Davlat aktivlarini boshqarishni yanada optimallashtirish, axborot texnologiyalari va kommunikatsiyalar sohasi tashkilotlariga yuklangan vazifalarning samarali bajarilishi uchun qulay shart-sharoitlar yaratish, ularning moddiy-texnika bazasini mustahkamlash maqsadida Vazirlar Mahkamasi qaror qiladi:

1. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi hamda Intellektual mulk agentligining ilovaga* muvofiq roʻyxat boʻyicha bino va inshootlarni yondosh hududi bilan tashkilotlarga operativ boshqarish huquqi bilan bepul berish toʻgʻrisidagi taklifiga rozilik berilsin.

2. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi hamda Intellektual mulk agentligi ushbu qarorga ilovada koʻrsatilgan bino va inshootlarning bir oy muddatda belgilangan tartibda topshirilishini-qabul qilinishini taʼminlasinlar hamda keyinchalik ulardan samarali foydalanilishini taʼminlasinlar.

3. Vazirlar Mahkamasining “Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi huzuridagi “Elektron hukumat” tizimini rivojlantirish markazi hamda Axborot xavfsizligini taʼminlash markazi faoliyatini tashkil etish chora-tadbirlari toʻgʻrisida” 2013-yil 16-sentabrdagi 250-son qarorining 10 va 11-bandlari (Oʻzbekiston Respublikasi QHT, 2013-y., 38-son, 492-modda) oʻz kuchini yoʻqotgan deb hisoblansin.

4. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasining Madaniyat, axborot tizimlari va telekommunikatsiyalar masalalari axborot-tahlil departamentiga yuklansin.