Respublikada matbaa va noshirlik sohasini qo‘llab-quvvatlash tizimini takomillashtirish, bosma mahsulotlar bozorini rivojlantirish bo‘yicha keng qamrovli va tizimli ishlar amalga oshirilmoqda.

Shu bilan birga, matbaa va noshirlik sohasida hozirgi kundagi ishlar ahvoli matbaa va noshirlik tashkilotlari o‘rtasida raqobat muhitini kuchaytirishni, mualliflik huquqi buzilishining oldini olish, sifatsiz mahsulotlar ishlab chiqarilishini cheklash, darsliklar va o‘quv-metodik majmualarni chop etish tartibini qayta ko‘rib chiqishni taqozo etmoqda.

Noshirlik va matbaa sohasida davlat aralashuvini keskin kamaytirish, nashriyot va matbaa sohasida qulay ishbilarmonlik muhitini yaratish, shuningdek, ta’lim muassasalari uchun sifatli darsliklar va o‘quv-metodik majmualar yetkazilishini ta’minlash maqsadida:

1. O‘zbekiston Respublikasi Iqtisodiyot va moliya vazirligi, Adliya vazirligi va O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligining (keyingi o‘rinlarda — Agentlik):

2020-yil 1-oktabrdan boshlab respublika budjeti mablag‘lari hisobidan ta’lim muassasalari uchun darsliklar va o‘quv-metodik majmualarni nashr etishda (qayta nashr etishda) narxlarni davlat tomonidan tartibga solishni (rentabellikning cheklangan darajasini belgilash) bekor qilish;

2020-yil 1-iyuldan boshlab noshirlik faoliyatini litsenziyalash hamda matbaa faoliyatini amalga oshirish uchun ruxsat berish tartiblarini bekor qilib, noshirlik va matbaa faoliyatini boshlaganligi haqida vakolatli davlat organini xabardor etish tizimini joriy qilish;

2021-yil 1-yanvardan boshlab noshirlik va matbaa korxonalarining bosma mahsulotlarini realizatsiya qilishdan, shuningdek, bosma mahsulotlarni ishlab chiqarish va realizatsiya qilish bilan bog‘liq tahrir, matbaa va noshirlik xizmatlari ko‘rsatishdan tushgan tushumdan O‘zbekiston yozuvchilar uyushmasi huzuridagi “Ijod” fondiga ajratmalarni bekor qilish haqidagi takliflari ma’qullansin.

2. Shunday tartib o‘rnatilsinki, unga muvofiq:

noshirlik va matbaa korxonalari, shu jumladan davlat buyurtmasini bajaruvchi korxonalar narxni shakllantirish siyosatini bozor mexanizmlari asosida erkin shakllantiradi;

2020-yil 1-sentabrdan boshlab davlat buyurtmasi asosida bosma mahsulotlar, shu jumladan, darsliklar va o‘quv-metodik majmualarni nashrga tayyorlash va chop etish, O‘zbekiston Respublikasi norezidentlari ham qatnashishi mumkin bo‘lgan, davlat xaridlari to‘g‘risidagi qonun hujjatlarida belgilangan tartibda amalga oshiriladi. Bunda mazkur tartib korporativ buyurtmachilar uchun ham majburiy hisoblanadi;

tadbirkorlik subyektlari tomonidan noshirlik va matbaa faoliyatini yuritishni boshlaganligi haqida vakolatli davlat organini xabardor etish avtomatlashtirilgan axborot tizimi orqali amalga oshiriladi.

