Plastik kartochkalar asosida naqd pulsiz hisob-kitob qilish tizimini yanada rivojlantirishni ragʻbatlantirish, ulardan chakana savdoda, kommunal xizmatlarga va xizmatlarning boshqa turlariga haq toʻlashda foydalanish, shuningdek pul mablagʻlarining bankdan tashqari aylanishini qisqartirish maqsadida Vazirlar Mahkamasi qaror qiladi:

1. Oʻzbekiston Respublikasi Markaziy banki tomonidan Oʻzbekiston Banklar uyushmasi va respublika tijorat banklari bilan birgalikda ishlab chiqilgan 1-ilovaga* muvofiq 2006-yil oxirigacha tijorat banklari tomonidan plastik kartochkalardan foydalangan holda hisob-kitob qilish tarmogʻini kengaytirishning prognoz jadvali maʼqullansin.

2. Oʻzbekiston Respublikasi Markaziy banki, Oʻzbekiston Banklar uyushmasi uch oy muddatda Banklararo protsessing markazi negizida savdo va xizmatlar sohasi tashkiloti yoxud plastik kartochka egasiga qaysi bankda xizmat koʻrsatilishidan qatʼi nazar, barcha savdo shoxobchalarida bank operatsiyalarini yagona rejimda amalga oshirish imkonini beruvchi Oʻzbekiston Banklar uyushmasi huzuridagi Yagona umumrespublika protsessing markazini tashkil etsinlar.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari manfaatdor vazirliklar, idoralar, kompaniyalar, uyushmalar va tijorat banklari bilan birgalikda 2-ilovaga muvofiq chakana savdo va xizmatlar sohasi obyektlarini, avtomobil yonilgʻisi quyish shoxobchalarini va aholidan naqd pul qabul qilish boshqa punktlarini toʻlovlarni plastik kartochkalar bilan qabul qilish boʻyicha terminallar bilan:

Toshkent shahrida — 2005-yil 1-yanvargacha;

viloyat markazlari va viloyatga boʻysunuvchi shaharlarda — 2005-yil 1-iyulgacha taʼminlash chora-tadbirlarini koʻrsinlar.

Koʻrilgan chora-tadbirlarning natijalari toʻgʻrisida 2004-yil va 2005-yilning birinchi yarim yilligi yakunlari boʻyicha Oʻzbekiston Respublikasi Vazirlar Mahkamasiga axborot berilsin.

4. Belgilab qoʻyilsinki, plastik kartochkalardan foydalanib tovarlarni sotishda va xizmatlar koʻrsatishda xoʻjalik yurituvchi subyektlar tomonidan beriladigan terminal cheklari kvitansiyalar, talonlar, chiptalarga hamda tovarlar va xizmatlarga haq toʻlanganligini tasdiqlovchi ularga tenglashtirilgan boshqa hujjatlarga tenglashtiriladi.

5. Chakana savdo korxonalariga yuridik shaxslarning korporativ plastik kartochkalari boʻyicha tovarlarni oylik tovar aylanishi hajmida sotuvlar ulushi cheklanmagan holda sotishga ruxsat berilsin.

6. Plastik kartochkalarning emitentlari boʻlgan tijorat banklari:

2005-yil 1-yanvargacha barcha filiallar, minibanklar va jamgʻarma kassalarida toʻlovlarni plastik kartochkalar bilan qabul qilish boʻyicha terminallar oʻrnatsinlar;

aylanma mablagʻlar taqchilligiga duch kelayotgan chakana savdo va xizmatlar sohasi tashkilotlarining toʻlovlarni plastik kartochkalar bilan qabul qilish boʻyicha terminallar sotib olishi uchun oʻz mijozlarining soʻrovlari boʻyicha imtiyozli kreditlar bersinlar (Markaziy bankning qayta moliyalash stavkasining 50 foizi stavkasi boʻyicha);

terminal tarmogʻining uzluksiz ishlashi va plastik kartochkalardan foydalangan holda oʻz mijozlariga koʻrsatiladigan xizmatlar turlarini kengaytirish chora-tadbirlarini koʻrsinlar.

