarmoyasidagi ulushlardan;

depozit va boshqa xil moliyaviy omonatlar va operatsiyalar bo‘yicha foizlardan;

yuridik shaxslarning, shu jumladan, xorijiy yuridik shaxslarning tekin badallaridan;

O‘zbekiston Respublikasi qonunchiligi bilan taqiqlanmagan boshqa daromadlardan tashkil topadi.

14. Agentlik majburiyatlari bo‘yicha o‘ziga tegishli barcha mol-mulk bilan javob beradi.

Davlat Agentlikning majburiyatlari bo‘yicha javob bermaydi, Agentlik esa davlat majburiyatlari bo‘yicha javob bermaydi.