Past rentabelli, zarar koʻrib ishlayotgan va iqtisodiy nochor davlat korxonalarini, past likvidli obyektlarni hamda xususiylashtirilgan korxonalar davlat aktivlarini aniq mulkdorlarga sotishni jadallashtirish, shuningdek xususiylashtirilgan korxonalarni zamonaviylashtirish va texnika bilan qayta jihozlash uchun toʻgʻridan toʻgʻri investitsiyalarni keng jalb qilish maqsadida Vazirlar Mahkamasi qaror qiladi:

1. Oʻzbekiston Respublikasi Davlat mulki qoʻmitasi, Iqtisodiyot vazirligi, Iqtisodiyot vazirligi huzuridagi Iqtisodiy nochor korxonalar ishlari qoʻmitasining 1-ilovaga* muvofiq davlat mulki obyektlarini investitsiya majburiyatlari evaziga tanlov asosida bepul berish toʻgʻrisidagi taklifiga rozilik berilsin.

2. Past rentabelli, zarar koʻrib ishlayotgan, iqtisodiy nochor davlat korxonalarini va past likvidli obyektlarni investorlarga investitsiya majburiyatlari evaziga bepul berish boʻyicha hududiy komissiyalar Oʻzbekiston Respublikasi Davlat mulki qoʻmitasi, Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasining hududiy organlari bilan birgalikda mazkur qarorga 1-ilovada koʻrsatilgan har bir korxona va obyekt boʻyicha ular tanlov savdolariga qoʻyilgunga qadar:

korxonalar va obyektlar boʻyicha aniq shart-sharoitlardan kelib chiqqan holda ularning ishlab chiqarish binolari va egallab turgan yer maydonlari tarkibini oʻzgartirishning maqbul rejasini ishlab chiqsinlar;

zarurat boʻlganda ushbu rejalarda katta ishlab chiqarish maydonlariga va yordamchi maydonlarga, bir nechta bino va inshootlarda joylashgan, shuningdek katta maydondagi yer uchastkalariga ega boʻlgan yirik korxonalar va obyektlarni sotiladigan bir nechta mulkiy kompleks va yer uchastkalariga oldindan boʻlishni nazarda tutsinlar;

korxonalar va obyektlarni investitsiya majburiyatlari evaziga bepul berishning tender shartlarini kelishish uchun Davlat mulkini xorijiy investorlarga sotish boʻyicha tender savdolari oʻtkazuvchi Davlat komissiyasiga yuborsinlar.

3. Davlat mulkini xorijiy investorlarga sotish boʻyicha tender savdolari oʻtkazuvchi Davlat komissiyasi, Oʻzbekiston Respublikasi Davlat mulki qoʻmitasi:

past rentabelli, zarar koʻrib ishlayotgan, iqtisodiy nochor davlat korxonalarining, past likvidli obyektlar va davlat aktivlarining investitsiya majburiyatlari evaziga bepul berilishi, shuningdek investorlar tomonidan zimmasiga olingan investitsiya majburiyatlari bajarilishi ustidan qatʼiy monitoring oʻrnatsinlar;

past rentabelli, zarar koʻrib ishlayotgan, iqtisodiy nochor davlat korxonalarini va past likvidli obyektlarni investorlarga investitsiya majburiyatlari evaziga bepul berish boʻyicha hududiy komissiyalar hamda Davlat mulki qoʻmitasining hududiy organlari tomonidan tender savdolari oʻtkazishning belgilangan tartibiga rioya qilinishi ustidan muntazam nazorat oʻrnatsinlar.

4. Oʻzbekiston Respublikasi Davlat mulki qoʻmitasi, Oʻzbekiston Teleradio kompaniyasi past rentabelli, zarar koʻrib ishlayotgan, iqtisodiy nochor davlat korxonalarini past likvidli aktivlar va obyektlarni investitsiya majburiyatlari evaziga vatanimiz investorlariga va xorijiy investorlarga bepul berishning borishini, shuningdek investorlar tomonidan investitsiya majburiyatlarini bajarishning aniq natijalarini ommaviy axborot vositalarida keng yoritish boʻyicha tizimli ishlarni tashkil etsinlar.

5. Oʻzbekiston Respublikasi Hukumatining 2-ilovaga muvofiq ayrim qarorlariga oʻzgartirish va qoʻshimchalar kiritilsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

1. Vazirlar Mahkamasining 1997-yil 18-avgustdagi 404-son qarori bilan tasdiqlangan Xususiylashtirilayotgan korxonalar aksiyalarini birja va birjadan tashqari bozorlarda sotish tartibida:

6.4-banddagi ikkinchi gap chiqarib tashlansin;

10.2-banddagi “5 bank kuni” soʻzlari “30 bank kuni” soʻzlari bilan almashtirilsin.

