Yuridik va jismoniy shaxslar tomonidan avtomototransport vositalarini sotib olish, ulardan foydalanish va ularni boshqa shaxslarga berishni hamda ularni Oʻzbekiston Respublikasi Ichki ishlar vazirligining Davlat yoʻl harakati xavfsizligi xizmati organlarida roʻyxatdan oʻtkazishni tartibga solish, shuningdek jinoyatchilikning oldini olish chora-tadbirlarini kuchaytirish va respublikaning iqtisodiy manfaatlarini himoya qilish maqsadida Vazirlar Mahkamasi qaror qiladi:

1. Belgilansinki:

Oʻzbekiston Respublikasi Ichki ishlar vazirligining Davlat yoʻl harakati xavfsizligi xizmati organlarida roʻyxatdan oʻtkazilishi kerak boʻlgan avtomototransport vositalarining oldi-sotdi shartnomalarini rasmiylashtirish faqat notariuslar, shuningdek savdo qilish huquqiga tegishli ruxsatnomaga ega boʻlgan ixtisoslashtirilgan savdo korxonalari (avtomototransport ishlab chiqaruvchi korxonalar, ularning vakillari hamda vositachi (distribyutor) tashkilotlar tomonidan amalga oshiriladi. Avtomototransport vositalari Davlat mulki qoʻmitasi va uning hududiy boshqarmalari, shuningdek Oʻzbekiston Respublikasi Adliya vazirligi huzuridagi Sud qarorlari ijrosi, sudlar faoliyatini moddiy-texnika jihatidan va moliyaviy taʼminlash departamentining hududiy boʻlimlari sud ijrochilarining tuman (shahar) boʻlinmalari sud ijrochilari tomonidan belgilangan tartibda kimoshdi savdolari orqali sotilishi mumkin:

oldi-sotdi shartnomasi rasmiylashtirilgunga qadar agregatlar raqamlarining roʻyxatdan oʻtkazilgan raqamlarga muvofiqligini aniqlash uchun avtomototransport vositasi Oʻzbekiston Respublikasi Ichki ishlar vazirligining Davlat yoʻl harakati xavfsizligi xizmati organlarida koʻrikdan oʻtkazilishi shart;

respublika hududiga boshqa davlatlardan olib kelingan avtomototransport vositalarini boshqa shaxslarga berish ular bojxona organlarida roʻyxatdan oʻtkazilgach va Oʻzbekiston Respublikasi Ichki ishlar vazirligining Davlat yoʻl harakati xavfsizligi xizmati organlarida hisobga olingandan keyin amalga oshiriladi.

2. Oʻzbekiston Respublikasi Ichki ishlar vazirligining Davlat yoʻl harakati xavfsizligi xizmati organlari tomonidan hisobga olinmagan avtomobillarni bozorlarda sotish taqiqlansin.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston Respublikasi Ichki ishlar vazirligi, Adliya vazirligi, Davlat soliq qoʻmitasi, Markaziy bank va tijorat banklarining tegishli boʻlinmalari bilan birgalikda avtomototransport vositalarini boshqa shaxslarga berish bitimlarini oʻz vaqtida va sifatli rasmiylashtirish maqsadida bir oy muddatda:

avtomototransport vositalarini roʻyxatdan oʻtkazish xizmatlari, notarial idoralar, banklar boʻlimlari va avtomototransport bozorlari hududlarining yongʻin xavfsizligini taʼminlash xizmatlarini joylashtirish va ular ishini tashkil etish uchun avtomototransport bozorlari hududida zarur joylar ajratish choralarini koʻrsinlar;

avtomototransport bozorlari hududida ish koʻrayotgan oʻzlariga qarashli boʻlinmalarning ishi va oʻzaro hamkorligining yagona tartibini ishlab chiqsinlar va tasdiqlasinlar.

4. Oʻzbekiston Respublikasi Adliya vazirligi:

Oʻzbekiston Respublikasi Ichki ishlar vazirligi bilan birgalikda amaldagi avtomototransport vositalariga nisbatan bitimlar va ishonchnomalarni rasmiylashtirish tartibi toʻgʻrisidagi fuqarolik qonunchiligiga oʻzgartirish va qoʻshimchalar kiritish haqida bir oy muddatda Vazirlar Mahkamasiga taklif kiritsin;

Oʻzbekiston Respublikasi rezidentlari boʻlmagan shaxslarga avtomototransport vositalari ijara shartnomalarini, shuningdek avtomototransport vositalariga nisbatan vakolatlarni boshqa shaxsga oʻtkazish huquqini beruvchi ishonchnomalarni notarial rasmiylashtirishni vaqtincha taqiqlasin.

5. Vazirlar Mahkamasining 1994-yil 3-noyabrdagi 533-son qarori bilan tasdiqlangan Davlat boji stavkalari 4-bandi “p” kichik bandining toʻrtinchi xatboshidagi “eng kam ish haqining 10 baravari miqdorida” soʻzlari “eng kam oylik ish haqining 20 baravari miqdorida” soʻzlari bilan almashtirilsin.

6. Mazkur qarorning bajarilishini nazorat qilish Oʻzbekiston Respublikasi Prezidentining Davlat maslahatchisi T.A. Xudoybergenov zimmasiga yuklansin.