Oʻzbekiston Respublikasi Prezidentining “Mirzo Ulugʻbek nomidagi ixtisoslashtirilgan maktabni va “Astronomiya va aeronavtika” bogʻini tashkil etish toʻgʻrisida” 2017-yil 14-sentabrdagi PQ-3275-son qarori ijrosini taʼminlash, shuningdek, Astronomiya instituti huzurida Mirzo Ulugʻbek nomidagi ixtisoslashtirilgan davlat umumtaʼlim maktab — internatini va Astronomiya va aeronavtika bogʻini tashkil etish hamda Oʻzbekiston Respublikasi Fanlar akademiyasi Astronomiya institutining asosiy va tarixiy binolarini kapital taʼmirlash ishlarini amalga oshirish bilan bogʻliq tashkiliy masalalarni hal qilish maqsadida Vazirlar Mahkamasi qaror qiladi:

1. Oʻzbekiston Respublikasi Xalq taʼlimi vazirligi, Iqtisodiyot vazirligi, Moliya vazirligi, Oʻzbekiston Respublikasi Fanlar akademiyasi va Toshkent shahar hokimligining Oʻzbekiston Respublikasi Fanlar akademiyasi Astronomiya instituti huzurida Mirzo Ulugʻbek nomidagi ixtisoslashtirilgan davlat umumtaʼlim maktab-internatini (keyingi oʻrinlarda — maktab-internat) Oʻzbekiston Respublikasi Favqulodda vaziyatlar vazirligi huzuridagi Gidrometeorologiya ilmiy-tadqiqot institutining Gidrometeorologiya xizmati markazining Toshkent shahar, Bodomzor yoʻli, 1-tor koʻcha, 72-uy manzilida joylashgan bino va inshootlarida joylashtirish boʻyicha taklifi maʼqullansin.

2. Oʻzbekiston Respublikasi Favqulodda vaziyatlar vazirligi:

Oʻzbekiston Respublikasi Favqulodda vaziyatlar vazirligi huzuridagi Gidrometeorologiya ilmiy-tadqiqot institutining Gidrometeorologiya xizmati markazining Toshkent shahar, Bodomzor yoʻli, 1-tor koʻcha, 72-uy manzilida joylashgan bino va inshootlari unga tutash hududi bilan birga Oʻzbekiston Respublikasi Fanlar akademiyasi Astronomiya instituti tasarrufiga operativ boshqaruv huquqi bilan oʻrnatilgan tartibda bepul oʻtkazish choralarini koʻrsin;

Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi va Toshkent shahar hokimligi bilan birgalikda bir oy muddatda Oʻzbekiston Respublikasi Favqulodda vaziyatlar vazirligi huzuridagi Gidrometeorologiya ilmiy-tadqiqot institutining Gidrometeorologiya xizmati markazini mazkur tashkilotning maqsadi va yoʻnalishlariga mos keladigan binoga joylashtirsin.

3. Oʻzbekiston Respublikasi Fanlar akademiyasi, Oʻzbekiston Respublikasi Iqtisodiyot vazirligi, Oʻzbekiston Respublikasi Moliya vazirligi, Oʻzbekiston Respublikasi Davlat arxitektura va qurilish qoʻmitasi va Toshkent shahar hokimligi maktab-internat binosini rekonstruksiya qilish, 150 oʻrinli yotoqxona va sport zal qurish, Oʻzbekiston Respublikasi Fanlar akademiyasi Astronomiya instituti hududida Astronomiya va aeronavtika bogʻini barpo etish va planetariy qurish, shuningdek, Oʻzbekiston Respublikasi Fanlar akademiyasi Astronomiya instituti asosiy va tarixiy binolari hamda teleskop pavilyonlarini (keyingi oʻrinlarda — obyekt) kapital taʼmirlash chora-tadbirlarini amalga oshirsin.

