Harakatlanuvchi uskunalarga nisbatan xalqaro kafolatlar toʻgʻrisidagi Konvensiyaga (Keyptaun, 2001-yil 16-noyabr) va Harakatlanuvchi uskunalarga nisbatan xalqaro kafolatlar toʻgʻrisidagi Konvensiyaning Aviatsiya uskunalari boʻyicha protokoliga (Keyptaun, 2001-yil 16-noyabr) quyidagi bayonotlar bilan qoʻshilinsin:

1) Konvensiyaning 53-moddasi boʻyicha: “Oʻzbekiston Respublikasi bayon qiladiki, Qoraqalpogʻiston Respublikasi, viloyatlar va Toshkent shahar iqtisodiy sudlari Konvensiyaning 1-moddasi va XII bobi maqsadlari uchun tegishli sudlar hisoblanadi;

2) Konvensiyaning 54-moddasi 2-bandi boʻyicha: “Oʻzbekiston Respublikasi bayon qiladiki, Konvensiyaga muvofiq kreditorda mavjud boʻlgan, uning qoidalaridan birida sudga murojaat qilishni talab qiluvchi sifatida aniq belgilanmagan huquqlarni himoya qilishning barcha usullari sud harakatlarisiz va sudning ruxsatisiz qoʻllanilishi mumkin”;

3) Protokolning XXX moddasi 1-bandi boʻyicha: “Oʻzbekiston Respublikasi bayon qiladiki, u Protokolning VIII, XII va XIII moddalari qoidalarini qoʻllaydi”;

4) Protokolning XXX moddasi 2-bandi boʻyicha: “Oʻzbekiston Respublikasi bayon qiladiki, u X moddani toʻliq hajmda qoʻllaydi va X moddaning 2-bandida qayd etilgan vaqt davrining davomiyligi Konvensiyaning 13-moddasi 1-bandi a), b), c) kichik bandlarida koʻrsatilgan himoya vositalari uchun koʻpi bilan oʻn kalendar kunni hamda Konvensiyaning 13-moddasi 1-bandi d), e) kichik bandlarida koʻrsatilganlari uchun koʻpi bilan oʻttiz kalendar kunni tashkil etadi”;

5) Protokolning XXX moddasi 3-bandi boʻyicha: “Oʻzbekiston Respublikasi bayon qiladiki, u XI moddaning A variantini nochorlik boʻyicha tartib-taomillarning barcha turlariga nisbatan toʻliq hajmda qoʻllaydi va XI moddaning 3-bandi maqsadlari uchun muddatni kechiktirish davrining davomiyligi oltmish kalendar kunni tashkil etadi”.