Oʻzbekiston Respublikasi Prezidentining “Jinoyat-ijroiya qonunchiligini tubdan takomillashtirish chora-tadbirlari toʻgʻrisida” 2018-yil 7-noyabrdagi PQ-4006-son va “Ozodlikdan mahrum etilgan shaxslarni mehnat bilan bandligini taʼminlash boʻyicha qoʻshimcha chora-tadbirlar toʻgʻrisida” 2019-yil 29-yanvardagi PQ-4138-son qarorlari ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Ichki ishlar vazirligi Jazoni ijro etish bosh boshqarmasining jazoni ijro etish muassasalarida 1-ilovaga muvofiq roʻyxat boʻyicha idoraviy umumtaʼlim maktabi va tegishli xalq taʼlimi boʻlimlari umumtaʼlim maktablarining filiallari faoliyat koʻrsatayotganligi maʼlumot uchun qabul qilinsin.

2. Oʻzbekiston Respublikasi Ichki ishlar vazirligi, Xalq taʼlimi vazirligi, Bandlik va mehnat munosabatlari vazirligi hamda Oliy va oʻrta maxsus taʼlim vazirligining:

Toshkent viloyati Ichki ishlar boshqarmasi Probatsiya va jazolarni ijro etish boʻlimi Tarbiya koloniyasining 5-umumtaʼlim maktabini Zangiota tumani xalq taʼlimi boʻlimining 35-umumtaʼlim maktabiga birlashtirish hamda Toshkent viloyati Ichki ishlar boshqarmasi Probatsiya va jazolarni ijro etish boʻlimi Tarbiya koloniyasining 5-umumtaʼlim maktabi mulkiy negizida ushbu umumtaʼlim maktabining filialini tashkil etish;

Oʻzbekiston Respublikasi Oliy va oʻrta maxsus taʼlim vazirligi Kasb-hunar taʼlimi markazining jazoni ijro etish muassasalari hududida joylashgan kasb-hunar taʼlimi muassasalarini 2-ilovaga muvofiq Oʻzbekiston Respublikasi Bandlik va mehnat munosabatlari vazirligi tasarrufiga oʻtkazish hamda ularni kasb-hunarga oʻqitish markazlariga aylantirish toʻgʻrisidagi takliflariga rozilik berilsin.

3. Quyidagilar kasb-hunarga oʻqitish markazlarining asosiy vazifalari etib belgilansin:

milliy gʻoyaga sadoqat va vatanparvarlik ruhida tarbiyalash, maʼnaviy boy, mustaqil dunyoqarashga ega va mustaqil fikrlaydigan barkamol shaxsni shakllantirish;

davlat taʼlim standartlari doirasida mahkumlarning sifat jihatidan yuqori darajada bilim olishi va ularni kasbga tayyorlashni taʼminlaydigan umumtaʼlim hamda kasb-hunar taʼlimi dasturlarini amalga oshirish;

mahkumlarni jazodan ozod etilganidan soʻng jamiyatga moslashtirish maqsadida mehnat bozorida talab etilgan kasblarni egallashi uchun ularga mehnat koʻnikmalarini singdirish va mustahkamlash.

4. Belgilansinki:

umumtaʼlim maktablarining jazoni ijro etish muassasalari qoshidagi filiallari Oʻzbekiston Respublikasi Xalq taʼlimi vazirligining tegishli tuman (shahar) boʻlimlariga boʻysunadi;

umumtaʼlim maktablarining jazoni ijro etish muassasalari qoshidagi filiallarida oʻquvchi mahkumlar sonidan qatʼiy nazar sinflar ochishga ruxsat etiladi;

kasb-hunarga oʻqitish markazlari mustaqil yuridik shaxslar hisoblanadi va Oʻzbekiston Respublikasi Ichki ishlar vazirligining asoslangan buyurtmanomalari boʻyicha tashkil etiladi hamda Oʻzbekiston Respublikasi Bandlik va mehnat munosabatlari vazirligi tasarrufida boʻladi;