3. O‘zbekiston Respublikasi Iqtisodiyot va sanoat vazirligi, Moliya vazirligi, Agentlik va Davlat aktivlarini boshqarish agentligining:

“O‘zbekiston nashriyot-matbaa ijodiy uyi”, “G‘afur G‘ulom nomidagi nashriyot-matbaa ijodiy uyi” va “O‘qituvchi matbaa uyi” davlat korxonalarini o‘rnatilgan tartibda xususiylashtirish uchun Davlat aktivlarini boshqarish agentligiga o‘tkazish;

“Ko‘zi ojizlar bosmaxonasi” davlat korxonasini Davlat aktivlarini boshqarish agentligiga samarali foydalanish uchun o‘tkazish;

“O‘qituvchi ilmiy-metodik nashriyot markazi” davlat korxonasi va Agentlik hududiy bo‘linmalari tizimidagi (Qoraqalpog‘iston Respublikasidan tashqari) nashriyotlar faoliyatini tugatish;

Agentlik tizimida “O‘zbekiston nashriyoti” davlat korxonasini tashkil etish, unga “Cho‘lpon nomidagi nashriyot-matbaa ijodiy uyi” va “O‘zbekiston milliy ensiklopediyasi davlat ilmiy nashriyoti” davlat korxonalarini qo‘shib olish hamda “O‘zbekiston nashriyot-matbaa ijodiy uyi” davlat korxonasining noshirlik bazasini, shu jumladan intellektual mulk obyektlariga bo‘lgan mutlaq huquqlarini o‘tkazish to‘g‘risidagi takliflariga rozilik berilsin.

Davlat mulkini sotishda tender savdolarini o‘tkazish bo‘yicha davlat komissiyasi (A.N. Aripov) ikki hafta muddatda mazkur bandda nazarda tutilgan davlat korxonalarini baholash, qayta tashkil etish, savdoga qo‘yish va tugatish grafiklarini tasdiqlasin.

4. O‘zbekiston Respublikasi Davlat aktivlarini boshqarish agentligi:

a) bir oy muddatda “O‘zbekiston nashriyot-matbaa ijodiy uyi”, “G‘afur G‘ulom nomidagi nashriyot-matbaa ijodiy uyi”, “O‘qituvchi matbaa uyi” va “Ko‘zi ojizlar bosmaxonasi” davlat korxonalarini belgilangan tartibda qabul qilib olsin;

b) xalqaro audit va konsalting tashkilotlarini jalb qilgan holda ikki oy muddatda:

davlat ishtirokidagi nashriyot-matbaa korxonalarini xususiylashtirishga tayyorlash va ularning jozibadorligini oshirish bo‘yicha har bir tadbirni aniq amalga oshirish muddati va mas’ul shaxslar ko‘rsatilgan chora-tadbirlar rejalarini tasdiqlasin;

belgilangan tartibda sotilmagan hamda tugatilgan nashriyot-matbaa korxonalarining mol-mulkidan samarali foydalanish bo‘yicha takliflarni Vazirlar Mahkamasiga kiritsin.

5. Belgilansinki:

Agentlikning tugatilayotgan nashriyot tashkilotlariga tegishli mutlaq mualliflik huquqlari (darsliklar va o‘quv-metodik majmualarga nisbatan huquqlar bundan mustasno) yangi tashkil etilayotgan “O‘zbekiston nashriyoti” davlat korxonasiga o‘tkaziladi;

Agentlikning nashriyot tashkilotlarining darsliklar va o‘quv-metodik majmualarga nisbatan mavjud mutlaq mualliflik (noshirlik) huquqlari O‘zbekiston Respublikasi Maktabgacha va maktab ta’limi vazirligiga beg‘araz o‘tkaziladi;

ta’lim muassasalari uchun matbaa mahsulotlari texnik reglament talablariga muvofiqligi tasdiqlanishi shart.

6. Quyidagilar:

a) O‘zbekiston Respublikasi maktabgacha va maktab ta’limi vaziriga umumiy o‘rta ta’lim tashkilotlarining barcha sinflari uchun darsliklar va o‘quv-metodik majmualarning foydalanish (yangi va qayta nashr etish davriyligi) muddatlarini belgilash, shuningdek, Iqtisodiyot va moliya vazirligi bilan kelishilgan holda umumiy o‘rta ta’lim muassasalari barcha sinflari uchun darsliklar va o‘quv-metodik majmualarni qo‘shimcha chop etish yuzasidan qaror qabul qilish huquqi berilsin. Bunda, darsliklar va o‘quv-metodik majmualarning mazmuni asossiz o‘zgartirilishiga yo‘l qo‘yilmaydi;

