Kelgusida iqtisodiyotdagi tarkibiy oʻzgartirishlarni davom ettirish, toʻqimachilik va tikuv-trikotaj sanoatini modernizatsiyalash, diversifikatsiyalash va jadal rivojlantirishni taʼminlash, paxta tolasi va ipak xom ashyosini chuqur qayta ishlash, xorijiy investitsiyalarni keng jalb etish yoʻli bilan raqobatbardoshli, tashqi bozorlarda talab qilinadigan tayyor, eksportga yoʻnaltirilgan mahsulotlar ishlab chiqarish hajmlari va turlarini kengaytirish maqsadida:

1. 2017 — 2019-yillarda paxta tolasi va ipak xom ashyosini chuqur qayta ishlash negizida yuqori qoʻshilgan qiymatli, tashqi bozorlarda talab qilinadigan tayyor toʻqimachilik va tikuv-trikotaj mahsulotlari ishlab chiqarish topshirigʻi 1-ilovaga* muvofiq belgilansin.

Paxta tolasi va ipak xom ashyosini chuqur qayta ishlash orqali yuqori qoʻshilgan qiymatli, tashqi bozorlarda talab yuqori boʻlgan tayyor toʻqimachilik va tikuv-trikotaj mahsulotlarini ishlab chiqarish boʻyicha 1-ilovada nazarda tutilgan topshiriqlarning belgilangan muddatlarda sifatli va toʻliq hajmda bajarilishini taʼminlash yuzasidan shaxsiy masʼuliyat “Oʻzbekyengilsanoat” AJ, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari, boshqa aksiyadorlik jamiyatlari hamda korxonalar rahbarlari — masʼul ijrochilar zimmasiga yuklansin.

2. 2016 — 2019-yillarda paxta tolasi va ipak xom ashyosini chuqur qayta ishlash negizida yuqori qoʻshilgan qiymatli tayyor, eksportga yoʻnaltirilgan toʻqimachilik va tikuv-trikotaj mahsulotlarini ishlab chiqarish boʻyicha investitsiya loyihalari roʻyxati 2-ilovaga* muvofiq maʼqullansin.

Ushbu roʻyxatga kiritilgan barcha investitsiya loyihalari “Oʻzbekyengilsanoat” AJ tomonidan, salohiyatli investorlar, ishlab chiqarish maydonchalari va loyihalarni moliyalashtirish manbalari aniq belgilanganligini hisobga olgan holda Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan birgalikda tayyorlanganligi maʼlumot uchun qabul qilinsin.

3. “Oʻzbekyengilsanoat” AJ, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari Oʻzbekiston Respublikasi Iqtisodiyot vazirligi, Tashqi iqtisodiy aloqalar, investitsiyalar va savdo vazirligi hamda boshqa manfaatdor tuzilmalar bilan birgalikda ushbu qarorning 2-ilovasida koʻrsatilgan investitsiya loyihalarini amalga oshirishning tarmoq jadvallarini bir oy muddatda Oʻzbekiston Respublikasi Vazirlar Mahkamasiga tasdiqlash uchun kiritsinlar, ularda loyiha hujjatlarini ishlab chiqish va ekspertizadan oʻtkazish, zamonaviy texnologik talablarga javob beradigan loyiha yechimlarini tanlashning aniq muddatlarini nazarda tutsinlar.

6. Belgilab qoʻyilsinki, ochilgan kredit liniyalari doirasida tijorat banklari bilan birgalikda moliyalashtiriladigan investitsiya loyihalari quyidagi talablarga javob berishi kerak:

tijorat banklari ustav kapitaliga, shu jumladan shuʼba investitsiya kompaniyalari orqali yoki modernizatsiya qilinayotgan yoxud yangidan tashkil etilayotgan korxonalarga qayta moliyalashtirilayotgan kreditlar berish orqali loyihalarni moliyalashtiradilar;

qayta moliyalashtirish shartlarida loyihani amalga oshirishda tijorat bankining ishtiroki loyiha qiymatining koʻpi bilan 75 foizini tashkil qiladi;