umumtaʼlim maktablarining jazoni ijro etish muassasalari qoshidagi filiallari hamda kasb-hunarga oʻqitish markazlari jazoni ijro etish muassasalari hududida joylashtiriladi;

kasb-hunarga oʻqitish markazlarida mahkumlarning muayyan turdagi ishlarni bajarish uchun zarur kasbiy bilim va mehnat koʻnikmalarini egallashini tezlashtirishga qaratilgan oʻquv rejalari va dasturlari asosida taʼlim beriladi;

kasb-hunarga oʻqitish markazlarining rahbarlari, pedagoglari va boshqa xodimlariga Oʻzbekiston Respublikasi Oliy va oʻrta maxsus taʼlim vazirligining Kasb-hunar taʼlimi markazi kasb-hunar taʼlimi muassasalarining tegishli lavozimlari uchun belgilangan bazaviy tarif stavkalariga muvofiq mehnatga haq toʻlash shartlari tatbiq etiladi.

5. Belgilab qoʻyilsinki:

kasb-hunarga oʻqitish markazlari rahbarlari va pedagog xodimlarining mehnatiga haq toʻlash bilan bogʻliq xarajatlar Oʻzbekiston Respublikasi Davlat budjetidan Oʻzbekiston Respublikasi Bandlik va mehnat munosabatlari vazirligiga ajratiladigan mablagʻlar hisobidan;

asbob-uskunalar xarid qilish, umumtaʼlim maktablarining filiallari va kasb-hunarga oʻqitish markazlari binolarini saqlash (kommunal xizmatlar, joriy taʼmirlash va boshqa xarajatlar), xizmat koʻrsatuvchi xodimlar mehnatiga haq toʻlash bilan bogʻliq xarajatlar jazoni ijro etish muassasalarining budjet va budjetdan tashqari mablagʻlari hamda qonun hujjatlarida taqiqlanmagan boshqa manbalar hisobidan moliyalashtiriladi.

6. Oʻzbekiston Respublikasi Ichki ishlar vazirligi:

manfaatdor vazirlik va idoralar bilan hamkorlikda probatsiya xizmati nazorati ostidagi shaxslar mehnat bozorida talab etilgan kasblarni egallashi uchun ularni oʻqitishni tashkil etish toʻgʻrisida ikki oy muddatda taklif kiritsin;

Oʻzbekiston Respublikasi Bandlik va mehnat munosabatlari vazirligi bilan birgalikda kasb-hunarga oʻqitish markazlarida kasb-hunarga qisqa muddatli tayyorlash kasblarining roʻyxatini va kasb-hunarga oʻqitish markazining Ustavini bir oy muddatda ishlab chiqib tasdiqlansin, shuningdek, uning belgilangan tartibda davlat roʻyxatidan oʻtkazilishini taʼminlasin;

Oʻzbekiston Respublikasi Moliya vazirligi hamda Bandlik va mehnat munosabatlari vazirligi bilan kelishgan holda, kasb-hunarga oʻqitish markazlarining shtat normativlarini ikki oy muddatda ishlab chiqsin va tasdiqlasin;

kasb-hunarga oʻqitish markazlarining jazoni ijro etish muassasalari hududida sanitariya qoidalari va normalari, gigiyena normativlari, standartlarga mos binolarda joylashtirilishini, shuningdek, zarur oʻquv asbob-uskunalari, mebel, inventar va boshqa mulk bilan jihozlanishini taʼminlasin.

7. Oʻzbekiston Respublikasi Oliy va oʻrta maxsus taʼlim vazirligi Bandlik va mehnat munosabatlari vazirligi bilan birgalikda 2019/2020 oʻquv yilidan boshlab, kasb-hunarga oʻqitish markazlarini davlat taʼlim standartlari doirasida oʻquv rejalari va dasturlari, shuningdek, ularning kutubxona fondlarini zarur oʻquv-uslubiy adabiyot bilan bosqichma-bosqich taʼminlasin.