b) O‘zbekiston Respublikasi Prezidenti huzuridagi Ijtimoiy himoya milliy agentligiga alohida ta’lim ehtiyojlari bo‘lgan bolalar uchun ixtisoslashtirilgan maktablar va maktab-internatlarning barcha sinflari uchun darsliklar va o‘quv-metodik majmualarning foydalanish (yangi va qayta nashr etish davriyligi) muddatlarini belgilash huquqi berilsin.

Iqtisodiyot va moliya vazirligi Davlat budjeti parametrlari shakllantirilishida 2026-yildan boshlab alohida ta’lim ehtiyojlari bo‘lgan bolalar uchun ixtisoslashtirilgan maktablar va maktab-internatlarning darslik (bundan umumta’lim o‘quv dasturi darsliklari mustasno) va o‘quv qo‘llanmalarini yaratish va chop etish bilan bog‘liq xarajatlarni moliyalashtirish uchun zarur mablag‘larni O‘zbekiston Respublikasi Prezidenti huzuridagi Ijtimoiy himoya milliy agentligiga ajratilishini ko‘zda tutsin.

7. O‘zbekiston Respublikasi Xalq ta’limi vazirligi manfaatdor vazirlik va idoralar bilan birgalikda uch oy muddatda:

Xalq ta’limi vazirligi huzuridagi Respublika ta’lim markazi (keyingi o‘rinlarda — Markaz) faoliyatini qayta ko‘rib chiqib, tubdan takomillashtirish;

Markazga umumiy o‘rta ta’limning davlat ta’lim standarti va ta’lim dasturlarini ishlab chiqish, darsliklar va o‘quv-metodik majmualarni yaratish bo‘yicha muallif va tuzuvchilarni tanlash, yaratilgan darsliklar va o‘quv-metodik majmualarni ekspertiza qilish, sinovdan o‘tkazish, ularni ta’lim tizimida qo‘llash bo‘yicha ilmiy xulosa berish vazifalarini yuklash;

ta’lim sohasidagi darsliklar va o‘quv-metodik majmualar tayyorlash, nashr etish va tarqatish tizimini takomillashtirish, shu jumladan ularda xato va kamchiliklarga yo‘l qo‘yilishining oldini olish, davlat buyurtmasiga asosan tayyorlanadigan darsliklar va o‘quv-metodik majmualardan foydalanishga bo‘lgan mutlaq huquqlarni Xalq ta’limi vazirligiga o‘tkazish;

darsliklar va o‘quv-metodik majmualarni yaratish bilan bog‘liq ilmiy-texnikaviy loyihalarni amalga oshirishga jalb etiladigan ilmiy xodimlarni bajaradigan ilmiy-texnikaviy ishlar hajmidan kelib chiqqan holda muayyan muddatga shartnoma asosida ishga qabul qilish bo‘yicha Vazirlar Mahkamasiga takliflar kiritsin.

8. O‘zbekiston Respublikasi Moliya vazirligi O‘zbekiston yozuvchilar uyushmasi bilan birgalikda 2020-yil 1-oktabrga qadar O‘zbekiston yozuvchilar uyushmasi huzuridagi “Ijod” fondini yanada rivojlantirish va uni davlat tomonidan qo‘llab-quvvatlash yuzasidan Vazirlar Mahkamasiga taklif kiritsin.

O‘zbekiston yoshlar ittifoqi Agentlik, Moliya vazirligi, O‘zbekiston yozuvchilar uyushmasi va boshqa manfaatdor idoralar bilan birgalikda ikki oy muddatda ijodiy ko‘rik-tanlovlarni tashkil etish, iqtidorli yosh mualliflarning birinchi kitoblarini nashr etish uchun moliyaviy yordam ko‘rsatish tizimini takomillashtirish yuzasidan Vazirlar Mahkamasiga takliflar kiritsin.

