Oʻzbekiston Respublikasi Prezidentining “Oʻzbekiston Respublikasi Vazirlar Mahkamasi ijro etuvchi tuzilmasiga qisman oʻzgartirish kiritish toʻgʻrisida” 2018-yil 23-martdagi PQ-3622-son qaroriga muvofiq Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Oʻzbekiston Respublikasi Investitsiyalar boʻyicha davlat qoʻmitasi raisi S.R. Xolmuradov, Oʻzbekiston Respublikasi Bosh vazirining oʻrinbosarlari N.S. Otajonov, Z.T. Mirzayev, Oʻzbekiston Respublikasi Vazirlar Mahkamasining Axborot tizimlari va telekommunikatsiyalarni rivojlantirish masalalari, Investitsiyalar, innovatsion rivojlantirish, erkin iqtisodiy va kichik sanoat zonalari faoliyatini muvofiqlashtirish, turizm masalalari hamda Qishloq va suv xoʻjaligi, qishloq xoʻjaligi va oziq-ovqat mahsulotlarini qayta ishlash masalalari axborot-tahlil departamentlari mudirlari zimmasiga yuklansin.

1. Vazirlar Mahkamasining 2017-yil 24-sentabrdagi 756-son qarori bilan tasdiqlangan Axborot tizimlari va telekommunikatsiyalarni rivojlantirish masalalari axborot-tahlil departamenti toʻgʻrisidagi Nizomda:

a) 2-band quyidagi tahrirda bayon qilinsin:

“2. Departamentning faoliyati Vazirlar Mahkamasini, uning Rayosatini, shuningdek, Vazirlar Mahkamasi apparatini axborot-kommunikatsiya texnologiyalarini rivojlantirish, milliy axborot makoni monitoringi va axborot xavfsizligini taʼminlash, telekommunikatsiyalar, pochta va arxiv ishini rivojlantirish masalalari boʻyicha axborot-tahliliy materiallar bilan taʼminlashga yoʻnaltirilgan”;

b) 6-bandning “g” kichik bandi quyidagi tahrirda bayon qilinsin:

“g) telekommunikatsiyalarni, pochta va arxiv ishini rivojlantirish sohasida:

telekommunikatsiyalar va teleradioeshittirish tarmoqlarini, pochta, arxiv ishi va ish yuritishni rivojlantirish masalalarida davlat siyosati shakllantirilishi va amalga oshirilishi taʼminlanishida qatnashish;

iqtisodiy islohotlarning amalga oshirilishini, telekommunikatsiyalar va teleradioeshittirish tarmoqlarini, pochta, arxiv ishi va ish yuritishni rivojlantirishda sifat oʻzgarishlari va tendensiyalarni baholashni tizimli va kompleks oʻrganishni tashkil etish;

telekommunikatsiyalar sohasida ishlab chiqarishni mahalliylashtirish darajasini yanada chuqurlashtirishni, tarmoqlararo sanoat kooperatsiyasini kengaytirishni taʼminlash, importning oʻrnini bosishni va mahalliy xomashyo resurslari bazasida ichki bozorni zarur isteʼmol tovarlari va butlovchi buyumlar bilan taʼminlaydigan zamonaviy, yuqori texnologiyali raqobatbardoshli ishlab chiqarishlarni tashkil etish;

telekommunikatsiyalar va pochta sohasidagi tashkilotlarda korporativ boshqaruvning zamonaviy usullarini joriy etishni tashkil etish, ishlab chiqarish, investitsiya, moddiy-texnik, moliyaviy va mehnat resurslaridan foydalanish samaradorligini oshirish;

telekommunikatsiyalar, teleradioeshittirish, pochta, arxiv ishi va ish yuritish masalalari boʻyicha Oʻzbekiston Respublikasi qonunlari, Oʻzbekiston Respublikasi Prezidentining farmonlari, qarorlari, farmoyishlari va topshiriqlari, Vazirlar Mahkamasining qarorlari va farmoyishlari bajarilishini tashkil etish;

telekommunikatsiyalar, teleradioeshittirish, pochta,arxiv ishi va ish yuritish masalalari boʻyicha davlat va xoʻjalik boshqaruvi organlari, mahalliy ijro etuvchi hokimiyat organlari va boshqa tashkilotlar faoliyatini muvofiqlashtirish;

telekommunikatsiya infratuzilmasini yanada rivojlantirish va modernizatsiyalash, shu jumladan, Internet butunjahon tarmogʻining axborot tizimlari va resurslaridan, mobil va yoʻldosh aloqa tarmoqlaridan keng polosali foydalanishni kengaytirish, telefon aloqasi va teleradioeshittirishning raqamli tizimlariga toʻliq oʻtishni taʼminlash;

