Nodir isteʼdodi, badiiy teran, lirik hamda falsafiy sheʼr va dostonlari, publitsistik asarlari bilan oʻzbek adabiyoti rivojiga ulkan hissa qoʻshgan Oʻzbekiston xalq shoiri Halima Xudoyberdiyeva nomini abadiylashtirish, shoira izdoshlarini kashf etish va ularning oʻz isteʼdodlarini keng namoyon qilishlari uchun zarur shart-sharoitlar yaratish maqsadida Vazirlar Mahkamasi qaror qiladi:

1. Guliston shahrida Halima Xudoyberdiyeva nomidagi ijod maktabi (keyingi oʻrinlarda — ijod maktabi) tashkil etilsin.

2. Sirdaryo viloyati hokimligi tomonidan ijod maktabini qurish uchun Guliston shahar I. Karimov koʻchasi hududidan 1.1 ga yer maydoni ajratilganligi maʼlumot uchun qabul qilinsin.

3. Belgilab qoʻyilsinki:

maktab Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi tizimidagi davlat umumtaʼlim muassasasi hisoblanadi, shaxsiy gʻazna hisobraqamiga, Oʻzbekiston Respublikasi Davlat gerbi tasviri tushirilgan va oʻz nomi yozilgan muhrga, shtampga, blankalarga ega boʻladi;

ijod maktabida har bir sinfdagi oʻquvchilar soni 20 nafarni tashkil qiladi, 7-sinflarga esa ijodiy tanlovlar, test va boshqa sinovlar asosida qabul qilinadi.

Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligiga ijod maktabining moddiy-texnik bazasi, imkoniyatlari, pedagog kadrlar salohiyatidan hamda mavjud talab va ehtiyojdan kelib chiqqan holda, keyingi yillarda oʻquvchilarni qabul qilish kvotalariga oʻzgartirishlar kiritish huquqi beriladi.

4. Oʻzbekiston Respublikasi Investitsiyalar va tashqi savdo vazirligi tegishli vazirlik va idoralar bilan birgalikda, tasdiqlangan loyiha-smeta hujjatlari asosida 2019-yilga moʻljallangan Investitsiya dasturiga 150 oʻrinli maktab-internat binosi va uning 100 oʻrinli yotoqxona binosini qurilish hamda jihozlash ishlarini qoʻshimcha ravishda kiritilishini taʼminlasin.

5. Oʻzbekiston Respublikasi Xalq taʼlimi vazirligi:

Oʻzbekiston Respublikasi Qurilish vazirligi va Sirdaryo viloyati hokimligi bilan birgalikda maktab-internatning qurilish ishlari boʻyicha loyiha-smeta hujjatlari jihozlarning texnik parametrlarini qoʻllagan holda ishlab chiqilishini va vakolatli ekspertiza organlari tomonidan belgilangan tartibda koʻrib chiqilishini taʼminlasin;

Sirdaryo viloyati hokimligi bilan birgalikda maktab-internatning moddiy-texnika bazasini mustahkamlash maqsadida yotoqxona, oshxona, kutubxona, faollar zali va oʻquv-laboratoriya jihozlari hamda kompyuter texnikasi, oʻquv-metodik majmualar, oʻqituvchilar uchun metodik qoʻllanmalar va badiiy adabiyotlar bilan taʼminlash choralarini koʻrsin;

uch oy muddatda maktab-internatning ustavi tasdiqlanishini va belgilangan tartibda davlat roʻyxatidan oʻtkazilishini taʼminlasin.

6. Ijod maktabining bino va inshootlarini qurish boʻyicha:

Sirdaryo viloyati hokimligining “Yagona buyurtmachi xizmati” injiniring kompaniyasi — buyurtmachi etib belgilansin;

bosh loyiha va bosh pudratchi tashkilot belgilangan tartibda tender (tanlov) savdolari natijasida aniqlansin.

7. Oʻzbekiston Respublikasi Iqtisodiyot va moliya vazirligi:

asoslangan hisob-kitoblar va tasdiqlangan loyiha-smeta hujjatlariga asosan Oʻzbekiston Respublikasining 2019-yilga moʻljallangan Investitsiya dasturiga qoʻshimcha ravishda kiritiladigan maktab-internatning loyiha-smeta hujjatlarini ishlab chiqish, maktab-internatning 150 oʻrinli oʻquv binosini hamda 100 oʻrinli yotoqxona binosini qurish ishlarini boshlash uchun respublika budjetining qoʻshimcha manbalari hisobidan mablagʻ ajratish choralarini koʻrsin;

Oʻzbekiston Respublikasi Davlat budjeti parametrlarida Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligiga ajratilgan mablagʻlar doirasida ijod maktabining taʼminoti uchun zarur mablagʻlarni nazarda tutsin.

8. Oʻzbekiston Respublikasi Oliy taʼlim, fan va innovatsiyalar vazirligi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi bilan birgalikda maktabga oliy taʼlim muassasalarining oʻzbek tili va adabiyoti fakultetlarini tamomlagan iqtidorli pedagog-kadrlarni jalb etishni taʼminlasin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari A.A. Abduxakimov, Oʻzbekiston Respublikasi xalq taʼlimi vaziri Sh.X. Shermatov va Sirdaryo viloyati hokimi Gʻ.Gʻ. Mirzayev zimmasiga yuklansin.