8. Oʻzbekiston Respublikasi Xalq taʼlimi vazirligi, Oliy va oʻrta maxsus taʼlim vazirligi, Axborot texnologiyalari va kommunikatsiyalarini rivojlantirish vazirligi va Ichki ishlar vazirligi 2020/2021 oʻquv yilidan boshlab, ozodlikdan mahrum etilgan mahkumlarni oʻqitish jarayoniga zamonaviy axborot-kommunikatsiya va innovatsiya texnologiyalarini bosqichma-bosqich joriy etishni nazarda tutuvchi Harakatlar dasturini ikki oy muddatda ishlab chiqib tasdiqlasin.

9. Oʻzbekiston Respublikasi Moliya vazirligi ushbu qaror qabul qilinishi munosabati bilan Oʻzbekiston Respublikasi Davlat budjeti parametrlariga bir oy muddatda tegishli oʻzgartirishlar kiritsin.

10. Oʻzbekiston Respublikasi Ichki ishlar vazirligi tegishli vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari A.A. Abduxakimov, Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov va Oʻzbekiston Respublikasi ichki ishlar vaziri P.R. Bobojonov, bandlik va mehnat munosabatlari vaziri Sh.D. Kudbiyev zimmasiga yuklansin.

1. Toshkent viloyati Ichki ishlar boshqarmasi Probatsiya va jazolarni ijro etish boʻlimi Tarbiya koloniyasining 5-umumtaʼlim maktabi.

2. Toshkent viloyati Zangiota tumani xalq taʼlimi boʻlimi 35-umumtaʼlim maktabining Toshkent viloyati Ichki ishlar boshqarmasi Probatsiya va jazolarni ijro etish boʻlimining 21-son jazoni ijro etish koloniyasi qoshidagi filiali.

3. Toshkent viloyati Boʻstonliq tumani xalq taʼlimi boʻlimi 7-umumtaʼlim maktabining Toshkent viloyati Ichki ishlar boshqarmasi Probatsiya va jazolarni ijro etish boʻlimining 12-son jazoni ijro etish koloniyasi qoshidagi filiali.

4. Toshkent viloyati Chirchiq shahar xalq taʼlimi boʻlimi 22-umumtaʼlim maktabining Toshkent viloyati Ichki ishlar boshqarmasi Probatsiya va jazolarni ijro etish boʻlimining 13-son jazoni ijro etish koloniyasi qoshidagi filiali.

5. Navoiy viloyati Navoiy shahar xalq taʼlimi boʻlimi 4-umumtaʼlim maktabining Navoiy viloyati Ichki ishlar boshqarmasi Probatsiya va jazolarni ijro etish boʻlimining 4-son jazoni ijro etish koloniyasi qoshidagi filiali.

6. Navoiy viloyati Qiziltepa tumani xalq taʼlimi boʻlimi 5-umumtaʼlim maktabining Navoiy viloyati Ichki ishlar boshqarmasi Probatsiya va jazolarni ijro etish boʻlimining 5-son jazoni ijro etish koloniyasi qoshidagi filiali.

1. Toshkent viloyati Ichki ishlar boshqarmasi Probatsiya va jazolarni ijro etish boʻlimi 21-son jazoni ijro etish koloniyasi qoshidagi 22-son kasb-hunar maktabi.

2. Toshkent viloyati Ichki ishlar boshqarmasi Probatsiya va jazolarni ijro etish boʻlimining Tarbiya koloniyasi qoshidagi 24-son kasb-hunar maktabi.

3. Qarshi qurilish kasb-hunar kollejining Qashqadaryo viloyati Ichki ishlar boshqarmasi Probatsiya va jazolarni ijro etish boʻlimi 2-son jazoni ijro etish koloniyasi qoshidagi boʻlimi.

4. Koson shahar “Agrobiznes” kasb-hunar kollejining Qashqadaryo viloyati Ichki ishlar boshqarmasi Probatsiya va jazolarni ijro etish boʻlimi 10-son jazoni ijro etish koloniyasi qoshidagi boʻlimi.