Oʻzbekiston Respublikasi Oliy Majlisi Senati Tashqi siyosat masalalari qoʻmitasining 2005 — 2007-yillardagi, Oʻzbekiston Respublikasi Prezidenti I.A. Karimovning Oʻzbekiston Respublikasi Oliy Majlisi Qonunchilik palatasi va Senatining 2005-yil 28-yanvardagi qoʻshma majlisidagi, Oʻzbekiston Respublikasi Oliy Majlisi Senatining beshinchi yalpi majlisida 2006-yil 24-fevraldagi “Mamlakatimiz taraqqiyotining qonuniy asoslarini mustahkamlash — faoliyatimiz mezoni boʻlishi darkor” nomli maʼruzalaridan kelib chiqadigan vazifalarni bajarishga, shuningdek Oʻzbekiston Respublikasi Oliy Majlisi Senatining 2006-yil 25-fevraldagi 149-I-sonli Qarorining 3-bandi va Oʻzbekiston Respublikasi Oliy Majlisi Senati Kengashining 2006-yil 4-apreldagi 164-I-sonli Qarori bilan tasdiqlangan Oʻzbekiston Respublikasi Oliy Majlisi Senati Harakat dasturining 8.5-bandini ijro etishga qaratilgan faoliyat toʻgʻrisidagi hisobotini tinglab, Oʻzbekiston Respublikasi Oliy Majlisi Senatining Kengashi hisobot davrida Qoʻmita tomonidan tashqi siyosat va tashqi iqtisodiyot sohalarining qonunchilik bazasini takomillashtirish, mamlakatimizning bu boradagi amaldagi qonunlari ijro etilishini monitoring qilib borish va yuqori palataning parlamentlararo aloqalarini rivojlantirish yuzasidan muayyan ishlar amalga oshirilganligini qayd etadi.

Ana shu davr mobaynida Qoʻmita tomonidan 24 ta qonun koʻrib chiqildi, Oliy Majlis Senatining Oʻzbekiston Respublikasining chet davlatlardagi favqulodda va muxtor elchilarini tayinlash toʻgʻrisidagi oʻn bitta qarori loyihasi, shuningdek Oʻzbekiston Respublikasining chet davlatlardagi favqulodda va muxtor elchilarini vazifasidan ozod qilish toʻgʻrisidagi toʻqqizta qarori loyihasi tayyorlandi. Nazorat qilish sohasidagi vakolatlarni amalga oshirish doirasida BMTning Oʻzbekiston qoʻshilgan xalqaro konvensiyalaridan uchtasining hamda Oʻzbekiston Respublikasi qonunlaridan ikkitasining ijro etilishi joylarga borib tahlil qilindi. Koʻrib chiqilayotgan masalalarni chuqur va malakali tarzda tayyorlash maqsadida Qoʻmita huzurida vazirliklar va idoralarning yetakchi ekspertlari, olimlar va xalqaro masalalar bilan shugʻullanuvchi mutaxassislardan iborat ekspert guruhi tashkil etildi.

Parlamentlararo aloqalarni rivojlantirish doirasida turli darajadagi 42 ta chet el delegatsiyasi bilan uchrashuv oʻtkazildi. Qoʻmita Senat parlament delegatsiyalarining Rossiya Federatsiyasi, XXR, Fransiya va boshqa mamlakatlarga tashriflarini tashkil etishda faol qatnashdi. Yevrosiyo iqtisodiy hamjamiyati Parlamentlararo Assambleyasi ishida mamlakatimiz delegatsiyasining ishtirok etishi bilan bogʻliq masalalarni hal etish Qoʻmita faoliyatida muhim oʻrin egalladi.

Shu bilan birga hisobot davrida Qoʻmita faoliyatida muayyan kamchilik va nuqsonlar ham boʻldi. Chunonchi, qabul qilingan qarorlarning ayniqsa ijro etuvchi hokimiyat mahalliy organlari va xalq deputatlari mahalliy Kengashlari tomonidan ijro etilishi ustidan nazoratni taʼminlash ishi yanada takomillashtirishni taqozo etmoqda. Qoʻmita aʼzolari faoliyatning parlament soʻrovi singari shaklidan yetarlicha foydalanmayaptilar. Bundan tashqari ular qonunlarni amaliyotga tatbiq etish hamda ommaviy axborot vositalari orqali targʻib qilish masalalarini chuqurroq oʻrganishga koʻproq eʼtibor qaratishlari kerak.

