Chegaradosh davlatlar avtotransport vositalarining Oʻzbekiston Respublikasi hududi orqali kirib kelishi va tranziti uchun yagona yigʻimlar belgilash maqsadida Vazirlar Mahkamasi qaror qiladi:

1. Oʻzbekiston Respublikasi Hukumati tomonidan Qozogʻiston Respublikasi va Tojikiston Respublikasi yuk avtotransport vositalariga nisbatan toʻlovning yagona normalari, shuningdek Turkmanistonning avtotransport vositalari barcha turlariga nisbatan yigʻimlarning tabaqalashtirilgan stavkalari belgilanganligi toʻgʻrisida qaror qabul qilinganligi maʼlumot uchun qabul qilinsin.

2. 2000-yil 1-yanvardan boshlab Oʻzbekiston Respublikasining bojxona chegarasidan oʻtadigan Qirgʻiziston Respublikasi yuk avtotransport vositalari uchun 300 AQSh dollariga teng miqdordagi toʻlov belgilansin, Oʻzbekiston Respublikasi Vazirlar Mahkamasi tomonidan belgilanadigan yoʻnalishlar boʻyicha oʻtadigan yuk avtotransport vositalari va avtobuslar bundan mustasno.

3. Qirgʻiziston Respublikasi bitta yuk avtotransport vositasi va avtobusning Oʻzbekiston Respublikasi bojxona hududi orqali kirib kelishi va oʻtishi uchun 300 AQSh dollariga teng miqdorda erkin almashtiriladigan valyutada toʻlov undirilishi belgilab qoʻyilsin.

Qirgʻiziston Respublikasi yuk avtotransport vositalari va avtobuslardan toʻlov bevosita bojxona postlarida undiriladi, olingan mablagʻlar bojxona organlarining depozit hisob raqamlari orqali Respublika yoʻl jamgʻarmasining valyuta hisob raqamiga oʻtkaziladi.

4. Chegaradosh davlatlarning yuk avtotransport vositalari Oʻzbekiston Respublikasi bojxona hududi orqali tranzit oʻtishida bir avtotransport vositasi uchun bank boʻlimlarida erkin almashtiriladigan valyutaga almashtirilganligini tasdiqlovchi hujjatlar taqdim etilgan holda Oʻzbekiston Respublikasi Markaziy bankining toʻlov kunidagi kursi boʻyicha soʻmlarda 200 yevroga teng miqdorda, yoxud erkin almashtiriladigan valyutada boj yigʻimlari undirilgan holda aksiz soligʻi undiriladigan tovarlarga majburiy bojxona hamrohligi joriy etilsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari L.A. Axmetov va R.R. Yunusov zimmasiga yuklansin.