Yaqin istiqbolga mo‘ljallangan ustuvor vazifalardan kelib chiqib, O‘zbekiston Respublikasi Hukumatining mamlakatni ijtimoiy-iqtisodiy yuksaltirishda, ijtimoiy sohalarni, jumladan, ta’lim, sog‘liqni saqlash va madaniyat sohalarini izchil rivojlantirish, mahalla va oilani qo‘llab-quvvatlash, ma’naviy barkamol yosh avlodni tarbiyalash masalalarida mutasaddi idoralar faoliyatini samarali muvofiqlashtirish, shuningdek, IT-texnologiyalar va telekommunikatsiyalarni rivojlantirish, innovatsiyalarni joriy etish, sanoatning bazaviy tarmoqlarini, birinchi navbatda, geologiya, tog‘-kon, metallurgiya sohalarini, neft-gaz va yoqilg‘i-energetika sanoatini rivojlantirishdagi rolini oshirish hamda O‘zbekiston Respublikasi Vazirlar Mahkamasining ijro etuvchi tuzilmasini yanada takomillashtirish maqsadida:

1. Vazirlar Mahkamasining ijro etuvchi tuzilmasida:

a) quyidagilar:

O‘zbekiston Respublikasi Bosh vazirining ta’lim va sog‘liqni saqlash masalalari bo‘yicha o‘rinbosari lavozimi;

O‘zbekiston Respublikasi Bosh vazirining sanoatni va kooperatsiya aloqalarini rivojlantirish masalalari bo‘yicha maslahatchisi lavozimi;

Mahalla, oila va yoshlarni qo‘llab-quvvatlash, madaniyat, ma’naviyat va jamoat tashkilotlari masalalari kotibiyati;

Ta’lim va sog‘liqni saqlash masalalari kotibiyati tugatilsin;

b) quyidagilar:

O‘zbekiston Respublikasi Bosh vazirining ijtimoiy rivojlantirish masalalari bo‘yicha o‘rinbosari;

O‘zbekiston Respublikasi Bosh vazirining maslahatchisi — IT-texnologiyalar, telekommunikatsiyalar va innovatsion faoliyatni rivojlantirish masalalari departamenti boshlig‘i;

O‘zbekiston Respublikasi Bosh vazirining maslahatchisi — Sanoat va uning bazaviy tarmoqlarini hamda kooperatsiya aloqalarini rivojlantirish masalalari departamenti boshlig‘i lavozimlari kiritilsin;

v) quyidagilar:

Telekommunikatsiyalar, IT-texnologiyalar va innovatsion faoliyatni rivojlantirish, axborot xavfsizligini ta’minlash masalalari kotibiyati IT-texnologiyalar, telekommunikatsiyalar va innovatsion faoliyatni rivojlantirish masalalari departamenti etib qayta tashkil etilsin;

Sanoatni va kooperatsiya aloqalarini rivojlantirish masalalari kotibiyati Sanoat va uning bazaviy tarmoqlarini hamda kooperatsiya aloqalarini rivojlantirish masalalari departamenti etib qayta tashkil etilsin;

d) quyidagilar:

Respublika bo‘ysunuvidagi shaharlarni ijtimoiy-iqtisodiy rivojlantirish bo‘limini muvofiqlashtirish O‘zbekiston Respublikasi Bosh vazirining birinchi o‘rinbosariga yuklansin hamda ushbu bo‘lim Hududlarni kompleks rivojlantirish, kommunikatsiyalar, qurilish va uy-joy kommunal xo‘jaligi masalalari kotibiyati tarkibiga kiritilsin;

2. O‘zbekiston Respublikasining Bosh vaziriga o‘rta va uzoq muddatga mo‘ljallangan ustuvor vazifalarni hal qilishning muhimligi va natijadorligini hisobga olgan holda, zarurat bo‘lganda, Vazirlar Mahkamasi xodimlarining umumiy shtatlari soni doirasida uning ijro etuvchi tuzilmasiga o‘zgartirishlar kiritish huquqi berilsin.

