Sogʻliqni saqlash tizimini yanada takomillashtirish, respublika davolash-profilaktika muassasalarining moddiy-texnika bazasini mustahkamlash, tayanch-harakatlanish tizimi kasalliklariga chalingan bolalarga yuqori malakali tibbiy yordam koʻrsatish sifatini oshirish maqsadida Vazirlar Mahkamasi qaror qiladi:

1. Oʻzbekiston Respublikasi Sogʻliqni saqlash vazirligi va “SYNECTA a.s.” (Slovakiya) kompaniyasining “Respublika bolalar tayanch-harakat tizimi kasalliklari reabilitatsiyasi markazining davolash-diagnostika korpusini qurish va jihozlash” loyihasini (keyingi oʻrinlarda loyiha deb ataladi) amalga oshirish toʻgʻrisidagi taklifiga rozilik berilsin.

2. Quyidagilar maʼlumot uchun qabul qilinsin:

loyiha doirasida Toshkent viloyati, Qibray tumani, Salar posyolkasi, Bobur koʻchasi, 4-uy manzilida joylashgan Respublika bolalar tayanch-harakat tizimi kasalliklari reabilitatsiyasi markazining 200 oʻrinli davolash-diagnostika korpusini va muhandislik kommunikatsiyalarini qurish, jihozlash (keyingi oʻrinlarda obyekt deb ataladi) rejalashtirilgan;

loyiha 2017-yil 1-yanvargacha bajariladi va “SYNECTA a.s.” (Slovakiya) kompaniyasi tomonidan beriladigan begʻaraz yordam mablagʻlari hisobiga amalga oshiriladi, kelgusida obyekt Oʻzbekiston Respublikasi Sogʻliqni saqlash vazirligiga beriladi;

ishlab chiqilgan loyiha-smeta hujjatlariga muvofiq obyektni qurish qiymati 55,0 mlrd soʻmni, uni jihozlash qiymati esa — 7 mln AQSh dollarini tashkil qiladi;

“SYNECTA a.s.” (Slovakiya) kompaniyasi nomidan Oʻzbekiston Respublikasida norezidentning doimiy muassasasi funksiyasi Oʻzbekiston Respublikasida belgilangan tartibda roʻyxatdan oʻtkazilgan “SYNECTA Central Asia” MChJga yuklanadi;

loyiha buyurtmachisi etib “SYNECTA a.s.” (Slovakiya) kompaniyasi belgilangan;

loyihaning bosh pudratchisi etib “SYNECTA Central Asia” MChJ belgilangan;

bosh loyihachi va loyiha boʻyicha mualliflik nazorati funksiyasini bajaruvchi etib “Golden Project” XK belgilangan.

3. Quyidagilar loyihani amalga oshirish doirasida 2017-yil 1-yanvargacha boʻlgan muddatga:

Oʻzbekiston Respublikasi Vazirlar Mahkamasi tomonidan tasdiqlangan roʻyxatlar boʻyicha, shu jumladan “vaqtinchalik olib kirish” rejimida olib kiriladigan asbob-uskunalar, transport vositalari, butlovchi buyumlar, ehtiyot qismlar va materiallar bojxona toʻlovlaridan (bojxona yigʻimlaridan tashqari);

bosh pudratchi tomonidan buyurtmachiga, subpudratchilar va yetkazib beruvchilar (Oʻzbekiston Respublikasi rezidentlari) tomonidan bosh pudratchiga sotiladigan tovarlar (ishlar, xizmatlar), shuningdek Oʻzbekiston Respublikasi norezidentlari tomonidan bajariladigan ishlar (xizmatlar) qoʻshilgan qiymat soligʻidan;

“SYNECTA Central Asia” MChJ bajariladigan qurilish-montaj ishlari hajmlari boʻyicha davlat maqsadli fondlariga majburiy ajratmalardan;

Oʻzbekiston Respublikasi hududida olingan, ham toʻlov manbaidan, ham doimiy muassasa orqali soliqqa tortiladigan daromadlar boʻyicha “SYNECTA a.s.” (Slovakiya) kompaniyasi, shuningdek subpudratchilar va yetkazib beruvchilar (Oʻzbekiston Respublikasi norezidentlari) yuridik shaxslarning foyda soligʻidan;

olib kiriladigan asbob-uskunalar, transport vositalari, butlovchi buyumlar, ehtiyot qismlar va materiallar, bajariladigan ishlar, koʻrsatiladigan xizmatlarni vakolatli davlat organlarida sertifikatlashtirish boʻyicha xizmatlar toʻlovidan;

xorijiy transport va ekspeditorlik kompaniyalari avtotransport vositalarining Oʻzbekiston Respublikasi hududiga kirib kelishi va tranziti uchun yigʻimlar toʻlashdan ozod etilsin.