kredit liniyalari xorijiy valyutada beriladi, ularga xizmat koʻrsatish va ularni toʻlash ham qayta moliyalashtiruvchi tijorat banklari va qarz olgan tashkilotlar tomonidan ana shu valyutada amalga oshiriladi;

investitsiya loyihalari “Oʻzbekyengilsanoat” AJning tarmoq Ilmiy- texnika kengashida majburiy ekspertizadan oʻtkaziladi, ularni amalga oshirish doirasida tuziladigan import kontraktlari esa — Vazirlar Mahkamasi huzuridagi Yangidan quriladigan va rekonstruksiya qilinadigan ishlab chiqarish quvvatlari loyihalarining texnik-iqtisodiy asoslanishini, texnika va texnologiyalarni ekspertizadan oʻtkazib baholash agentligida majburiy ekspertizadan oʻtkaziladi.

7. Vazirlar Mahkamasi huzuridagi Yangidan quriladigan va rekonstruksiya qilinadigan ishlab chiqarish quvvatlari loyihalarining texnik-iqtisodiy asoslanishini, texnika va texnologiyalarni ekspertizadan oʻtkazib baholash agentligi 2-ilovaga kiritilgan loyihalar boʻyicha toʻqimachilik asbob-uskunalarining asosiy turlarini yetkazib berish shartnomalari (kontraktlari)ni, yetkazib beriladigan asbob-uskunalar parametrlarining va texnologiyalarning zamonaviy texnologik talablarga va jahon narxlari darajasiga muvofiqligi yuzasidan belgilangan tartibda puxta ekspertizadan oʻtkazsin.

8. Oʻzbekiston Respublikasi Bosh vazirining birinchi oʻrinbosari A.J. Ramatov, “Davarxitektqurilish” qoʻmitasi, “Oʻzbekyengilsanoat” AJ loyihalash tashkilotlari bilan birgalikda toʻqimachilik ishlab chiqarishlarini loyihalash va qurishning tarmoq normalarini ikki oy muddatda ishlab chiqsinlar va kiritsinlar, bunda quyidagilarni nazarda tutsinlar:

ularni qurilishning xalqaro amaliyotiga va zamonaviy texnologiyalariga muvofiqlashtirish;

arzon, birinchi navbatda, mamlakatimizda ishlab chiqarilgan materiallardan (temir-beton va metall konstruksiyalar, sendvich-panellar va boshqalardan) foydalanish, ishlab chiqarish va noishlab chiqarish xonalarining ortiqchasini chiqarib tashlagan holda optimallashtirish yoʻli bilan qurilish-montaj ishlariga xarajatlarni kamaytirish.

9. “Oʻzstandart” agentligi, “Oʻzbekyengilsanoat” AJ Oʻzbekiston Respublikasi Tashqi iqtisodiy aloqalar, investitsiyalar va savdo vazirligi bilan birgalikda toʻqimachilik mahsulotlariga standartlarni xalqaro normalar va asosiy bozorlardagi talablarga muvofiqlashtirishga doir kompleks chora-tadbirlarni bir oy muddatda ishlab chiqsinlar hamda 2017-2018-yillarda bosqichma-bosqich amalga oshirsinlar.

10. 2017 — 2019-yillarda respublikaning toʻqimachilik va tikuv- trikotaj sanoatini yanada rivojlantirish chora-tadbirlari dasturi amalga oshirilishini muvofiqlashtirish va monitoringini olib borish boʻyicha Ishchi guruh 5-ilovaga* muvofiq tashkil etilsin.

Ishchi guruh (Z. Mirzayev) vazirliklar, idoralar, aksiyadorlik jamiyatlari, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari hamda boshqa masʼul bajaruvchilarning Dasturda nazarda tutilgan investitsiya loyihalari va topshiriqlarni oʻz vaqtida va sifatli amalga oshirish boʻyicha faoliyati puxta muvofiqlashtirilishini va monitoringi olib borilishini taʼminlasin.