2. Vazirlar Mahkamasining 1998-yil 22-avgustdagi 362-son qarori bilan tasdiqlangan Davlat mulkini davlat tasarrufidan chiqarish, xususiylashtirishdan tushgan mablagʻlarni hisobga olish, taqsimlash va ulardan foydalanishni nazorat qilish tartibining 17-bandidagi “5 bank kuni” soʻzlari “30 bank kuni” soʻzlari bilan almashtirilsin.

3. Vazirlar Mahkamasining 2001-yil 9-martdagi 119-son qarori (Oʻzbekiston Respublikasi QT, 2001-y., 3-son, 17-modda) bilan tasdiqlangan Davlat mulki boʻlgan obyektlarni davlat tasarrufidan chiqarish va xususiylashtirish tartibi toʻgʻrisidagi nizomda:

51-bandning birinchi xatboshidagi “usulini qoʻllanishda” soʻzlaridan oldin “xarajat” soʻzi qoʻshilsin;

53-banddagi “Oʻzbekiston Respublikasining banklararo valyuta bozorida belgilanadigan birjadan tashqari valyuta bozori” soʻzlari “Oʻzbekiston Respublikasi Markaziy banki” soʻzlari bilan almashtirilsin;

54-band quyidagi tahrirda bayon qilinsin:

“54. Baholashning ikki va undan ortiq usuli qoʻllanilgan taqdirda Komissiya Davlat mulki qoʻmitasiga mol-mulk qiymatini baholash boʻyicha barcha olingan natijalarni taqdim etadi, ular asosida Davlat mulki qoʻmitasi (respublika vazirliklari, idoralari va xoʻjalik boshqaruvi organlari tizimiga kiradigan korxonalar boʻyicha) yoki uning hududiy organi (boshqa korxonalar boʻyicha) buyrugʻiga binoan korxonaning qiymati, ustav fondi miqdori belgilanadi. Korxona qiymati, ustav fondining belgilanadigan miqdori ushbu Nizomning 51—53-bandlarida nazarda tutilgan tartibda aniqlangan baholash qiymatidan past boʻlishi mumkin emas”.

4. Vazirlar Mahkamasining “2003-2004-yillarda korxonalarni davlat tasarrufidan chiqarish va xususiylashtirish dasturi toʻgʻrisida” 2003-yil 17-apreldagi 185-son qarorida:

4-band quyidagi mazmundagi oltinchi xatboshi bilan toʻldirilsin:

“xorijiy investorlarga erkin muomaladagi valyutaga sotilishi kerak boʻlgan davlat mulki (korxona, obyekt, xoʻjalik jamiyatlari aksiyalari va ulushlari paketi) savdoga qoʻyilgan vaqtdan boshlab uch oy mobaynida birja savdolarida sotilmagan taqdirda Davlat mulki qoʻmitasi Oʻzbekiston Respublikasi Vazirlar Mahkamasining tegishli kompleksi bilan kelishgan holda ushbu mulkni milliy valyutaga sotish toʻgʻrisida qaror qabul qilishga haqlidir”.

5. Vazirlar Mahkamasining “Xususiylashtirilgan korxonalarni korporativ boshqarishni takomillashtirish chora-tadbirlari toʻgʻrisida” 2003-yil 19-apreldagi 189-son qaroriga 2-ilovada (Oʻzbekiston Respublikasi QT, 2003-y., 4-son, 32-modda):

4-banddagi va 6-bandning ikkinchi xatboshidagi “Oʻzbekiston Respublikasi Bosh vaziri huzuridagi davlatning ishonchli vakillarini tayinlash boʻyicha maxsus Komissiya” soʻzlari “Aksiyadorlik birlashmalari va kompaniyalaridagi aksiyalar davlat ulushidan samarali foydalanilishi ustidan monitoring olib borish komissiyasi” soʻzlari bilan almashtirilsin;

11-banddagi, 16-bandning ikkinchi xatboshidagi va 18-bandning birinchi xatboshidagi “Oʻzbekiston Respublikasi Bosh vaziri huzuridagi Komissiya” soʻzlari “Aksiyadorlik birlashmalari va kompaniyalaridagi aksiyalar davlat ulushidan samarali foydalanilishi ustidan monitoring olib borish komissiyasi” soʻzlari bilan almashtirilsin.

7. Vazirlar Mahkamasining “Past rentabelli, zarar koʻrib ishlayotgan, iqtisodiy nochor davlat korxonalarini va obyektlarni xususiylashtirishni jadallashtirishga doir qoʻshimcha chora-tadbirlar toʻgʻrisida” 2003-yil 26-avgustdagi 368-son qarorida (Oʻzbekiston Respublikasi QT, 2003-y., 8-son, 78-modda):

qaror 3-bandining ikkinchi xatboshi “bunda investor tomonidan investitsiya majburiyatlarini bajarish uchun qoʻshilayotgan pul mablagʻlari, moddiy boyliklar va boshqa aktivlarga daromad (foyda) soligʻi solinmaydi” soʻzlari bilan toʻldirilsin;

ikkinchi ilovaning 5-bandidagi “uch oy” soʻzlari “bir oy” soʻzlari bilan almashtirilsin.