Oʻzbekiston Respublikasi Oliy Majlisi Senatining Kengashi Oʻzbekiston Respublikasi Oliy Majlisi Senati Tashqi siyosat masalalari qoʻmitasining 2005 — 2007-yillardagi faoliyat toʻgʻrisidagi hisobotini tinglab va muhokama qilib qaror qiladi:

1. Oʻzbekiston Respublikasi Oliy Majlisi Senati Tashqi siyosat masalalari qoʻmitasining 2005 — 2007-yillardagi faoliyat toʻgʻrisidagi hisoboti maʼlumot uchun qabul qilinsin.

2. Oʻzbekiston Respublikasi Oliy Majlisi Senatining Tashqi siyosat masalalari qoʻmitasi:

Oʻzbekiston Respublikasining ustuvor manfaatlaridan kelib chiqib, tashqi siyosiy va tashqi iqtisodiy faoliyatning huquqiy bazasini kengaytirishga qaratilgan qonunlarni ishlab chiqish tizimi yanada takomillashtirilishini taʼminlasin;

mamlakatimizning tashqi siyosiy va tashqi iqtisodiy munosabatlarini tartibga soluvchi qonunlar hamda qonun hujjatlari ijro etilishi ustidan xalq deputatlari mahalliy Kengashlari bilan birgalikda muntazam ravishda va izchil monitoring olib borilishini taʼminlasin;

Oʻzbekiston qoʻshilgan xalqaro konvensiyalarning qoidalari ijro etilishi ustidan nazoratni amalga oshirish, xalqaro shartnomalar va konvensiyalarning qoidalari milliy qonun hujjatlariga singdirilishini huquqiy va tashkiliy jihatdan taʼminlash ishlarini kuchaytirsin;

Oʻzbekiston Respublikasi Oliy Majlisi delegatsiyasining Yevrosiyo iqtisodiy hamjamiyati Parlamentlararo Assambleyasi ishida ishtirok etishi doirasida kelib tushayotgan hujjatlarni koʻrib chiqish, tahliliy ishlab chiqish va ular yuzasidan ekspert xulosalarini tayyorlashning huquqiy hamda taomil tizimi shakllantirilishi va takomillashtirilishini taʼminlasin;

Oʻzbekiston Respublikasi Oliy Majlisi Senatining tahliliy salohiyatini kuchaytirish hamda uning davlat qurilishi va boshqaruv, Oʻzbekistonda demokratik huquqiy davlat barpo etish hamda fuqarolik jamiyati asoslarini shakllantirish masalalaridagi rolini oshirish maqsadida Senat huzurida ekspert-tahliliy markaz tashkil etish masalasini ishlab chiqsin;

ikki taraflama va koʻp taraflama parlamentlararo aloqalarni yanada kengaytirish hamda chuqurlashtirish ishlarini kuchaytirsin;

mintaqalardagi eng muhim ijtimoiy-iqtisodiy muammolarni hal etishda Qoʻmita aʼzolarining xalq deputatlari mahalliy Kengashlari doimiy komissiyalari bilan hamkorligi mexanizmining taʼsirchanligini oshirish chora-tadbirlarini koʻrsin;

qabul qilinayotgan qonunlarni aholi oʻrtasida targʻib qilish va mazmun-mohiyatini tushuntirish, ularni ommaviy axborot vositalarida keng yoritish masalalarida, shuningdek “Ijtimoiy himoya yili” Davlat dasturini amalga oshirishda joylarda ishlayotgan Qoʻmita aʼzolarining faolligini kuchaytirish choralarini koʻrsin.

3. Ushbu qarorning ijro etilishini nazorat qilish Oʻzbekiston Respublikasi Oliy Majlisi Senatining Tashqi siyosat masalalari qoʻmitasining raisi zimmasiga yuklatilsin.