11. Kredit beruvchi tijorat banklariga — ushbu Dastur doirasida amalga oshiriladigan loyihalar boʻyicha:

berilgan kreditlar boʻyicha investitsiya davrida hisoblangan foizlarni kapitallashtirish;

bir tarmoq korxonalariga beriladigan kreditlarning maksimal ulushi boʻyicha oʻrnatilgan cheklovlarni va boshqa korxonalarning ustav kapitalida tijorat banklarining ishtiroki boʻyicha cheklovlarni qoʻllamaslik;

tijorat bankining ulushlari toʻliq 100 foizgacha miqdorda boʻlgan, shu jumladan investitsiya kompaniyalarining mablagʻlari hisobiga shoʻba korxonalarini, shuningdek loyihalarni amalga oshirish uchun boshqa investorlar ishtirokidagi korxonalarni bunyod etish;

korxonalarning xorijiy valyutada shakllantirilgan ustav kapitalidagi ulushlarini bozor qiymatida (barcha xarajatlar va investitsiyalar summasidan kam boʻlmagan miqdorda) xorijiy valyutaga sotish huquqi berilsin.

12. Toʻqimachilik va tikuv-trikotaj tarmogʻining 6-ilovaga* muvofiq nooziq-ovqat isteʼmol tovarlari eksportidan olingan xorijiy valyutadagi tushumning bir qismini vakolatli banklarga majburiy sotish 2017-yil 1-yanvardan boshlab bekor qilinsin.

13. Quyidagilar bojxona toʻlovlaridan (bojxonada rasmiylashtirish yigʻimlari bundan mustasno) 2020-yil 1-yanvargacha boʻlgan muddatga ozod qilinsin:

respublikada ishlab chiqarilmaydigan, ushbu qarorning 2-ilovasiga kiritilgan investitsiya loyihalarini amalga oshirish doirasida Oʻzbekiston Respublikasi Vazirlar Mahkamasi tomonidan tasdiqlanadigan roʻyxat boʻyicha chetdan keltiriladigan texnologik asbob-uskunalar, butlovchi buyumlar va ehtiyot qismlar;

xoʻjalik yurituvchi subyektlar — Oʻzbekiston Respublikasi Vazirlar Mahkamasi tomonidan tasdiqlanadigan roʻyxat boʻyicha respublika hududiga chetdan keltiriladigan toʻqimachilik va tikuv-trikotaj tarmogʻining oʻrnatilgan texnologik uskunalariga ehtiyot qismlar va butlovchi buyumlar uchun.

14. 7-ilovaga* muvofiq, toʻqimachilik va tikuv-trikotaj tarmogʻining nooziq-ovqat isteʼmol tovarlari ishlab chiqarishga ixtisoslashgan korxonalariga 2020-yilning 1-yanvariga qadar quyidagilardan iborat soliq hamda bojxona imtiyozlari va preferensiyalari berilsin:

mikrofirmalar va kichik korxonalar uchun foyda soligʻi va mulk soligʻi toʻlashdan, yagona soliq toʻlovidan, Respublika yoʻl jamgʻarmasiga majburiy ajratmalar toʻlashdan ozod qilish;

nooziq-ovqat isteʼmol tovarlari ishlab chiqarishda foydalaniladigan, respublikada ishlab chiqarilmaydigan xom ashyo va materiallar, shu jumladan, Oʻzbekiston Respublikasi Vazirlar Mahkamasi tomonidan tasdiqlanadigan roʻyxatlarga muvofiq, komissiya shartnomalari asosida import qilinadigan uskunalar, butlovchi buyumlar uchun bojxona toʻlovlari toʻlashdan ozod qilish (bojxonada rasmiylashtirish yigʻimlari bundan mustasno);

nooziq-ovqat isteʼmol tovarlarini oʻzida ishlab chiqarish uchun zarur boʻlgan, Oʻzbekiston Respublikasi Vazirlar Mahkamasi tomonidan tasdiqlanadigan yuqoridagi roʻyxatga kiritilmagan xom ashyo, materiallar va furniturani import qilishda bojxona deklaratsiyasi qabul qilingan kundan boshlab bojxona toʻlovlarini 60 kungacha muddatga kechiktirish (bojxonada rasmiylashtirish yigʻimlari bundan mustasno).

