Oʻzbekiston Respublikasi Prezidentining “Respublika ixtisoslashtirilgan “Qurilishmashlizing” kompaniyasini tashkil etish toʻgʻrisida” 2014-yil 18-iyundagi PQ-2190-sonli qarorini ijro etish hamda davlat mulkidan oqilona va samarali foydalanish maqsadida:

1. Maʼlumot uchun qabul qilinsinki:

Toshkent shahri, Mustaqillik shox koʻchasi, 105-uyda joylashgan tutash hududi bilan birga maʼmuriy bino (maydoni 1 908 kv.m) (keyingi oʻrinlarda — maʼmuriy bino) “Toshkent shahar davlat mulkini ijaraga berish markazi” AJ hamda “Qurilishmashlizing” AJ oʻrtasida tuzilgan ijara shartnomasiga muvofiq “Respublika ixtisoslashtirilgan “Qurilishmashlizing” lizing kompaniyasi” AJga (keyingi oʻrinlarda — “Qurilishmashlizing” AJ) belgilangan tartibda ijaraga berilgan;

“Qurilishmashlizing” AJ tomonidan maʼmuriy binoni belgilangan tartibda 265,0 million soʻmlik hajmda mukammal taʼmirlash ishlari amalga oshirilgan;

Oʻzbekiston Respublikasi Prezidentining “Tadbirkorlik maqsadlarida foydalanish uchun davlat mulki obyektlarini sotishni jadallashtirish va uning tartib-taomillarini yanada soddalashtirish chora-tadbirlari toʻgʻrisida” 2017-yil 17-yanvardagi PF-4933-sonli Farmonining 1-bandida belgilangan tartibga muvofiq, yangi ish oʻrinlarini yaratish imkonini bergan asosiy fondlarni modernizatsiya qilgan va mukammal taʼmirdan chiqargan davlat mulki obyektining ijarachisiga uni xususiylashtirishda ijaraga olingan obyektni birinchi navbatda sotib olish uchun ustun huquq beriladi.

2. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi, Toshkent shahar hokimligi va “Qurilishmashlizing” AJning:

“Toshkent viloyati baholash va konsalting markazi” MChJ tomonidan oʻrnatilgan tartibda belgilangan bozor qiymati 6.35 mlrd, soʻm miqdoridagi maʼmuriy binoni “Qurilishmashlizing” AJga sotish toʻgʻrisidagi;

maʼmuriy bino qiymatining 15 foizi miqdorida belgilangan tartibda toʻlangan boʻnak (avans) toʻlovini chiqarib tashlab, “Qurilishmashlizing” AJ tomonidan maʼmuriy binoning xarid toʻlovini ikki yilga kechiktirish sharti bilan toʻlash toʻgʻrisidagi takliflariga rozilik berilsin.

3. “Qurilishmashlizing” AJ Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi hamda Toshkent shahar hokimligi bilan birgalikda bir oy muddatda maʼmuriy binoni xarid qilish bilan bogʻliq hujjatlarning tegishlicha rasmiylashtirilishini taʼminlasin.

4. Toshkent shahar hokimligi manfaatdor vazirliklar va idoralar bilan birgalikda maʼmuriy binoga kirish yoʻllarini Mustaqillik shox koʻchasi tomonidan belgilangan tartibda tashkillashtirsin.

5. Oʻzbekiston Respublikasi Prezidentining “Oʻzbekiston Respublikasi Tashqi iqtisodiy aloqalar, investitsiyalar va savdo vazirligi tuzilmasini optimallashtirish va faoliyati samaradorligini yanada oshirish chora-tadbirlari toʻgʻrisida” 2015-yil 31-dekabrdagi PQ-2463-sonli qarorining 5-ilovasidagi 2-pozitsiyasi chiqarib tashlansin.

6. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” aksiyadorlik jamiyati boshqaruvi raisi A.J. Ramatov zimmasiga yuklansin.