Jahon banki ishtirokidagi “Kadastr va ko‘chmas mulkni ro‘yxatga olish tizimlarini modernizatsiya qilish” investitsiya loyihasi bo‘yicha O‘zbekiston Respublikasi va Xalqaro taraqqiyot uyushmasi o‘rtasida moliyalashtirish to‘g‘risidagi bitim majburiyatlarini bajarish, shuningdek, davlat organlari, tadbirkorlik subyektlari va aholiga interaktiv davlat xizmatlarini ko‘rsatish maqsadida Vazirlar Mahkamasi qaror qiladi:

1. O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasining Milliy geografiya axborot tizimi, Yagona davlat kadastrlari tizimini yaratish hamda joriy qilish, mavzuli kadastr xaritalarini ishlab chiqarish maqsadida O‘zbekiston Respublikasi hududida 1984-yilgi koordinatalar butunjahon geodeziya tizimi (WGS-84) va koordinatalar xalqaro geotsentrik tizim — ITRSni qo‘llash hamda ulardan ochiq foydalanish to‘g‘risidagi taklifiga rozilik berilsin.

2. O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi 1984-yilgi koordinatalar butunjahon geodeziya tizimi (WGS-84) va koordinatalar xalqaro geotsentrik tizim — ITRSda kadastr xaritalarini yaratishga o‘tishni ta’minlash bo‘yicha kompleks dastur loyihasini ikki oy muddatda O‘zbekiston Respublikasi Vazirlar Mahkamasiga kiritsin.

3. O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlar bir oy muddatda ushbu qarorga muvofiqlashtirilishini ta’minlasin.

4. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari — Qishloq va suv xo‘jaligi vaziri Z.T. Mirzayev va O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi raisi A.X. Abdullayev zimmasiga yuklansin.