3. O‘zbekiston Respublikasining Bosh vaziriga “O‘zbekiston Respublikasi Vazirlar Mahkamasi to‘g‘risida”gi O‘zbekiston Respublikasi Qonunining 21-moddasida belgilangan asosiy ustuvor vazifalar bilan birga:

a) Vazirlar Mahkamasining quyidagi yo‘nalishlar bo‘yicha faoliyatiga bevosita rahbarlik qilish:

IT-texnologiyalar, “elektron hukumat”ni joriy etish, axborot xavfsizligini ta’minlash, shuningdek, telekommunikatsiyalar, ilm-fan, ilmiy tadqiqotlar va innovatsiyalarni rivojlantirishni ta’minlash;

sanoatning bazaviy tarmoqlarini, shu jumladan geologiya, tog‘-kon va metallurgiya sohalarini, shuningdek, neft-gaz, yoqilg‘i va atom energetikasi sanoatini jadal va barqaror rivojlantirish;

mashinasozlik, avtomobil, elektrotexnika, to‘qimachilik, zargarlik, kimyo, ko‘mir, mudofaa sanoati va qishloq xo‘jaligi mashinasozligi yo‘nalishlarini kompleks rivojlantirishni ta’minlash;

sanoatda kooperatsiya aloqalarini, sanoat xavfsizligi, mahsulotlarni standartlashtirish sohalarini rivojlantirish, shuningdek, tegishli davlat inspeksiyalari faoliyatini muvofiqlashtirish hamda davlat moddiy zaxiralarini mustahkamlash;

b) mazkur yo‘nalishlarda jadal rivojlanish va natijalarga erishish bo‘yicha quyidagi chora-tadbirlarni amalga oshirish:

yangi “o‘sish nuqta”larini aniqlash va shu asosda qo‘shimcha resurs va zaxiralarni ishga solish hamda mavjudlarini o‘zlashtirish, iqtisodiyot va aholining energiya manbalari va xomashyo resurslariga bo‘lgan ehtiyojlarini yetarlicha ta’minlashga mo‘ljallangan rivojlantirishning strategiya va tarmoq dasturlarini ishlab chiqish va ularning amalga oshirilishini ta’minlash;

yangi investitsiya loyihalarini amalga oshirish uchun xususiy investitsiyalarni, birinchi navbatda, xorijiy investitsiyalarni jalb etish yuzasidan takliflar ishlab chiqish, ularning har tomonlama baholanishi va ekspertiza qilinishini tashkil etish;

belgilangan loyihalarni amalga oshirishning maqbul shartlarini topish maqsadida xorijiy investorlar bilan muzokaralar o‘tkazish, shuningdek, ular bo‘yicha tegishli takliflar kiritish va qarorlar qabul qilish;

Vazirlar Mahkamasi apparatining tegishli tarkibiy bo‘linmalari, shuningdek, vazirliklar, idoralar va ularning rahbarlari faoliyati natijalarini baholash uchun asosiy ko‘rsatkichlarni belgilash vazifalari yuklansin.

4. O‘zbekiston Respublikasi Vazirlar Mahkamasi:

a) quyidagilarni:

bir hafta muddatda — Vazirlar Mahkamasi apparati tarkibiy bo‘linmalarining tuzilmalarini va yangilangan shtat jadvalini;

o‘n besh kun muddatda — O‘zbekiston Respublikasi Bosh vazirining o‘rinbosarlari va maslahatchilarining funksional vazifalarini;

bir oy muddatda — Vazirlar Mahkamasi apparatining tarkibiy bo‘linmalari to‘g‘risidagi nizomlarni tasdiqlash haqida Hukumat qarorlarini qabul qilsin;

b) bir oy muddatda Vazirlar Mahkamasi apparatining yangidan tashkil etilgan tarkibiy bo‘linmalarini zamonaviy talablarni hisobga olgan holda, qo‘yilgan vazifalar samarali bajarilishini yuksak professional darajada ta’minlashga qodir bo‘lgan malakali mutaxassislar bilan to‘ldirsin.

5. O‘zbekiston Respublikasi Prezidentining 2020-yil 24-fevraldagi “O‘zbekiston Respublikasi Vazirlar Mahkamasi faoliyatini takomillashtirishga oid qo‘shimcha chora-tadbirlar to‘g‘risida”gi PQ-4612-son qarorining 4-bandi, shuningdek, qarorga ilova o‘z kuchini yo‘qotgan deb hisoblansin.

6. O‘zbekiston Respublikasi Adliya vazirligi manfaatdor vazirlik va idoralar bilan birgalikda bir oy muddatda qonun hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.

7. Mazkur qarorning ijrosini nazorat qilish O‘zbekiston Respublikasining Bosh vaziri A.N. Aripov va O‘zbekiston Respublikasi Prezidenti Administratsiyasi rahbari Z.Sh. Nizomiddinov zimmasiga yuklansin.