4. Obyekt boʻyicha quyidagilar belgilansin:

Toshkent shahar hokimligi huzuridagi “Yagona buyurtmachi xizmati” injiniring kompaniyasi — buyurtmachi;

qonun hujjatlarida belgilangan tartibda oʻtkazilgan tanlov savdolari natijalariga koʻra — bosh loyiha va bosh pudratchi tashkilotlar.

5 Obyektni moliyalashtirish manbalari etib quyidagilar belgilansin:

loyiha-qidiruv ishlarini bajarish, 2017-2018-yillarda maktab-internat binosini rekonstruksiya qilish, 150 oʻrinli yotoqxona va sport zali qurish, oʻquv xonalari, laboratoriya xonalari, kutubxona va boshqa xonalarni zamonaviy uskunalar, oʻquv-uslubiy jihozlar, kompyuter va oʻquv-laboratoriya jihozlari bilan taʼminlash-Moliya vazirligi huzuridagi budjetdan tashqari Taʼlim va tibbiyot muassasalarining moddiy-texnika bazasini rivojlantirish jamgʻarmasi mablagʻlari;

loyiha-qidiruv ishlarini bajarish, 2017-2018-yillarda maktab-internat binosini rekonstruksiya qilish, 150 oʻrinli yotoqxona va sport zali qurish, oʻquv xonalari, laboratoriya xonalari, kutubxona va boshqa xonalarni zamonaviy uskunalar, oʻquv-uslubiy jihozlar, kompyuter va oʻquv-laboratoriya jihozlari bilan taʼminlash-Moliya vazirligi huzuridagi budjetdan tashqari Taʼlim va tibbiyot muassasalarining moddiy-texnika bazasini rivojlantirish jamgʻarmasi mablagʻlari;

temir-beton bordyurlarni va sugʻorish kanallarini almashtirishni, shuningdek, mavsumiy oʻsimliklar ekishni hisobga olgan holda obyekt hududini obodonlashtirish-Toshkent shahar hokimligining mahalliy budjeti mablagʻlari;

Oʻzbekiston Respublikasi Fanlar akademiyasi Astronomiya instituti asosiy va tarixiy binolarini hamda teleskop pavilyonlarini kapital taʼmirlash — Oʻzbekiston Respublikasi Davlat budjeti mablagʻlari;

Oʻzbekiston Respublikasi Fanlar akademiyasi Astronomiya instituti asosiy va tarixiy binolarini hamda teleskop pavilyonlarini mebel bilan jihozlash — Oʻzbekiston Respublikasi Fanlar akademiyasining ilmiy muassasalari obyektlarini sotishdan tushgan budjetdan tashqari mablagʻlari;

Tashqi muhandislik — kommunikatsiya tarmoqlarini (elektr, gaz, suv va issiqlik taʼminoti, kanalizatsiya, aloqa va h.k.) oʻrnatish — tegishli ekspluatatsiya tashkilotlari mablagʻlari.

6. Oʻzbekiston Respublikasi Iqtisodiyot vazirligi va Moliya vazirligi:

Buyurtmachining asoslangan hisob — kitoblariga koʻra, Oʻzbekiston Respublikasi 2017-yil Investitsiya dasturi doirasida kapital qoʻyilmalar limitlarini qayta taqsimlash orqali, joriy yilda Astronomiya va aeronavtika bogʻi, shuningdek, planetariy qurish, shu jumladan samolyotlar va boshqa havo kemalari maketlarini tayyorlash uchun zarur boʻlgan loyiha — smeta hujjatlarni ishlab chiqish va qurilish — montaj ishlarini olib borish uchun mablagʻlar ajratishni nazarda tutsin;

Oʻzbekiston Respublikasi 2018-yil Investitsiya dasturini shakllantirishda qurilish — montaj ishlari va obyektni jihozlash uchun tegishli kapital qoʻyilmalar limitlarini belgilasin.