umumiy qabul qilingan xalqaro normalar va standartlarga muvofiq axborot-kommunikatsiya texnologiyalari va telekommunikatsiyalar, pochta aloqasi, axborotlashtirish va radiochastota spektri sohasida qonunchilikni yanada takomillashtirish boʻyicha takliflar tayyorlash;

telekommunikatsiyalar va pochta korxonalarini davlat tasarrufidan chiqarish va xususiylashtirish jarayonlarini muvofiqlashtirish;

telekommunikatsiyalar va teleradioeshittirish, pochta sohalarida iqtisodiy islohotlarni yanada chuqurlashtirish, ushbu sohalarda boshqaruv shakllari, usullari va tuzilmasini takomillashtirish boʻyicha takliflar tayyorlash;

davlat va xoʻjalik boshqaruvi organlarida, mahalliy ijro etuvchi hokimiyat organlarida va boshqa tashkilotlarda arxiv ishi va ish yuritishning ahvoli monitoringini olib borish va ularni tahlil qilish, arxiv ishi tizimi ishlarining samaradorligini oshirish va takomillashtirish, Oʻzbekiston Respublikasi Milliy arxiv fondi hujjatlari saqlanishini taʼminlash, davlat va xoʻjalik boshqaruvi organlarida, mahalliy ijro etuvchi hokimiyat organlarida va boshqa davlat tashkilotlarida ish yuritishning, shu jumladan, elektron hujjatlar aylanishi tizimini qoʻllagan holda ish yuritishning samaradorligi va funksionalligini oshirish boʻyicha takliflar ishlab chiqish;

telekommunikatsiyalar va pochta tashkilotlarining eksport salohiyatini rivojlantirish masalalari boʻyicha monitoring olib borilishini tashkil etish va uni tahlil qilish va takliflar tayyorlash;

telekommunikatsiyalar va teleradioeshittirish tarmoqlari va vositalarini, pochta va arxiv ishini modernizatsiya qilish va texnika bilan qayta jihozlash hamda ushbu sohalarga xorijiy investitsiyalar va texnologiyalarni jalb etish masalalari boʻyicha ishlarni muvofiqlashtirish;

telekommunikatsiyalar va pochta xizmatlari sifatini oshirish, ularning xalqaro standartlarga muvofiqligini taʼminlash, pochta va telekommunikatsiyalar xizmatlaridan foydalanuvchilar huquqlarini himoya qilish masalalarini oʻrganish, tahlil qilish va ular yuzasidan takliflar ishlab chiqish;

telekommunikatsiyalar va pochta sohasi, shuningdek, mutasaddilik qilinadigan boshqa tarmoqlar uchun yuqori malakali kadrlar tayyorlashning holati monitoringini olib borish, ularning zarur ixtisosdagi kadrlarga boʻlgan ehtiyojini taʼminlash yuzasidan takliflar ishlab chiqish;

innovatsion texnologiyalar va ixtirolar, ilmiy-texnika va sanoat ishlanmalari, badiiy-konstruktorlik va ijodiy ishlarning boshqa turlari ishlab chiqarishga keng joriy etilishini monitoring qilish, tahlil qilishni tashkil etish va ular yuzasidan takliflar tayyorlash;

arxiv ishi va ish yuritish sohasiga axborot-kommunikatsiya texnologiyalari keng joriy etilishini tashkil qilish;

davlat va xoʻjalik boshqaruvi organlari bilan birgalikda arxiv ishi va ish yuritish samaradorligini oshirish va rivojlantirish vazifalarini kompleks hal etishni tashkil qilish;

telekommunikatsiyalar va teleradioeshittirish, pochta sohalarida, axborot bozorini tartibga solish, arxiv ishi va ish yuritish sohasida xalqaro hamkorlik qilish monitoringini olib borish va uni tahlil qilish, ushbu sohalarda xalqaro tashkilotlar va xorijiy mamlakatlar bilan hamkorlikni yanada kengaytirish va uning samaradorligini oshirish boʻyicha takliflar ishlab chiqish”;

v) 10-bandning toʻrtinchi xatboshi quyidagi tahrirda bayon qilinsin:

“telekommunikatsiyalar, pochta va arxiv ishini rivojlantirish masalalari shuʼbasi”.

