So‘nggi yillarda respublikamizda chet el investitsiyalarini, shu jumladan xalqaro moliya institutlari va xorijiy hukumat moliya tashkilotlarining (keyingi o‘rinlarda XMI va XHMT deb ataladi) mablag‘larini investitsiya loyihalari, avvalambor, aholining hayot darajasi va sifatini oshirishga qaratilgan loyihalarni amalga oshirish uchun faol jalb qilish chora-tadbirlari amalga oshirildi.

Mavjud holat yuzasidan o‘tkazilgan tahlil investitsiya loyihalarini samarali amalga oshirishga to‘sqinlik qilayotgan, investitsiya loyihalarining loyihaoldi va loyiha hujjatlarini ishlab chiqish uchun moliyalashtirish manbalarini belgilashning cho‘zilishi, shuningdek, hujjatlarning dastlabki bosqichda sifat jihatidan past darajada ishlab chiqilishi bilan bog‘liq tizimli muammolar mavjudligidan dalolat beradi va bu ko‘pincha loyihalarni tayyorlash cho‘zilib ketishiga hamda loyihalarni XMI va XHMT, shuningdek, manfaatdor vazirlik va idoralar bilan kelishish jarayonida ko‘p marotaba qayta ishlashga sabab bo‘lmoqda.

XMI va XHMT mablag‘laridan foydalanish mexanizmini yanada takomillashtirish, shuningdek, jalb qilinadigan qarz mablag‘larini o‘zlashtirish samaradorligini oshirish maqsadida Vazirlar Mahkamasi qaror qiladi:

1. O‘zbekiston Respublikasi Iqtisodiyot va sanoat vazirligi, Moliya vazirligi va Investitsiyalar bo‘yicha davlat qo‘mitasining O‘zbekiston Respublikasi Vazirlar Mahkamasi huzuridagi O‘zbekiston Respublikasining rivojlanish davlat dasturlarini moliyalashtirish jamg‘armasi (keyingi o‘rinlarda Jamg‘arma deb ataladi) mablag‘larining bir qismini XMI hamda XHMT mablag‘lari ishtirokidagi investitsiya loyihalarining loyihaoldi va loyiha hujjatlarini ishlab chiqish ishlarini moliyalashtirishga yo‘naltirish to‘g‘risidagi taklifiga rozilik berilsin.

2. Belgilab qo‘yilsinki, XMI hamda XHMT mablag‘lari ishtirokidagi investitsiya loyihalarining loyihaoldi va loyiha hujjatlarini ishlab chiqish ishlari quyidagicha moliyalashtiriladi:

a) Jamg‘arma mablag‘larini faqat tashabbuskor budjet tashkilotlarining loyihalariga jalb qilish:

bunda investitsiya loyihasini O‘zbekiston Respublikasining XMI va XHMT bilan hamkorlik strategiyasiga (dasturiga) kiritish sharti bilan;

O‘zbekiston Respublikasi Investitsiyalar bo‘yicha davlat qo‘mitasi va Moliya vazirligi bilan belgilangan tartibda kelishilgan loyiha tashabbuskori — vazirlik va idoraning har yili tasdiqlanadigan loyiha-qidiruv ishlarining manzilli ro‘yxatiga asosan;

b) Jamg‘arma mablag‘larini quyidagi holatlarda jalb qilmagan holda:

XMI va XHMT ushbu maqsadga grant taqdim etsa (texnik ko‘maklashish);

loyihaoldi va loyiha hujjatlarini investitsiya loyihalari doirasida jalb etiladigan qarz mablag‘lar hisobidan ishlab chiqish nazarda tutilsa.

3. O‘zbekiston Respublikasi Investitsiyalar bo‘yicha davlat qo‘mitasi:

Moliya vazirligi bilan birgalikda kelgusi yillar uchun O‘zbekiston Respublikasining rivojlanish davlat dasturlarini shakllantirishda XMI va XHMT mablag‘lari ishtirokida amalga oshirilishi rejalashtirilayotgan investitsiya loyihalarining loyihaoldi va loyiha hujjatlarini ishlab chiqish uchun budjet mablag‘lari ajratilishini nazarda tutsin;

“O‘zInjiniring” respublika loyiha instituti bilan birgalikda XMI va XHMT mablag‘larini jalb etgan holda amalga oshiriladigan loyihalar tashabbuskorlari — vazirliklar va idoralarning investitsiya bo‘linmalari xodimlarining malakasi oshirilishini tizimli asosda ta’minlash maqsadida loyiha jarayoni bo‘yicha o‘quv kurslari hamda seminarlarni muntazam tashkil qilsin va bunda investitsiya loyihalarining loyihaoldi hamda loyiha hujjatlarini ishlab chiqish borasidagi o‘quv dasturlarining mazmuni va samaradorligiga alohida e’tibor qaratsin.

4. O‘zbekiston Respublikasi Qurilish vazirligi manfaatdor vazirlik va idoralar bilan birgalikda, shuningdek, yetakchi mahalliy loyiha tashkilotlarini jalb qilgan holda, investitsiya loyihalari bo‘yicha loyiha-qidiruv ishlarining qiymatini belgilash tartibi to‘g‘risidagi nizomni 2019-yil 1-aprelgacha bo‘lgan muddatda ishlab chiqsin hamda tasdiqlasin.

6. Ushbu qarorning bajarilishini nazorat qilish O‘zbekiston Respublikasi Bosh vazirining o‘rinbosari — Investitsiyalar bo‘yicha davlat qo‘mitasi raisi S.R. Xolmuradov va O‘zbekiston Respublikasi Bosh vazirining o‘rinbosari — moliya vaziri J.A. Qo‘chqorov zimmasiga yuklansin.