Oʻzbekiston Respublikasining Bolalarni boshqa mamlakatlarga oʻgʻirlab olib ketishning fuqarolik jihatlari toʻgʻrisidagi Gaaga Konvensiyasiga qoʻshilganligi munosabati bilan hamda vazirliklar va idoralar, joylardagi davlat hokimiyati organlari faoliyatini muvofiqlashtirish maqsadida Vazirlar Mahkamasi qaror qiladi:

1. Oʻzbekiston Respublikasi Adliya vazirligi Bolalarni boshqa mamlakatlarga oʻgʻirlab olib ketishning fuqarolik jihatlari toʻgʻrisidagi Gaaga Konvensiyasidan kelib chiqadigan majburiyatlarning bajarilishini taʼminlash boʻyicha markaziy organ etib tayinlansin.

2. Belgilab qoʻyilsinki, markaziy organning Gaaga Konvensiyasi doirasidagi koʻrsatmalari Oʻzbekiston Respublikasining barcha vazirliklari, idoralari va joylardagi davlat hokimiyati organlari tomonidan bajarilishi majburiydir.

3. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda Bolalarni boshqa mamlakatlarga oʻgʻirlab olib ketishning fuqarolik jihatlari toʻgʻrisidagi Gaaga Konvensiyasini amalga oshirishga doir tadbirlarni bir oy muddatda ishlab chiqsin va tasdiqlasin.

4. Mazkur qarorning bajarilishini nazorat qilish Bosh vazir oʻrinbosari, Oʻzbekiston Respublikasi Vazirlar Mahkamasining Oila, onalik va bolalikni ijtimoiy muhofaza qilish kompleksi rahbari D.M. Gʻulomova zimmasiga yuklansin.