2. Vazirlar Mahkamasining “Oʻzbekiston Respublikasi Bosh vazirining oʻrinbosari — “Oʻzagrotexsanoatxolding” AJ boshqaruvi raisi — Tashqi savdo faoliyatini, eksport salohiyatini, mashinasozlik, avtomobil, elektrotexnika, mudofaa, paxtani qayta ishlash sanoatini va yengil sanoatni rivojlantirish, mahsulotlarni standartlashtirish masalalari kompleksi rahbarining funksional vazifalari va uning tarkibiga kiruvchi departamentlar toʻgʻrisidagi nizomlarni tasdiqlash haqida” 2017-yil 19-dekabrdagi 997-son qarorida:

a) qarorning nomidagi, 1-bandning ikkinchi xatboshidagi, 2 va 4-bandlardagi “— “Oʻzagrotexsanoatxolding” AJ boshqaruvi raisi” soʻzlari chiqarib tashlansin;

b) qarorning nomidagi va 1-ilovaning 1-bandidagi “—Oʻzagrotexsanoatxolding” AJ boshqaruvi raisi” soʻzlari chiqarib tashlansin;

v) 2-ilova 4-bandining ikkinchi xatboshidagi “—Oʻzagrotexsanoatxolding” AJ boshqaruvi raisi” soʻzlari chiqarib tashlansin;

g) 3-ilova 4-bandining ikkinchi xatboshidagi “—Oʻzagrotexsanoatxolding” AJ boshqaruvi raisi” soʻzlari chiqarib tashlansin.

3. Vazirlar Mahkamasining “Oʻzbekiston Respublikasi Bosh vazirining oʻrinbosari — Oʻzbekiston Respublikasi Investitsiyalar boʻyicha davlat qoʻmitasi raisi — Investitsiyalar, innovatsion rivojlantirish, erkin iqtisodiy va kichik sanoat zonalari faoliyatini muvofiqlashtirish, turizm masalalari kompleksi rahbarining funksional vazifalari va Investitsiyalar, innovatsion rivojlantirish, erkin iqtisodiy va kichik sanoat zonalari faoliyatini muvofiqlashtirish, turizm masalalari axborot-tahlil departamenti toʻgʻrisidagi nizomlarni tasdiqlash haqida” 2017-yil 22-dekabrdagi 1014-son qarorida:

a) 1-ilovada:

1-band quyidagi tahrirda bayon qilinsin:

“1. Ushbu Nizom Oʻzbekiston Respublikasi Prezidentining “Oʻzbekiston Respublikasi Vazirlar Mahkamasi ijro etuvchi tuzilmasiga qisman oʻzgartirishlar kiritish toʻgʻrisida” 2018-yil 19-fevraldagi PQ-3545-son, “Oʻzbekiston Respublikasi Vazirlar Mahkamasi ijro etuvchi tuzilmasiga qisman oʻzgartirishlar kiritish toʻgʻrisida” 2018-yil 23-fevraldagi PQ-3560-son, “Oʻzbekiston Respublikasi Vazirlar Mahkamasi ijro etuvchi tuzilmasiga qisman oʻzgartirishlar kiritish toʻgʻrisida” 2018-yil 23-martdagi PQ-3622-son qarorlariga muvofiq Oʻzbekiston Respublikasi Bosh vazirining oʻrinbosari — Oʻzbekiston Respublikasi Investitsiyalar boʻyicha davlat qoʻmitasi raisi — Investitsiyalar, innovatsion rivojlantirish, erkin iqtisodiy va kichik sanoat zonalari faoliyatini muvofiqlashtirish, turizm masalalari kompleksi rahbarining (keyingi oʻrinlarda Bosh vazir oʻrinbosari deb ataladi) funksional vazifalarini belgilaydi”;

7-bandda:

“v” kichik bandga quyidagi mazmundagi xatboshilar qoʻshilsin:

“intellektual mulk obyektlarini huquqiy muhofaza qilish va ularga boʻlgan huquqlarni himoya qilishning samarali tizimi faoliyat koʻrsatishi monitoringini olib borish va uni taʼminlash, Oʻzbekiston Respublikasining xalqaro majburiyatlarini hisobga olgan holda ushbu tizim ishlari samaradorligini oshirish va uni yanada takomillashtirish boʻyicha takliflar ishlab chiqish;

EHM uchun audiovizual asarlar, fonogrammalar va dasturlar tarqatish masalalari boʻyicha, soxta mahsulotlar tarqalishining oldini olish usullarini takomillashtirish boʻyicha takliflar tayyorlash orqali davlat va xoʻjalik boshqaruvi organlari, mahalliy ijro etuvchi hokimiyat organlari va boshqa tashkilotlarning faoliyatini muvofiqlashtirishni taʼminlash;

innovatsion texnologiyalar va ixtirolar, ilmiy-texnika va sanoat ishlanmalari, badiiy-konstruktorlik va ijodiy ishlarning boshqa turlari ishlab chiqarishga keng joriy etilishini monitoring qilish, tahlil qilishni tashkil etish va ular yuzasidan takliflar tayyorlash ishlarini muvofiqlashtirish”;