7. Tijorat banklari va Yagona umumrespublika protsessing markazi:

bankomatlar, terminallar, kommutatsiya uskunalari va plastik kartochkalar boʻyicha toʻlovlarni amalga oshirish uchun foydalaniladigan boshqa asbob-uskunalardan, shuningdek dasturiy taʼminot sifatidagi mol-mulkdan 2005-yil 1-yanvardan boshlab 3 yil muddatga mulk soligʻi toʻlashdan;

plastik kartochkalar, sarflanadigan materiallar, grafik va elektron shaxslashtirish qurilmalari, terminallar, bankomatlar va plastik kartochkalar boʻyicha toʻlovlarni amalga oshirish uchun foydalaniladigan boshqa asbob-uskunalarni import qilishda 2007-yil 1-yanvargacha bojxona toʻlovlari toʻlashdan (bojxonada rasmiylashtirish yigʻimlaridan tashqari) ozod qilinsin.

Tijorat banklari va Yagona umumrespublika protsessing markazi tomonidan toʻlovlarni plastik kartochkalar boʻyicha amalga oshirish uchun foydalaniladigan mol-mulkdan soliq toʻlash boʻyicha imtiyozlarni qoʻllash tartibi toʻgʻrisidagi nizom 3-ilovaga muvofiq tasdiqlansin.

8. Oʻzbekiston Respublikasi Iqtisodiyot vazirligi, “Oʻzeltexsanoat” uyushmasi va Oʻzbekiston Banklar uyushmasi Mahalliylashtirish dasturi doirasida respublikada oʻz materiallari negizida mikrochiplari boʻlgan plastik kartochkalar va toʻlov terminallari ishlab chiqarish boʻyicha qoʻshma korxona tashkil etish yuzasidan 2004-yil oxirigacha Vazirlar Mahkamasiga takliflar kiritsinlar.

9. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Toshkent shahrida, viloyat markazlarida va viloyatga boʻysunuvchi shaharlarda joylashgan, savdo maydoni 150 kvadrat metrdan ortiq boʻlgan turgʻun savdo shoxobchalariga chakana savdoni amalga oshirish uchun ruxsat beruvchi guvohnomalar berishda ularda toʻlovlarni plastik kartochkalar boʻyicha qabul qilish imkonini beruvchi terminallar mavjud boʻlishini nazarda tutsinlar.

10. Oʻzbekiston Respublikasi Adliya vazirligi Oʻzbekiston Respublikasi Markaziy banki, Moliya vazirligi va Davlat soliq qoʻmitasi bilan birgalikda bir oy muddatda:

amaldagi qonun hujjatlariga mazkur qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin;

vazirliklar va idoralarning normativ hujjatlari mazkur qarorga muvofiqlashtirilishini taʼminlasin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov va Oʻzbekiston Respublikasi Markaziy banki raisi F.M. Mullajonov zimmasiga yuklansin.

1. Aviatsiya va temir yoʻllar pattalarini sotish kassalari.

2. Uy-joy kommunal xizmatlar koʻrsatuvchi korxonalar huzurida ochilgan aholidan toʻlovlarni qabul qilish shoxobchalari.

3. Telefon, shu jumladan uyali aloqa telefonlari xizmatlari uchun toʻlovlarni qabul qilish shoxobchalari.

4. Aholidan soliqlar va boshqa majburiy toʻlovlarni qabul qilish shoxobchalari.

5. Avtomobillarga yonilgʻi quyish shoxobchalari.

6. Savdo zali maydoni 150 kvadrat metrdan ortiq boʻlgan turgʻun savdo shoxobchalari.

7. Restoranlar.

8. Ish haqi toʻlash plastik kartochkalardan foydalanib amalga oshiriladigan korxonalar va muassasalardagi umumiy ovqatlanish obyektlari.

9. Mehmonxonalar.

10. Aloqa boʻlimlari.

1. Mazkur Nizom tijorat banklari va Yagona umumrespublika protsessing markazi tomonidan bankomatlar, terminallar, kommutatsiya uskunalaridan va toʻlovlarni plastik kartochkalar boʻyicha amalga oshirish uchun foydalaniladigan boshqa uskunalardan mulk soligʻi boʻyicha imtiyozlarni qoʻllash, shuningdek ularni buxgalteriya hisobida aks ettirish tartibini belgilab beradi.

2. Tijorat banklari va Yagona umumrespublika protsessing markazi bankomatlar, terminallar, kommutatsiya uskunalaridan va toʻlovlarni plastik kartochkalar boʻyicha amalga oshirish uchun foydalaniladigan boshqa uskunalardan, shuningdek dasturiy taʼminlashdan mulk soligʻi toʻlashdan 2005-yil 1-yanvardan boshlab 3 yil muddatga ozod etilgan.

