Oʻzbekiston Respublikasi Prezidentining 2019-yil 28-martdagi PQ-4254-son “Oʻzbekiston Respublikasi Veterinariya va chorvachilikni rivojlantirish davlat qoʻmitasi faoliyatini tashkil etish toʻgʻrisida”gi qarori va Oʻzbekiston Respublikasi Vazirlar Mahkamasining 2017-yil 22-sentabrdagi 748-son “Hayvonlarni identifikatsiya qilish, ularni hisobga olish, hisobdan chiqarish va saqlash tartibini takomillashtirish toʻgʻrisida”gi qaroriga muvofiq Oʻzbekiston Respublikasi Veterinariya va chorvachilikni rivojlantirish davlat qoʻmitasi qaror qiladi:

1. Hayvonlarning egalaridan identifikatsiya qilish xizmatlari uchun undiriladigan toʻlovlar miqdori va shartlari toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran uch oy oʻtgach kuchga kiradi.

Mazkur Nizom Oʻzbekiston Respublikasi Vazirlar Mahkamasining 2017-yil 22-sentabrdagi 748-son “Hayvonlarni identifikatsiya qilish, ularni hisobga olish, hisobdan chiqarish va saqlash tartibini takomillashtirish toʻgʻrisida”gi qaroriga muvofiq identifikatsiya qilish xizmatlari uchun hayvonlarning egalaridan undiriladigan toʻlovlar miqdori va shartlarini belgilaydi.

1. Mazkur Nizom qoidalari tuman (shahar) veterinariya va chorvachilikni rivojlantirish boʻlimlari tomonidan koʻrsatiladigan xizmatlarga nisbatan tatbiq etiladi.

2. Yuridik va jismoniy shaxslarning oʻz ehtiyojlari uchun saqlayotgan yoki tadbirkorlik faoliyatini amalga oshirish uchun koʻpaytirayotgan, boqayotgan hayvonlari identifikatsiya obyekti boʻlib hisoblanadi.

3. Hayvonlarni identifikatsiya qilish xizmatlari uchun hayvon egalaridan quyidagi miqdorlarda toʻlov undiriladi:

har bir qoramol, ot, eshak va tuyalar uchun — Oʻzbekiston Respublikasida belgilangan bazaviy hisoblash miqdorining (keyingi oʻrinlarda BHM deb yuritiladi) 2 foizi;

har bir qoʻy, echki va choʻchqalar uchun — BHMning 1,5 foizi;

har bir it va mushuklar uchun — BHMning 1 foizi.

Qoʻy va echkilarga guruh usulida veterinariya pasporti rasmiylashtirilganda, identifikatsiya qilish xizmatlari uchun toʻlovlar qoʻy va echkilarning har biriga alohida undiriladi.

4. Veterinariya pasporti yoʻqolganda yoki yaroqsiz holga kelib qolganda uning dublikati bepul beriladi.

5. Hayvonlarni identifikatsiya qilish xizmatlari tuman (shahar) veterinariya va chorvachilikni rivojlantirish boʻlimlari va hayvon egalari oʻrtasida tuzilgan shartnomaga asosan amalga oshiriladi.

6. Shartnomada hayvonlarni identifikatsiya qilish xizmatini koʻrsatish muddatlari, narxi, hisob-kitob tartibi, tomonlarning huquqlari, majburiyatlari va javobgarligi, shuningdek qonun hujjatlarida belgilangan boshqa shartlar belgilanadi.

7. Toʻlov tuman (shahar) veterinariya va chorvachilikni rivojlantirish boʻlimlarining budjetdan tashqari shaxsiy gʻazna hisobvaragʻiga yuridik va jismoniy shaxslarning ixtiyoriga koʻra, cheklanmagan holda, tijorat banklari, elektron toʻlov tizimi va boshqa toʻlov turlari orqali, naqd va naqdsiz shaklda amalga oshiriladi.

8. Tuman (shahar) veterinariya va chorvachilikni rivojlantirish boʻlimlari tasdiqlangan shakldagi kirim orderi va ikki nusxada kvitansiyani rasmiylashtiradi hamda pullik tushumlarning hisobini olib boradi.

Kvitansiyaning bir nusxasi hayvon egasiga beriladi, ikkinchi nusxasi tuman (shahar) veterinariya va chorvachilikni rivojlantirish boʻlimlari buxgalteriyasida saqlanadi.

9. Tuman (shahar) veterinariya va chorvachilikni rivojlantirish boʻlimlari hayvonlarni identifikatsiya qilish xizmatlari boʻyicha tushumlarning statistik, buxgalterlik hisobi va hisobotini olib boradi hamda hududiy Veterinariya va chorvachilikni rivojlantirish boshqarmasiga topshiradi.

Veterinariya va chorvachilikni rivojlantirish boshqarmasi ushbu hisobotlarni Veterinariya va chorvachilikni rivojlantirish davlat qoʻmitasiga yuboradi.

10. Hayvonlarni identifikatsiya qilishda veterinariya muassasasi va hayvon egalari oʻrtasida tuzilgan shartnomada koʻrsatilgan majburiyatlarni bajarish jarayonida yuzaga keladigan nizolar va kelishmovchiliklar muzokara oʻtkazish orqali hal qilinadi. Kelishmovchiliklarni muzokara orqali hal qilishning iloji boʻlmaganda, ular sud tartibida hal etiladi.

11. Mazkur Nizom talablari buzilishida aybdor boʻlgan shaxslar qonun hujjatlariga muvofiq javob beradilar.

12. Mazkur Nizom Oʻzbekiston Respublikasi Moliya vazirligi, Savdo-sanoat palatasi hamda Oʻzbekiston fermer, dehqon xoʻjaliklari va tomorqa yer egalari kengashi bilan kelishilgan.