9. O‘zbekiston Respublikasi Vazirlar Mahkamasi (B. Xodjayev) bir oy muddatda Investitsiyalar va tashqi savdo vazirligi, Innovatsion rivojlanish vazirligi, “O‘zstandart” agentligi va “O‘zkimyosanoat” AJ bilan birgalikda ishlab chiqarilayotgan matbaa mahsulotlarining tannarxini kamaytirish maqsadida import qilinayotgan xom ashyolarni (qog‘oz, karton, bo‘yoq va yelim) ishlab chiqarishni mahalliylashtirish dasturini shakllantirsin va tasdiqlasin.

10. O‘zbekiston Respublikasi Raqobatni rivojlantirish va iste’molchilar huquqlarini himoya qilish qo‘mitasi umumiy o‘rta ta’lim muassasalari uchun darsliklar va o‘quv-metodik majmualarni nashr etish va qayta nashr etishga tender (tanlov) savdolarini o‘tkazishda raqobat to‘g‘risidagi qonun hujjatlari talablariga rioya qilinishi ustidan nazoratni kuchaytirsin.

11. Agentlik va uning hududiy boshqarmalariga axborot, noshirlik va matbaa sohasida ma’muriy huquqbuzarlik to‘g‘risida bayonnoma tuzish vakolati yuklatilganligi ma’lumot uchun qabul qilinsin.

12. Agentlik O‘zbekiston Respublikasi Iqtisodiyot va moliya vazirligi hamda Oliy ta’lim, fan va innovatsiyalar vazirligi bilan birgalikda oliy ta’lim muassasalarida noshirlik faoliyati sohasidagi ta’lim yo‘nalishlarini takomillashtirish choralarini ko‘rsin.

13. O‘zbekiston Respublikasi Xalq ta’limi vazirligi ikki oy muddatda xorijiy davlatlar ta’lim tizimida foydalanilayotgan STEAM fanlari (Science — tabiiy fanlar, Technology — texnologiyalar, Engineering — texnik ijodkorlik, Art — san’at, Mathematics — matematika) bo‘yicha zamonaviy darsliklarni respublika umumiy ta’lim muassasalarida tatbiq etish bo‘yicha Vazirlar Mahkamasiga taklif kiritsin.

14. Agentlik ikki oy muddatda:

Adliya vazirligi bilan birgalikda noshirlik va matbaa faoliyatini boshlaganligi haqida vakolatli davlat organini xabardor etish tartibi to‘g‘risidagi nizomni tasdiqlash uchun Vazirlar Mahkamasiga kiritsin;

nashriyot va matbaa sohasidagi qonun hujjatlari va normativ-texnik hujjatlar talablarini qayta ko‘rib chiqsin hamda zamon talablariga javob bermaydigan norma va normativlar, jumladan ijodiy ishlarni nashrga tayyorlash va chop etish uchun Yozuvchilar uyushmasining xulosasini olish amaliyotini bekor qilish choralarini ko‘rsin;

Adliya vazirligi bilan birgalikda noshirlik va matbaa sohasidagi qonun hujjatlarini buzganlik uchun ma’muriy javobgarlikni kuchaytirish bo‘yicha qonun loyihasini ishlab chiqsin hamda Vazirlar Mahkamasiga kiritsin;

“O‘zstandart” agentligi, Sog‘liqni saqlash vazirligi va Xalq ta’limi vazirligi bilan birgalikda ta’lim muassasalari uchun poligrafiya mahsulotlarining xavfsizligi haqida umumiy texnik reglamentni xalqaro talablarga muvofiqlashtirish bo‘yicha takliflarni ishlab chiqib, Vazirlar Mahkamasiga kiritsin;

qonun hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.

15. Mazkur qarorning ijrosini nazorat qilish O‘zbekiston Respublikasining Bosh vaziri A.N. Aripov va O‘zbekiston Respublikasi Prezidenti Administratsiyasi rahbari Z.Sh. Nizomiddinov zimmasiga yuklansin.