O‘zbekiston Respublikasi Vazirlar Mahkamasining “Xalqaro tiklanish va taraqqiyot banki ishtirokida Moliyaviy sektorni institutsional rivojlantirish loyihasi doirasida O‘zbekiston Respublikasi banklarini xususiylashtirish tadbirlarini amalga oshirish chora-tadbirlari to‘g‘risida” 2001-yil 19-fevraldagi 82-son qaroriga muvofiq Vazirlar Mahkamasi qaror qiladi:

1. Banklar aksiyalarining davlatga tegishli paketlarini potensial investorlarga sotish bo‘yicha davlat tender komissiyasi to‘g‘risidagi nizom ilovaga muvofiq tasdiqlansin

2. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.S. Azimov zimmasiga yuklansin

1. Ushbu Nizom banklarni xususiylashtirish va davlat tasarrufidan chiqarish masalalarini hal qilishda asoslanganlikni va tezkorlikni oshirish hamda xorijiy sarmoyani jalb etishni faollashtirish maqsadida ishlab chiqilgan.

2. Nizom Banklar aksiyalarining davlatga tegishli paketlarini potensial investorlarga sotish bo‘yicha davlat tender komissiyasi (keyingi o‘rinlarda Komissiya deb ataladi)ning O‘zbekiston Respublikasi Vazirlar Mahkamasi tomonidan belgilanadigan vazifalari, funksiyalari, huquqlari va majburiyatlarini belgilaydi.

3. Komissiyaning o‘z vakolatlari doirasida qabul qilingan qarorlari davlat boshqaruvi organlari va xususiylashtirilayotgan banklar tomonidan bajarilishi majburiydir.

4. Savdolar Komissiya tomonidan, O‘zbekiston Respublikasi qonun hujjatlarida belgilangan tartibda o‘tkaziladi.

5. Quyidagilar Komissiyaning asosiy vazifalari hisoblanadi:

vakolatli davlat organlari va xususiylashtirilayotgan banklarning, shuningdek jalb etilgan texnik moliyaviy va boshqa konsultantlarning aksiyalarning davlatga tegishli paketlarini (keyingi o‘rinlarda tender obyekti deb ataladi) sotishdan oldin tayyorlash va potensial investorlarga sotish masalalari bo‘yicha birgalikdagi faoliyatini tashkil etish;

texnik moliyaviy va boshqa konsultantlarni tender obyektini sotishdan oldin tayyorlash uchun jalb etish shartlarini belgilash;

talabgorlarning tender obyektini sotib olish bo‘yicha eng foydali takliflarini ekspertizadan o‘tkazish va tanlab olish;

baholashning oshkoraligi, obyektivligi va talablarning yagonaligi asosida tender (qatnashchilari uchun teng raqobat sharoitlari yaratish.

6. Quyidagilar Komissiyaning asosiy funksiyalari hisoblanadi:

tender hujjatlarini, to‘lovlar tartibini, tender obyektining sotilish bahosini, tenderni o‘tkazish usullarini, tenderda qatnashish uchun garov va to‘lov miqdorini, takliflarni baholash tartibini ko‘rib chiqish va tasdiqlash;

potensial investorlarni va tender obyektini sotishdan oldin tayyorlash uchun jalb etiladigan moliyaviy konsultantlar (ekspertlar)ni tanlash shartlari va mezonlarini belgilash hamda ularning ro‘yxatini tasdiqlash;

tushgan tender takliflarini ochish;

baholash guruhining tushgan tender takliflari bo‘yicha xulosalarini ko‘rib chiqish va tender g‘oliblarini aniqlash.

7. Komissiya quyidagi huquqlarga ega:

o‘zining ish tartibini mustaqil ravishda ishlab chiqish va tasdiqlash;

tender qatnashchilarini malakali tanlash va tender takliflarini baholash uchun baholash guruhlari tuzish;

O‘zbekiston Respublikasi Vazirlar Mahkamasi bilan kelishilgan holda tender obyektining boshlang‘ich bahosini talab kon’yunkturasiga ko‘ra va aniq portfelli va strategik investorlar mavjud bo‘lgan taqdirda o‘zgartirish;

O‘zbekiston Respublikasi Vazirlar Mahkamasiga potensial investorlarga sotiladigan davlat ulushi miqdorini o‘zgartirish bo‘yicha takliflar kiritish;

tenderni tayyorlash va o‘tkazish uchun tanlov asosida ekspertlarni taklif etish, ularning faoliyatiga Xalqaro tiklanish va taraqqiyot bankining moliya sektorini institutsional rivojlantirishga bergan qarz mablag‘lari, banklarni xususiylashtirishga doir tadbirlarni amalga oshirish uchun boshqa qarzlar va grantlar, shuningdek banklarni xususiylashtirishdan tushadigan umumiy mablag‘lar hisobidan haq to‘lash, keyinchalik xarajatlarni tender obyektini sotishdan tushgan mablag‘ hisobidan qoplash;

davlat boshqaruvi organlaridan, joylardagi davlat hokimiyati organlaridan, shuningdek xususiylashtirilayotgan banklardan o‘ziga yuklangan vazifalarni ta’minlash uchun zarur bo‘lgan axborotlarni olish.