7-ilovaga muvofiq nooziq-ovqat isteʼmol tovarlari ishlab chiqarishga ixtisoslashayotgan korxonalar jumlasiga hisobot davri yakunlari boʻyicha umumiy sotish hajmida shunday tovarlarni ishlab chiqarishdan tushgan tushumlar ulushi kamida 60 foizni tashkil etadigan korxonalar kiradi.

15. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Iqtisodiyot vazirligi hamda “Oʻzbekyengilsanoat” AJning “Oʻzbekyengilsanoat” AJ tarkibida “Oʻztoʻqimachilikeksport” MCHJ ixtisoslashtirilgan tashqi savdo tashkilotini (keyingi oʻrinlarda “Oʻztoʻqimachilikeksport” MCHJ ITST deb ataladi) tashkil etish toʻgʻrisidagi taklifi qabul qilinsin, quyidagilar uning asosiy vazifalari va faoliyat yoʻnalishlari etib belgilansin:

yengil sanoat korxonalariga, shu jumladan kichik biznes va xususiy tadbirkorlik subyektlariga marketing, axborot va konsalting xizmatlari koʻrsatish, koʻrgazmalarda va matbuot nashrlarida reklama tadbirlarini amalga oshirish, eksport salohiyatini keng yoritish hisobiga yengil sanoat mahsulotlarini eksportga yoʻnaltirish;

toʻgʻridan-toʻgʻri kontraktlar boʻyicha, shuningdek xorijda tashkil etilayotgan savdo uylari orqali mahsulotlarni eksportga sotishda yengil sanoat korxonalariga tizimli asosda koʻmaklashish;

respublikada ishlab chiqarilmayotgan texnologik uskunalar, ehtiyot qismlar, butlovchi buyumlar, xom ashyo va materiallar, aksessuarlar va furnituralarni yetkazib berishda (import qilishda), shuningdek tayyor mahsulot ishlab chiqarish va eksport qilish uchun zarur boʻlgan toʻqimachilik yarim tayyor mahsulotlari bilan taʼminlash hisobiga tarmoq ichidagi kooperatsiyani rivojlantirishda koʻmaklashish.

16. Oʻzbekiston Respublikasi Iqtisodiyot vazirligi, Moliya vazirligi, Tashqi iqtisodiy aloqalar, investitsiyalar va savdo vazirligi har yili Oʻzbekiston Respublikasining Investitsiya dasturini shakllantirishda ushbu qarorning 2-ilovasida koʻrsatilgan investitsiya loyihalari, ularning parametrlari, moliyalashtirish hajmlari va manbalari aniqlashtirilgan holda belgilangan tartibda unga kiritilishini taʼminlasinlar.

17. Oʻzbekiston Respublikasi Vazirlar Mahkamasi huzuridagi Xalqaro moliyaviy institutlar, tashkilotlar va donor mamlakatlar bilan hamkorlik qilish, yirik va strategik muhim investitsiya loyihalarini amalga oshirish masalalari boʻyicha Idoralararo kengash eksportga yoʻnaltirilgan tayyor toʻqimachilik va tikuv-trikotaj mahsulotlari ishlab chiqarish boʻyicha 2-ilovaga kiritilgan investitsiya loyihalariga tayyorlangan va kelishilgan loyiha hujjatlarining mavjudligini hisobga olgan holda, zarurat boʻlganda, tuzatishlar va qoʻshimchalar kiritilishini taʼminlasin.

18. Oʻzbekiston Respublikasi Prezidentining va Oʻzbekiston Respublikasi Vazirlar Mahkamasining ayrim qarorlariga 8-ilovaga* muvofiq oʻzgartish va qoʻshimchalar kiritilsin.

19. Mazkur qarorning bajarilishini nazorat qilish Oʻzbekiston Respublikasining Bosh vaziri A. Aripov zimmasiga yuklansin.