7. Oʻzbekiston Respublikasi Fanlar akademiyasi va Xalq taʼlimi vazirligi:

maktab-internatni amalga oshirilayotgan chora-tadbirlar doirasida 2018-2019 oʻquv yiliga qadar oʻquv xonalari, laboratoriya xonalari, kutubxona va boshqa binolarni zamonaviy uskunalar, mebel, kompyuterlar va boshqa oʻquv-laboratoriya vositalari bilan jihozlash, shuningdek, oʻquv adabiyotlari va metodik qoʻllanmalar bilan taʼminlash;

ikki oy muddatda maktab-internat va Astronomiya va aeronavtika bogʻi ustavini ishlab chiqish va tasdiqlash, shuningdek, maktab-internatda oʻqishga nomzodlarni tanlash tartibi toʻgʻrisidagi nizomni tasdiqlash choralarini koʻrsin.

8. Belgilansinki:

maktab-internatga qabul 2018-2019 oʻquv yilidan boshlab matematika, fizika, informatikaga boʻyicha ixtisoslashgan sinflarga (yoʻnalishlar boʻyicha) 7-sinfdan, shuningdek, astronomiya sinflariga 10-sinfdan amalga oshiriladi;

maktab-internatga Oʻzbekiston Respublikasining barcha hududlaridan iqtidorli oʻquvchilar tanlov asosida qabul qilinadi;

maktab-internatga faoliyatini moliyalashtirish Oʻzbekiston Respublikasining Davlat budjeti mablagʻlari hisobidan belgilangan tartibda amalga oshiriladi.

9. Toshkent shahar hokimligi belgilangan tartibda:

2017-yil 1-dekabrga qadar bosh loyihalashtirish tashkiloti bilan birgalikda obyektning loyiha-smeta hujjatlarini sifatli ishlab chiqish va tasdiqlash hamda davlat ekspertizasini oʻtkazish;

Oʻzbekiston Respublikasining Arxitektura va qurilish davlat qoʻmitasi, Oʻzbekiston Respublikasining Yer resurslari, geodeziya, kartografiya va davlat kadastri davlat qoʻmitasi hamda “ToshkentboshplanLITI” DUK bilan birgalikda Oʻzbekiston Respublikasi Fanlar akademiyasi Astronomiya instituti, Seysmoprognostik monitoring Respublika markazining Toshkent seysmologiya stansiyasi va Oʻzbekiston Respublikasi Favqulodda vaziyatlar vazirligi huzuridagi Gidrometeorologiya xizmati markazi hududida Astronomiya va aeronavtika bogʻini tashkil etish uchun yer uchastkalarining chegaralarini aniqlash;

turar-joy binolari, noturar bino va inshootlarni buzish, Astronomiya va aeronavtika bogʻi hududida obyektlar qurish, tashqi muhandislik va transport kommunikatsiyalarning oʻtkazish bilan bogʻliq tashkiliy-texnik masalalarni hal qilish;

Astronomiya va aeronavtika bogʻi hududida yashovchi oilalarning olib qoʻyilgan yer uchastkalari uchun kompensatsiya sifatida belgilangan tartibda jismoniy va yuridik shaxslarga turar-joy binolari va noturar binolar qurish uchun yer uchastkalari hamda koʻp qavatli binolarda kvartiralar ajratish xarajatlarini moliyalashtirishni taʼminlasin.

10. Oʻzbekiston Respublikasining Arxitektura va qurilish davlat qoʻmitasi loyiha-smeta hujjatlarini davlat ekspertizasini va obyektdagi qurilish-montaj ishlari sifatini ustidan tegishli taʼminlash maqsadida muvofiq davlat arxitektura-qurilish nazorati oʻtkazilishini taʼminlasin.

11. Ushbu qaror ijrosini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J.Ramatov va Oʻzbekiston Respublikasi Fanlar akademiyasi prezidenti B.S. Yuldashev zimmasiga yuklansin.