8. Komissiya quyidagilarga majbur:

tenderlarning O‘zbekiston Respublikasi qonun hujjatlariga va banklarni xususiylashtirish uchun qarz beradigan xalqaro moliya tashkilotlari tartibotlariga muvofiq o‘tkazilishini ta’minlash;

O‘zbekiston Respublikasi Hukumatining tender obyektlarini sotishni tashkil etish bo‘yicha qarorlarini bajarish;

tender obyektini sotishdan oldin tayyorlash uchun jalb etiladigan ekspertlarni, shuningdeq tender obyektini sotib olishga potensial investorlarni tanlash bo‘yicha tenderlarning samarali o‘tkazilishini ta’minlash;

Komissiya majlislarida qabul qilingan qarorlar o‘z vaqtida bajarilishini nazorat qilish.

9. Tender savdolarini tashkil etish va o‘tkazish O‘zbekiston Respublikasi Vazirlar Mahkamasining “Aksiyalar paketlarini joylashtirishni takomillashtirish hamda davlat mulki negizida tashkil etilgan aksiyadorlik jamiyatlarini boshqarishda aksiyadorlar rolini oshirish chora-tadbirlari to‘g‘risida” 1997-yil 18-avgustdagi 404-son qaroriga 3-ilova bilan belgilangan tartibda mazkur Nizom talablari hisobga olingan holda amalga oshiriladi.

10. Komissiya majlislari zaruriyatga qarab uning a’zolarining kamida to‘rtdan uch qismi ishtirokida vaqti-vaqti bilan o‘tkaziladi. Komissiya qarorlari majlisda qatnashayotgan Komissiya a’zolarining oddiy ko‘pchilik ovozi bilan qabul qilinadi. Ovozlar teng bo‘lib hisoblangan taqdirda Komissiya raisining ovozi hal qiluvchi ovoz hisoblanadi.

Komissiya qarorlari majlisda qatnashgan Komissiya a’zolari tomonidan imzolanadigan va Komissiya raisi yoki uning o‘rinbosari tomonidan tasdiqlanadigan bayonnoma bilan rasmiylashtiriladi. Bayonnomani imzolashda Komissiya a’zolari o‘zlarining alohida fikrlarini ifodalashga haqlidirlar.

11. Komissiya potensial investorni tanlash bo‘yicha o‘tkazilgan tender natijalariga ko‘ra O‘zbekiston Respublikasi Vazirlar Mahkamasiga Vazirlar Mahkamasining tegishli qarorini qabul qilish uchun takliflar kiritadi.

12. Tender takliflarini ko‘rib chiqish va baholashning borishi to‘g‘risidagi axborot baholash tartibotiga rasman aloqasi bo‘lmagan shaxslarga ma’lum qilinmaydi.

Komissiya a’zolari ko‘rsatib o‘tilgan axborot oshkor qilinganligi uchun qonunda belgilangan tartibda javob beradilar.

13. Tenderlarni tashkil etish va o‘tkazish, shuningdek tender asosida ekspertlarni tanlash xarajatlari hamda ularga mukofotlar to‘lash:

xalqaro tiklanish va taraqqiyot bankining moliyaviy sektorni institutsional rivojlantirishga bergan qarzi bo‘yicha;

Jahon bankining boshqa qarzlari va grantlardan;

tender obyektini sotishdan tushgan mablag‘lar hisobiga qoplanadi.

14. Tender obyektini sotishdan oldin tayyorlash uchun tender asosida ekspertlar taklif etilgan taqdirda, Komissiya Banklarni xususiylashtirish byurosi va ekspert o‘rtasida tuziladigan shartnoma loyihasini ko‘rib chiqadi, quyidagilar shartnoma loyihasining asosiy mazmuni hisoblanadi:

texnik topshiriq;

mukofotlash summasi;

tomonlarning majburiyatlari va shartnomaning amal qilishini to‘xtatish shartlari.

Shartnoma Komissiya tomonidan ma’qullangandan keyin tuzilishi mumkin.

15. Baholovchi guruhlar alohida banklar bo‘yicha Vazirlar Mahkamasi, Moliya vazirligi, Adliya vazirligi, Markaziy bank, Davlat mulki qo‘mitasi, Tashqi iqtisodiy aloqalar vazirligi, Moliyaviy sektorni rivojlantirish agentligi, O‘zbekiston Respublikasi banklarini xususiylashtirish byurosining mas’ul xodimlari, xususiylashtirilayotgan banklar vakillari, shuningdeq zaruriyat bo‘lganda mustaqil ekspertlar, shu jumladan xorijiy ekspertlar tarkibida tashkil etiladi.

