Oʻzbekiston Respublikasi Prezidentining “Oʻzbekiston Respublikasi va Hindiston Respublikasi oʻrtasidagi strategik sheriklikni yanada kengaytirish va mustahkamlash chora-tadbirlari toʻgʻrisida” 2018-yil 4-oktabrdagi PQ-3958-son qarori hamda Oʻzbekiston Respublikasi Prezidentining “Andijon-farm” erkin iqtisodiy zonasini tashkil etish toʻgʻrisida” 2019-yil 14-yanvardagi PF-5629-son Farmoniga muvofiq, shuningdek, farmatsevtika tarmogʻini yanada rivojlantirish, toʻgʻridan toʻgʻri xorijiy investitsiyalarni jalb etish, yangi ish oʻrinlarini yaratish, mamlakatda ishlab chiqarilayotgan dorivor preparatlar va tibbiy ashyolar roʻyxatini kengaytirish maqsadida Vazirlar Mahkamasi qaror qiladi:

1. Quyidagilar:

a) Oʻzbekiston Respublikasi Hukumati nomidan Investitsiya va tashqi savdo vazirligi hamda “Cadila Pharmaceuticals Ltd” (Hindiston Respublikasi) kompaniyasi (keyingi oʻrinlarda — xorijiy kompaniya) oʻrtasida 2019-yil 19-oktabrda imzolangan “Andijon-farm” erkin iqtisodiy zonasi hududida farmatsevtika mahsulotlarini ishlab chiqarish korxonasini tashkil etish toʻgʻrisidagi investitsiya loyihasini amalga oshirish boʻyicha investitsiya shartnomasi (keyingi oʻrinlarda — investitsiya shartnomasi) tuzilganligi;

b) investitsiya shartnomasiga muvofiq xorijiy kompaniya quyidagi majburiyatlarni oʻz zimmasiga olganligi maʼlumot uchun qabul qilinsin:

2020 — 2025-yillarda 50,0 mln. AQSh dollari miqdorida toʻgʻridan toʻgʻri, 2020-2021-yillarda loyihaning birinchi bosqichini amalga oshirish uchun kamida 10,0 mln. AQSh dollari mikdorida xorijiy investitsiyani jalb etish;

400 ta yangi ish oʻrinlarini yaratish;

xalqaro standartlarga javob beradigan va tarmoqdagi ilgʻor amaliyotga asoslangan farmatsevtika mahsulotlarini ishlab chiqarish va sifatni boshqarish tizimini yoʻlga qoʻyish.

2. Oʻzbekiston Respublikasi Tashqi ishlar vazirligi Investitsiyalar va tashqi savdo vazirligi buyurtmasiga muvofiq investitsiya loyihasini amalga oshirishda ishtirok etuvchi xorijiy mutaxassislarga kirish vizalarini belgilangan tartibda rasmiylashtirilishini taʼminlasin.

3. Oʻzbekiston Respublikasi Ichki ishlar vazirligi xorijiy kompaniya buyurtmasiga muvofiq investitsiya loyihasini amalga oshirishda ishtirok etuvchi xorijiy mutaxassislarga belgilangan tartibda koʻp marotabali vizalarning berilishi va muddatining uzaytirilishini hamda Oʻzbekiston Respublikasida yashash manzili boʻyicha vaqtincha turgan joyi boʻyicha roʻyxatga olish va muddatining uzaytirilishini taʼminlasin.

4. Oʻzbekiston Respublikasi Bandlik va mehnat munosabatlari vazirligi belgilangan tartibda xorijiy kompaniya buyurtmasiga muvofiq Oʻzbekiston Respublikasiga xorijiy ishchi kuchini jalb etishga (muddatini uzaytirishga) ruxsatnoma berilishini hamda xorijiy fuqarolarga Oʻzbekiston Respublikasi hududida mehnat faoliyatini olib borish xuquqini tasdiqlovchi hujjat berilishi (muddati uzaytirilishi) ni taʼminlasin.

5. Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligi xorijiy kompaniya tomonidan ishlab chiqariladigan 30 nomdagi dorivor vositalar va tibbiy ahamiyatga ega mahsulotlarni davlat roʻyxatidan oʻtkazish uchun zarur boʻlgan barcha hujjatlar taqdim etilgandan soʻng roʻyxatdan oʻtkazilganlik toʻgʻrisidagi guvohnoma uchun belgilangan yigʻim undirilmagan holda qisqa muddatlarda roʻyxatdan oʻtkazilishini taʼminlasin.

6. Mazkur qarorning bajarilishini nazorat qilish Oʻzbekiston Respublikasi Bosh vaziri oʻrinbosari — investitsiyalar va tashqi savdo vaziri S.U. Umurzakov va Andijon viloyati hokimi Sh.Q. Abduraxmonov zimmasiga yuklatilsin.