“Mahsulot taqsimotiga oid bitim shartlari asosida Oʻzbekiston Respublikasining Surxondaryo viloyatida gaz-kimyo kompleksi qurilishi bilan “Mustaqillikning 25 yilligi” konini qoʻshimcha razvedka qilish va ishlatish” investitsiya loyihasini amalga oshirishni jadallashtirish maqsadida Vazirlar Mahkamasi qaror qiladi:

1. Maʼlumot uchun qabul qilinsinki, Oʻzbekiston Respublikasi Prezidentining “Oʻzbekiston mustaqilligi” investitsiya blokida geologiya-qidiruv ishlarini olib borish, “Mustaqillikning 25 yilligi” konini qoʻshimcha razvedka qilish va ishlatish, Oʻzbekiston Respublikasining Surxondaryo viloyatida gaz-kimyo kompleksini qurish toʻgʻrisida” 2017-yil 3-maydagi PQ-2948-son qaroriga muvofiq:

2017-yil 5-oktabrda “Oʻzbekiston Respublikasi Surxondaryo viloyatida gaz-kimyo majmuasi qurilishi bilan “Mustaqillikning 25 yilligi” konini qayta qidirish va ishlatish bilan “Oʻzbekiston Mustaqilligi” investitsiya blokiga nisbatan Mahsulot taqsimotiga oid bitim (keyingi oʻrinlarda Mahsulot taqsimotiga oid bitim deb ataladi;

“Mustaqillikning 25 yilligi” konida baholash qudugʻini burgʻilash, xalqaro konsultantlar bilan birgalikda marketing tadqiqotlarini tayyorlash, shuningdek, loyihani konseptual ishlab chiqish va loyihaviy moliyalashtirish shartlari asosida xalqaro banklar qarzlarini jalb qilishni tashkil etish uchun kon zaxiralarini audit qilish ishlari olib borilmoqda.

2. “Oʻzbekneftgaz” AJ va “Gas Project Development Central Asia AG” (Shveysariya), “Altmax Nolding LTD” (Kipr) kompaniyalari va “Oʻzneftgazqazibchiqarish” AJdan iborat investorlar konsorsiumining:

a) “Mahsulot taqsimotiga oid bitim shartlari asosida Oʻzbekiston Respublikasining Surxondaryo viloyatida gaz-kimyo kompleksi qurilishi bilan “Mustaqillikning 25 yilligi” konini razvedka qilish va qazib olish” investitsiya loyihasini ikki bosqichga boʻlish:

birinchi bosqich — “Mustaqillikning 25 yilligi” konini jihozlash va yiliga 5 mlrd kub metr tabiiy gazni qayta ishlash quvvatiga ega gazni qayta ishlash zavodini qurish (2018 — 2022-yillar);

ikkinchi bosqich — loyiha hujjatlarini ishlab chiqish va tasdiqlash, moliyalashtirishni (2020 — 2023-yillar) va gaz-kimyo majmuasi qurilishini (2023 — 2025-yillar) tashkil etish;

b) 2018-yil iyun oyida Mahsulot taqsimotiga oid bitim doirasida loyihaviy moliyalashtirishni jalb qilish uchun Maxsus loyiha kompaniyasini tashkil etish, keyinchalik Mahsulot taqsimotiga oid bitimga qoʻshimcha bitim imzolash.

3. “Oʻzbekneftgaz” AJ “Gas Project Development Central Asia AG” (Shveysariya), “Altmax Nolding LTD” (Kipr) kompaniyalari va “Oʻzneftgazqazibchiqarish” AJdan iborat investorlar konsorsiumi bilan birgalikda 2018-yil 20-iyungacha boʻlgan muddatda investitsiya loyihasining birinchi bosqichi dastlabki texnik-iqtisodiy asoslanishini ekspertizadan oʻtkazish uchun “Oʻzbekiston Respublikasi Prezidenti huzuridagi Loyiha boshqaruvi milliy agentligi qoshidagi Loyihalar va import kontraktlarini kompleks ekspertiza qilish markazi” DUKga kiritilishini taʼminlasin.

4. “Oʻzbekneftgaz” AJ Mahsulot taqsimotiga oid bitimga muvofiq investitsiya loyihasini amalga oshirish doirasida neft-gaz operatsiyalarining belgilangan muddatlari va hajmlariga rioya etilishi ustidan doimiy monitoring olib borilishini taʼminlasin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — “Oʻzbekneftgaz” AJ boshqaruvi raisi A.S. Sultanov va Oʻzbekiston Respublikasi Bosh vazirining oʻrinbosari — Oʻzbekiston Respublikasi Investitsiyalar boʻyicha davlat qoʻmitasi raisi S.R. Xolmuradov zimmasiga yuklansin.