Baholovchi guruhning shaxsiy tarkibi Komissiya raisi yoki uning o‘rinbosari tomonidan tasdiqlanadi. Baholovchi guruh ish rejasi baholovchi guruh rahbari tomonidan tasdiqlanadi.

16. Quyidagilar baholovchi guruhning asosiy funksiyalari hisoblanadi:

tender takliflarini olish uchun moliyaviy maslahatchilar (ekspertlar)ning va potensial investorlarning dastlabki ro‘yxatini aniqlash;

tender takliflarining tender hujjatlarida belgilangan talablarga muvofiqligini baholash;

ekspert baholash va tushgan tender takliflari bo‘yicha xulosalar tayyorlash.

17. Baholovchi guruh rahbari tender obyektini sotishdan oldin tayyorlash uchun jalb qilinadigan ekspertlarning, shuningdek tender obyektini sotib olishga potensial investorlarning takliflarini ko‘rib chiqishda tender komissiyasi majlislarida qatnashishi shart.

18. Baholovchi guruhlar majlislari qarorlari majlisda qatnashgan baholovchi guruh barcha a’zolari tomonidan imzolanadigan va baholovchi guruh rahbari tomonidan tasdiqlanadigan bayonnoma bilan rasmiylashtiriladi.

Qaror guruhning majlisda hozir bo‘lgan a’zolarining oddiy ko‘pchilik ovozi bilan qabul qilinadi. Ovozlar teng bo‘lib qolgan taqdirda rahbarning ovozi hal qiluvchi ovoz hisoblanadi.

19. O‘zbekiston Respublikasi banklarini xususiylashtirish byurosi Komissiyaning tender savdolari tayyorlanishi va o‘tkazilishini (tender hujjatlarini ishlab chiqish va rasmiylashtirish, shuningdek ularni tarqatish, reklama ishi, ish yuritish va Komissiya hujjatlarini rasmiylashtirish) amalda tashkil etuvchi ishchi organi hisoblanadi.

20. Komissiyaning ishchi organi:

a) Komissiyaga:

texnikaviy, moliyaviy va boshqa xil maslahatchilarni, shuningdek potensial investorlarni taklif etish yuzasidan, ularning tender obyektini sotish oldidan tayyorlashda va sotib olishda qatnashishlari shartlari bo‘yicha taklif kiritish;

tender savdolarini tayyorlash va o‘tkazishning moliyaviy va texnik shartlari, investitsiya takliflarini baholash tartibi, g‘olibni tanlash mezonlari, savdolarni o‘tkazish usuli, to‘lovlar tartibi va shartlari yuzasidan takliflar kiritish;

b) tender o‘tkazilishi munosabati bilan ayrim masalalar bo‘yicha tushuntirishlar berish maqsadida tender oldidan muzokaralar va konferensiyalar o‘tkazish;

v) davlat boshqaruvi organlaridan, joylardagi davlat hokimiyati organlaridan, shuningdeq xususiylashtirilayotgan banklardan o‘ziga yuklangan vazifalarni bajarish uchun zarur bo‘lgan axborotlarni olish;

g) ommaviy axborot vositalarida tender savdolari o‘tkazish va ularning yakunlari to‘g‘risida e’lonlar berish huquqiga egadir.

21. Komissiyaning ishchi organi:

Komissiya tomonidan qabul qilingan qarorlarni o‘z vaqtida va to‘liq bajarishga;

tender obyektlari to‘g‘risidagi axborotni to‘plash, tartibga solish va qayta ishlashni amalga oshirishga;

bevosita yoxud tender obyektini sotish oldidan tayyorlash uchun jalb qilingan ekspertlar bilan birgalikda Komissiya tasdiqlashi uchun kiritiladigan texnik topshiriq, kontrakt va boshqa tender hujjatlari loyihalarini ishlab chiqish hamda rasmiylashtirishga;

ekspertlarga va potensial investorlarga tender va tender obyekti to‘g‘risidagi umumiy majburiy axborotlar, shuningdek ularning so‘rovlari bo‘yicha qo‘shimcha axborotlar o‘z vaqtida tarqatilishini ta’minlashga;

tenderlar o‘tkazish yuzasidan reklama-ma’rifiy ishlarni tashkil etishga;

Komissiya majlislarini chaqirishning barcha tashkiliy masalalarini hal etishga;

Komissiya ish hujjatlarini aniq va to‘liq yuritishga, Komissiya xat-xabarlari hisobini olib borish va tasniflashga, Komissiyaning barcha majlislari protokollarini o‘z vaqtida va to‘liq rasmiylashtirishga majburdir.