Idoraviy normativ-huquqiy hujjatni davlat reyestridan chiqarish boʻyicha 2019-yil 29-maydagi xulosaga muvofiq hamda Oʻzbekiston Respublikasi Prezidentining 2018-yil 13-apreldagi PQ-3666-son “Oʻzbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar toʻgʻrisida”gi, Oʻzbekiston Respublikasi Vazirlar Mahkamasining 1997-yil 9-oktabrdagi 469-son “Vazirliklar, davlat qoʻmitalari va idoralar meʼyoriy hujjatlarining qonuniyligini taʼminlash chora-tadbirlari toʻgʻrisida”gi hamda 2000-yil 19-maydagi 197-son “Vazirliklar, davlat qoʻmitalari va idoralarning meʼyoriy hujjatlarini qabul qilish tartibini takomillashtirish toʻgʻrisida”gi qarorlariga asosan, buyuraman:

1. Pensionerlarni ish qidiruvchi sifatida roʻyxatga olish, ular bilan mehnat shartnomasi alohida asoslar boʻyicha bekor qilinganda moddiy madad berish kafolatlari va pensiya toʻlashga doir tushuntirishni (roʻyxat raqami 546, 1998-yil 23-noyabr) Idoraviy normativ-huquqiy hujjatlarning davlat reyestridan chiqarish yuzasidan Oʻzbekiston Respublikasi Bandlik va mehnat munosabatlari vazirligining 2019-yil 21-maydagi 01/00-04/07-3705-son xati maʼlumot uchun qabul qilinsin.

2. Oʻzbekiston Respublikasi Mehnat vazirligi, Oʻzbekiston Respublikasi Ijtimoiy taʼminot vazirligi bilan tasdiqlangan Pensionerlarni ish qidiruvchi sifatida roʻyxatga olish, ular bilan mehnat shartnomasi alohida asoslar boʻyicha bekor qilinganda moddiy madad berish kafolatlari va pensiya toʻlashga doir tushuntirish (roʻyxat raqami 546, 1998-yil 23-noyabr) davlat reyestridan chiqarilsin.

3. Mazkur buyruq davlat roʻyxatidan oʻtkazilsin va bu haqda Idoraviy normativ-huquqiy hujjatlarning davlat reyestriga tegishli yozuv kiritilsin.

4. Qonun hujjatlarini tahlil qilish va turkumlash boshqarmasi ushbu idoraviy normativ-huquqiy hujjatni “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da hamda Oʻzbekiston Respublikasi Qonun hujjatlari maʼlumotlari milliy bazasida eʼlon qilinishini taʼminlasin.

5. Mazkur buyruq rasmiy eʼlon qilingan kundan eʼtiboran kuchga kiradi.

6. Mazkur buyruqning ijrosini nazorat qilish vazirning birinchi oʻrinbosari M. Istamov zimmasiga yuklansin.