Tashqi savdoni yanada erkinlashtirish, tadbirkorlik subyektlarining tashqi iqtisodiy faoliyatda keng ishtirok etishi uchun teng va qulay sharoitlar yaratish, shuningdek, savdo operatsiyalarini amalga oshirishda ortiqcha toʻsiq va gʻovlarni bartaraf etish maqsadida:

1. Oʻzbekiston Respublikasi Prezidenti huzuridagi Loyiha boshqaruvi milliy agentligi va “Oʻzstandart” agentligining Oʻzbekiston Respublikasiga import qilinadigan tovarlarni yuklashdan oldin majburiy inspeksiyadan oʻtkazish tartibotini bekor qilish haqidagi taklifi qabul qilinsin.

2. Belgilab qoʻyilsinki:

Oʻzbekiston Respublikasiga import qilinadigan tovarlarni yuklashdan oldin inspeksiyadan oʻtkazish ixtiyoriy asosda amalga oshiriladi;

Oʻzbekiston Respublikasiga import qilinadigan tovarlarni yuklashdan oldin inspeksiyadan oʻtkazish xizmatlarini koʻrsatish huquqiga vakolatli organ tomonidan xalqaro standartlar talablariga muvofiq akkreditatsiya qilingan inspeksiya organlari ega;

inspeksiya organlarining xizmatlari, shu jumladan yuk ortishdan oldin inspeksiyadan oʻtkazish xizmatlari uchun haq toʻlash ularning Oʻzbekiston Respublikasi hududidagi banklarda ochilgan hisob raqamlari orqali amalga oshiriladi;

Oʻzbekiston Respublikasiga import qilinadigan tovarlar sifati, miqdori va narxlarining “Oʻzbekiston Respublikasi Prezidenti huzuridagi Loyiha boshqaruvi milliy agentligi qoshidagi Loyihalar va import kontraktlarini kompleks ekspertiza qilish markazi” DUKda (keyingi oʻrinlarda — Markaz) roʻyxatdan oʻtgan import kontraktlari shartlariga muvofiqligini taʼminlash boʻyicha zarur choralarni koʻrish uchun javobgarlik import qiluvchining mansabdor shaxslari zimmasiga yuklatiladi;

davlat bojxona xizmati organlari Markazda roʻyxatdan oʻtgan import kontraktlari doirasida erkin muomalaga chiqarilgan tovarlarning miqdori va narxlari haqidagi maʼlumotlarni axborot tizimlaridan foydalangan holda Markazga taqdim etadi.

3. Davlat organlari va tashkilotlariga, shuningdek, tijorat banklariga yuk ortishdan oldin inspeksiyani oʻtkazuvchi inspeksiya organini tanlash haqida import qiluvchilarga tavsiyalar berish taqiqlansin.

4. Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti “Oʻzstandart” agentligi va Davlat bojxona qoʻmitasi bilan birgalikda ikki oy muddatda, mazkur qaror talablaridan kelib chiqib, davlat manfaatlariga yetkazilgan zararni qoplash kafolatlarini taʼminlovchi mexanizmlarni joriy etgan holda import qiluvchilar va vakolatli davlat organlari mansabdor shaxslarining javobgarligini kuchaytirish boʻyicha takliflar kiritsin.

5. Oʻzbekiston Respublikasi Moliya vazirligi bir oy muddatda akkreditatsiya obyektlari tomonidan vakolatli organga oʻtkaziladigan toʻlovlarni undirish shartlari va miqdorlarining tanqidiy qayta koʻrib chiqilishini taʼminlasin.

6. Belgilansinki, Markaz faoliyati sohasi tatbiq etiladigan tovarlar, ishlar va xizmatlar xaridlarini oʻtkazish (xarid tartibotlarini bajarish, reklama ishlarini tashkil etish, tender va boshqa hujjatlarni rasmiylashtirish va boshqalar) boʻyicha ixtisoslashgan tashkilotni tanlash Oʻzbekiston Respublikasi Prezidenti huzuridagi Loyiha boshqaruvi milliy agentligi tomonidan oʻrnatiladigan talablarga javob beradigan ixtisoslashgan tashkilotlar orasidan tanlov asosida amalga oshiriladi.

Oʻzbekiston Respublikasi Prezidenti huzuridagi Loyiha boshqaruvi milliy agentligi bir oy muddatda davlat xaridlarini oʻtkazish boʻyicha xizmatlar koʻrsatish huquqiga ega ixtisoslashgan tashkilotlarga qoʻyiladigan talablarni, shuningdek, davlat xaridlarini oʻtkazish doirasida ixtisoslashgan tashkilotlar tomonidan koʻrsatiladigan xizmatlar turlari roʻyxatini oʻrnatilgan tartibda belgilasin.

7. “Oʻzstandart” agentligi manfaatdor vazirliklar va idoralar bilan birgalikda bir oy muddatda qonun hujjatlariga mazkur qarordan kelib chiqadigan oʻzgartish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

8. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

9. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidenti huzuridagi Loyiha boshqaruvi milliy agentligi direktori Sh.M. Sadikov va Oʻzbekiston Respublikasining Bosh prokurori O.B. Murodov zimmasiga yuklansin.