Oʻzbekiston Respublikasi Oliy Majlisi Senatining Kengashi qaror qiladi:

1. Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2016-yil 19-fevralda qabul qilingan “Oʻzbekiston Respublikasi Oliy Majlisi Senatining prokuratura organlari faoliyati ustidan nazorat qiluvchi komissiyasini tuzish toʻgʻrisida”gi 383-III/KQ-70-III-sonli Qoʻshma qarori tasdiqlansin.

2. Oʻzbekiston Respublikasi Oliy Majlisi Senatining prokuratura organlari faoliyati ustidan nazorat qiluvchi komissiyasining tarkibi ilovaga* muvofiq tasdiqlansin.

3. Oʻzbekiston Respublikasi Oliy Majlisi Senatining prokuratura organlari faoliyati ustidan nazorat qiluvchi komissiyasi:

birinchi tashkiliy majlisni oʻtkazib, unda Komissiya raisini saylasin va Komissiyaning 2016-yilga moʻljallangan ish rejasini ishlab chiquvchi ishchi guruhni tuzsin;

bir haftalik muddatda Komissiyaning 2016-yilga moʻljallangan ish rejasini Senat Kengashi tasdigʻiga kiritsin.

4. Senat rahbariyati Komissiya Kotibiyatining tegishli bilim va ish tajribasiga ega boʻlgan malakali kadrlar bilan toʻldirilishini taʼminlasin.

Komissiya Kotibiyatining xodimlari uchun ularga oldingi ish joyidan berilgan martaba darajalari, harbiy hamda maxsus unvonlari, shuningdek koʻp yil ishlaganliklari uchun ustama va qoʻshimcha haqlar saqlanib qolishi belgilansin.

5. Ushbu qaror qabul qilingan kundan eʼtiboran kuchga kiradi.