1. Oʻzbekiston Respublikasi Prezidentining “Qurilish sohasiga axborot-kommunikatsiya texnologiyalarini keng joriy etish chora-tadbirlari toʻgʻrisida” 2019-yil 20-sentabrdagi PQ-4464-son qarori bilan davlat muassasasi shaklidagi Axborot-kommunikatsiya texnologiyalarini rivojlantirish respublika markazi (keyingi oʻrinlarda Markaz deb ataladi) tashkil etilganligi, uning asosiy vazifalari va faoliyatini moliyalashtirish manbalari belgilanganligi maʼlumot uchun qabul qilinsin.

2. Markazning tuzilmasi va shtat birliklari uning faoliyat yoʻnalishlari va ish hajmlaridan kelib chiqqan holda, Qurilish va uy-joy kommunal xoʻjaligi vazirligi (keyingi oʻrinlarda — Vazirlik) tomonidan tasdiqlanadi.

Markazning xodimlari mehnatiga haq toʻlash va ragʻbatlantirishda, uning moliyaviy imkoniyatlaridan va xoʻjalik faoliyati natijalaridan kelib chiqqan holda, Yagona tarif setkasining oshirilgan tarif koeffitsiyentlari belgilanishi mumkin (Vazirlik bilan kelishilgan holda).

3. Belgilansinki, Markaz direktori qurilish va uy-joy kommunal xoʻjaligi vaziri tomonidan, direktor oʻrinbosarlari esa, Vazirlik bilan kelishilgan holda Markaz direktori tomonidan lavozimga tayinlanadi va lavozimidan ozod etiladi.

3¹. Belgilansinki, Markazga nisbatan Vazirlar Mahkamasining 2022-yil 22-fevraldagi 86-son qarori bilan tasdiqlangan Maxsus elektron tizim orqali ruxsat etish xususiyatiga ega ayrim hujjatlarni berish tartib-taomillari toʻgʻrisidagi yagona nizomga 66-ilovaning 5.2-bandi talabi tatbiq etilmaydi.

4. Markaz Oʻzbekiston Respublikasi Qurilish vazirligining Toshkent shahar, Abay koʻchasi, 6-uy manzilidagi binosiga tekin foydalanish huquqi asosida joylashtirilsin.

Markazning moliyaviy va xoʻjalik operatsiyalari bank hisob-raqamlari orqali amalga oshiriladi (davlat buyurtmachisi funksiyasini bajarishdagi holatlar bundan mustasno).

5. Oʻzbekistan Respublikasi Qurilish vazirligi bir oy muddatda:

Markazning ustavi ishlab chiqilishi va tasdiqlanishini, shuningdek, davlat roʻyxatidan oʻtkazilishini taʼminlasin;

Markazni tegishli mutaxassislikka ega malakali mutaxassislar bilan toʻldirish, shuningdek, moddiy-texnik bazasini shakllantirish choralarini koʻrsin;

manfaatdor vazirlik va idoralar bilan birgalikda oʻzlari qabul qilgan normativ-hukuqiy hujjatlarni mazkur qarorga muvofiqlashtirsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari A.J. Ramatov va Oʻzbekiston Respublikasi qurilish vaziri B.I. Zakirov zimmasiga yuklansin.