“g” kichik bandga quyidagi mazmundagi xatboshilar qoʻshilsin:

“vino ishlab chiqarish tarmogʻini yanada rivojlantirish, uzumning texnik navlari plantatsiyalari maydonlari kengaytirish va yuqori sifatli xomashyo bazasini yaratish, alkogolli, likyor-araq va vino mahsulotlari ishlab chiqarishga ilgʻor texnologiyalarni joriy etish, mahsulot sotish bozorlarini kengaytirish va tarmoqning eksport salohiyatini oshirish ishlarini muvofiqlashtirish;

manfaatdor vazirliklar, idoralar bilan birgalikda etil spirtini ishlab chiqarish va ishlatish balansi oʻz vaqtida va sifatli ishlab chiqilishi va kelishilishini taʼminlash”;

b) 2-ilovaning 6-bandida:

“v” kichik bandga quyidagi mazmundagi xatboshilar qoʻshilsin:

“intellektual mulk obyektlarini huquqiy muhofaza qilish va ularga boʻlgan huquqlarni himoya qilishning samarali tizimi faoliyat koʻrsatishi monitoringini olib borish va uni taʼminlash, Oʻzbekiston Respublikasining xalqaro majburiyatlarini hisobga olgan holda ushbu tizim ishlari samaradorligini oshirish va uni yanada takomillashtirish boʻyicha takliflar ishlab chiqish;

EHM uchun audiovizual asarlar, fonogrammalar va dasturlar tarqatish masalalari boʻyicha, soxta mahsulotlar tarqalishining oldini olish usullarini takomillashtirish boʻyicha takliflar tayyorlash orqali davlat va xoʻjalik boshqaruvi organlari, mahalliy ijro etuvchi hokimiyat organlari va boshqa tashkilotlarning faoliyatini muvofiqlashtirish;

innovatsion texnologiyalar va ixtirolar, ilmiy-texnika va sanoat ishlanmalari, badiiy-konstruktorlik va ijodiy ishlarning boshqa turlari ishlab chiqarishga keng joriy etilishini monitoring qilish, tahlil qilishni tashkil etish va ular yuzasidan takliflar tayyorlash”;

“g” kichik bandga quyidagi mazmundagi xatboshilar qoʻshilsin:

“vino ishlab chiqarish tarmogʻini yanada rivojlantirish, uzumning texnik navlari plantatsiyalari maydonlari kengaytirish va yuqori sifatli xomashyo bazasini yaratish, alkogolli, likyor-araq va vino mahsulotlari ishlab chiqarishga ilgʻor texnologiyalarni joriy etish, mahsulot sotish bozorlarini kengaytirish va tarmoqning eksport salohiyatini oshirish ishlarini muvofiqlashtirish;

etil spirtini ishlab chiqarish va ishlatish balansi oʻz vaqtida va sifatli ishlab chiqilishi va kelishilishini nazorat qilish”.

4. Vazirlar Mahkamasining “Oʻzbekiston Respublikasi Bosh vazirining oʻrinbosari — Qishloq va suv xoʻjaligi, qishloq xoʻjaligi va oziq-ovqat mahsulotlarini qayta ishlash masalalari kompleksi rahbarining funksional vazifalari hamda Qishloq va suv xoʻjaligi, qishloq xoʻjaligi va oziq-ovqat mahsulotlarini qayta ishlash masalalari axborot-tahlil departamenti toʻgʻrisidagi nizomlarni tasdiqlash haqida” 2018-yil 2-martdagi 163-son qarorida:

a) 1-ilova 6-bandining “g” kichik bandida:

uchinchi xatboshidagi “vinochilik” soʻzi chiqarib tashlansin;

oʻn toʻrtinchi xatboshi chiqarib tashlansin;

oʻn beshinchi — yigirma oltinchi xatboshilar tegishli ravishda oʻn toʻrtinchi — yigirma beshinchi xatboshilar deb hisoblansin;

oʻn oltinchi xatboshidagi “oziq-ovqat spirti” soʻzlari chiqarib tashlansin;

b) 2-ilova 6-bandining “g” kichik bandida:

uchinchi xatboshidagi “vinochilik” soʻzi chiqarib tashlansin;

oʻn toʻrtinchi xatboshi chiqarib tashlansin;

oʻn beshinchi — yigirma beshinchi xatboshilar tegishli ravishda oʻn toʻrtinchi — yigirma toʻrtinchi xatboshilar deb hisoblansin;

oʻn oltinchi xatboshidagi “oziq-ovqat spirti” soʻzlari chiqarib tashlansin.