4. Loyihani amalga oshirish doirasida “SYNECTA a.s.” (Slovakiya) kompaniyasining doimiy muassasasiga quyidagilar yuzasidan ruxsat berilsin:

olib kiriladigan asbob-uskunalar, transport vositalari, butlovchi buyumlar, ehtiyot qismlar va materiallar, bajariladigan ishlar, shu jumladan qurilish-montaj ishlari, koʻrsatiladigan xizmatlar uchun “SYNECTA a.s.” (Slovakiya) kompaniyasi, yetkazib beruvchilar (Oʻzbekiston Respublikasi norezidentlari) foydasiga toʻlovni xorijiy valyutada amalga oshirish;

subpudratchilar va yetkazib beruvchilar (Oʻzbekiston Respublikasi rezidentlari) tomonidan ishlarni bajarish va xizmatlar koʻrsatish uchun toʻlovni, shu jumladan bosh pudrat shartnomasi boʻyicha toʻlovni Oʻzbekiston Respublikasi milliy valyutasida amalga oshirish;

5. Oʻzbekiston Respublikasi Sogʻliqni saqlash vazirligi, Oʻzbekiston Respublikasi Davlat arxitektura va qurilish qoʻmitasi, “Oʻzstandart” agentligi va Toshkent viloyati hokimligi qurilish-montaj ishlarini amalga oshirishga tegishli ruxsatnomalarning oʻz vaqtida, belgilangan tartibda berilishini, shuningdek olib kiriladigan asbob-uskunalar, transport vositalari, butlovchi buyumlar, ehtiyot qismlar va materiallar sertifikatlanishini taʼminlasinlar.

6. Oʻzbekiston Respublikasi Iqtisodiyot vazirligi loyihani amalga oshirish doirasida bosh loyiha tashkiloti tomonidan berilgan asoslangan hisob-kitoblar boʻyicha obyekt qurilishi uchun metall prokati, sement va qurilish oynasining tartibga solinadigan narxlar boʻyicha ajratilishini taʼminlasin.

7. “Oʻzbekiston havo yoʻllari” milliy aviakompaniyasi va “Oʻzbekiston temir yoʻllari” aksiyadorlik jamiyati loyihani amalga oshirish doirasida keltiriladigan asbob-uskunalar, transport vositalari, butlovchi buyumlar, ehtiyot qismlar va materiallarni yuklash, tushirish va taxlash ishlarini, koʻrsatib oʻtilgan yuklarni respublikaning aeroportlarida va temir yoʻl stansiyalarida saqlashning butun davri mobaynida yuklarga ishlov berish va ularni saqlash uchun toʻlov undirmasdan taʼminlasinlar.

8. Oʻzbekiston Respublikasi Tashqi ishlar vazirligi Oʻzbekiston Respublikasi Sogʻliqni saqlash vazirligining buyurtmanomalariga binoan, loyihani amalga oshirish davrida jalb etiladigan xorijiy mutaxassislar uchun kirish vizalarining konsullik va boshqa toʻlovlar undirilmasdan rasmiylashtirilishini taʼminlasin.

9. Oʻzbekiston Respublikasi Ichki ishlar vazirligi Oʻzbekiston Respublikasi Sogʻliqni saqlash vazirligining buyurtmanomalariga binoan, loyiha amalga oshiriladigan davrda jalb etiladigan xorijiy mutaxassislarga yashash joyi boʻyicha koʻp martalik vizalarning berilishini va muddati uzaytirilishini, shuningdek vaqtinchalik propiska qilinishini va uning muddati uzaytirilishini davlat bojlari undirmasdan taʼminlasin.

10. Oʻzbekiston Respublikasi Mehnat vazirligi Oʻzbekiston Respublikasi Sogʻliqni saqlash vazirligining buyurtmanomalariga binoan, loyihani amalga oshirish davrida jalb etiladigan xorijiy mutaxassislarni Oʻzbekiston Respublikasiga jalb etishga ruxsatnomalar berishni (muddati uzaytirilishini), shuningdek ularga Oʻzbekiston Respublikasi hududidagi mehnat faoliyati huquqiga tasdiqnomalar berishni (muddati uzaytirilishini) taʼminlasin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.