Chiqindilar bilan bog‘liq ishlarni amalga oshirish tizimini yanada rivojlantirish, chiqindilarni qayta ishlashda yuqori texnologiyalar qo‘llanilgan ishlab chiqarishlarni rivojlantirishga to‘g‘ridan-to‘g‘ri investitsiyalarni amalga oshirayotgan xorijiy investorlar uchun qulay investitsiya muhitini yaratish, ushbu sohaga xorijiy investitsiyalar va zamonaviy texnologiyalarni jalb etish maqsadida:

1. O‘zbekiston Respublikasi Prezidentining “To‘g‘ridan-to‘g‘ri xususiy xorijiy investitsiyalarni jalb etishni rag‘batlantirish borasidagi qo‘shimcha chora-tadbirlar to‘g‘risida”gi 2005-yil 11-apreldagi PF-3594-son Farmonida:

a) 2-bandning ikkinchi xatboshisi “va chiqindilar bilan bog‘liq ishlarni amalga oshirish” so‘zlari bilan to‘ldirilsin;

b) ilovaga quyidagi mazmundagi 22-band qo‘shilsin:

“22. Chiqindilar bilan bog‘liq ishlarni amalga oshirish”.

2. Mazkur Farmonning ijrosini nazorat qilish O‘zbekiston Respublikasining Bosh vaziri A.N. Aripov zimmasiga yuklansin.