3. Bankomatlar, terminallar, kommutatsiya uskunalari va toʻlovlarni plastik kartochkalar boʻyicha amalga oshirish uchun foydalaniladigan boshqa uskunalar, shuningdek dasturiy taʼminlash boʻyicha imtiyozlarni qoʻllash va boʻshab qoladigan mablagʻlarni hisobga olish maqsadida tijorat banklari va Yagona umumrespublika protsessing markazi tomonidan yilning har choragida mazkur Nizomga ilovaga muvofiq tegishli mol-mulkning qiymati hisob-kitobi tuziladi.

4. Toʻlovlarni plastik kartochkalar boʻyicha amalga oshirish uchun foydalaniladigan mol-mulk tarkibiga balansda turgan quyidagi mol-mulk:

bankomatlar;

toʻlovlarni plastik kartochkalar bilan qabul qilish boʻyicha terminallar;

toʻlovlarni plastik kartochkalar boʻyicha amalga oshirish va maʼlumotlar massivlarini qayta ishlash uchun foydalaniladigan kompyuter uskunalari va serverlar;

litsenziya toʻlovlarini hisobga olgan holda toʻlovlarni plastik kartochkalar boʻyicha amalga oshirish uchun foydalaniladigan dasturiy taʼminlash;

kommutatsiya uskunalari;

kart-riderlar (plastik kartochkalarni oʻqish va yozish uchun qurilma);

shaxslashtiruvchilar (plastik kartochkalarga identifikatsiya belgilari qoʻyish qurilmasi);

berilayotgan axborotni shifrlashda foydalaniladigan uskuna kiritiladi.

5. Toʻlovlarni plastik kartochkalar boʻyicha amalga oshirish uchun foydalaniladigan mol-mulk qiymatini hisoblab chiqish tijorat banklari tomonidan banklarning barcha filiallarini hisobga olgan holda jamlashtirish asosida amalga oshiriladi.

6. Toʻlovlarni plastik kartochkalar boʻyicha amalga oshirish uchun foydalaniladigan mol-mulk qiymati toʻgʻrisidagi maʼlumotlar tijorat banklari va Yagona umumrespublika protsessing markazi tomonidan roʻyxatdan oʻtkazish joyi boʻyicha respublika soliq xizmati organlariga beriladi.

7. Mulk soligʻini hisoblab chiqish tijorat banklari va Yagona umumrespublika protsessing markazi tomonidan Oʻzbekiston Respublikasi Moliya vazirligining 25-son va Oʻzbekiston Respublikasi Davlat soliq qoʻmitasining 2002-13-son qarori bilan tasdiqlangan (Oʻzbekiston Respublikasi Adliya vazirligida 2002-yil 11-martda 1107 raqami bilan roʻyxatdan oʻtkazilgan) Yuridik shaxslarning mol-mulkiga solinadigan soliqni hisoblab chiqish va budjetga toʻlash tartibi toʻgʻrisidagi yoʻriqnomaga muvofiq amalga oshiriladi.

8. Boʻshab qoladigan mablagʻlarning buxgalteriya hisobi Oʻzbekiston Respublikasi Moliya vazirligining 52-son, Oʻzbekiston Respublikasi Davlat soliq qoʻmitasining 2002-21-son va Davlat bojxona qoʻmitasining 02/8-6-son qarori bilan tasdiqlangan (Oʻzbekiston Respublikasi Adliya vazirligida 2002-yil 25-iyunda 1155 raqami bilan roʻyxatdan oʻtkazilgan) Yuridik shaxslarga soliqlar, bojxona toʻlovlari va budjetga majburiy toʻlovlar boʻyicha berilgan imtiyozlarni rasmiylashtirish va buxgalteriya hisobida aks ettirish tartibi toʻgʻrisidagi nizomga muvofiq amalga oshiriladi.

9. Tijorat banklari va Yagona umumrespublika protsessing markazi toʻlovlarni plastik kartochkalar boʻyicha amalga oshirish uchun foydalaniladigan mol-mulkning qiymati va qoʻllanilayotgan imtiyozlar summasi toʻgʻri aniqlanishi uchun javob beradilar.