1. Tayyor paxta ip-gazlamalari (chit va satindan tashqari)

2. Tayyor aralash gazlamalar

3. Tayyor ipak gazlamalar (atlasdan tashqari)

4. Tayyor tikuv buyumlari, tayyor kiyim-kechak (tikuv, trikotaj va charm buyumlari)

5. Bosh kiyimlar (milliy bosh kiyimlardan tashqari)

6. Chulki-paypoq mahsulotlari

7. Toʻqimachilik attorlik mollari

8. Tikuv-toʻqimachilik sanoati uchun furnitura va aksessuarlar

1. Oʻzbekiston Respublikasi Prezidentining 2006-yil 13-noyabrdagi “2006 — 2008-yillarda toʻqimachilik sanoati korxonalarini modernizatsiya qilish va texnikaviy qayta jihozlash dasturi toʻgʻrisida”gi PQ-510-son qarorining 3-bandi va 3-ilovasi oʻz kuchini yoʻqotgan deb hisoblansin.

2. Oʻzbekiston Respublikasi Prezidentining 2007-yil 21-noyabrdagi “Paxta tolasini respublikaning ichki isteʼmolchilariga sotishni takomillashtirish va toʻqimachilik sanoatini rivojlantirish chora-tadbirlari toʻgʻrisida”gi PQ-733-son qarorining 3-bandida:

birinchi xatboshidagi “2016-yilning 1-yanvarigacha” soʻzlari “2020-yilning 1-yanvarigacha” soʻzlari bilan almashtirilsin.

uchinchi xatboshidagi “60 foiz va undan ortiq foiz” soʻzlari “40 foiz va undan ortiq foiz” soʻzlari bilan almashtirilsin.

3. Oʻzbekiston Respublikasi Prezidentining 2009-yil 28-yanvardagi “Mahalliy nooziq-ovqat isteʼmol tovarlari ishlab chiqarish kengaytirilishini ragʻbatlantirish borasidagi qoʻshimcha chora-tadbirlar toʻgʻrisida”gi PQ-1050-son qarorining 3-bandi uchinchi xatboshisidan keyin “import qilinadigan,” soʻzlaridan keyin “shu jumladan vositachilik shartnomalari asosida olib kelinadigan,” soʻzlari bilan toʻldirilsin.

4. Oʻzbekiston Respublikasi Prezidentining 2011-yil 28-martdagi “Toʻqimachilik sanoati korxonalarini jadal rivojlantirishni ragʻbatlantirishga oid qoʻshimcha chora-tadbirlar toʻgʻrisida”gi PQ-1512-son qarorining rus tilidagi matni 1-bandida:

birinchi xatboshisidagi “do 1-yanvarya 2018 goda” soʻzlari “do 1-yanvarya 2020 goda” soʻzlari bilan almashtirilsin;

ikkinchi xatboshisi chiqarib tashlansin;

uchinchi xatboshidagi “otxodi xlopkopryadeniya” soʻzlaridan keyin “, aksessuari i furnitura” soʻzlari bilan toʻldirilsin, keyingi oʻrinlar matn boʻyicha davom etib ketsin;

uchinchi va toʻrtinchi xatboshilar tegishli ravishda ikkinchi va uchinchi xatboshilar deb hisoblansin.

5. Oʻzbekiston Respublikasi Vazirlar Mahkamasining 2000-yil 29-iyundagi “Birjadan tashqari valyuta bozorini yanada rivojlantirish va mustahkamlash chora-tadbirlari toʻgʻrisida”gi 245-son qarorining 1-ilovasi:

4-bandning v) kichik bandidagi “eksport qilinadigan mahsulotni ishlab chiqarish uchun zarur boʻlgan” soʻzlari chiqarib tashlansin;

10-band quyidagi mazmundagi yangi xatboshi bilan toʻldirilsin:

“Toʻqimachilik va tikuv-trikotaj tarmogʻining nooziq-ovqat isteʼmol tovarlarini eksport qilishdan olingan xorijiy valyutadagi tushum tijorat banklariga majburiy sotilmaydi”.

6. Oʻzbekiston Respublikasi Vazirlar Mahkamasining 2004-yil 25-martdagi 141-son qarorining 5-bandi “chiqindilarini,” soʻzidan keyin “aksessuarlar va furniturani” soʻzlari bilan toʻldirilsin, keyingi oʻrinlar matn boʻyicha davom etib ketsin.