Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi, “Banklar va bank faoliyati toʻgʻrisida”gi va 2015-yil 29-dekabrdagi OʻRQ-396-son “Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi qonunlariga hamda Oʻzbekiston Respublikasi Prezidentining 2015-yil 21-dekabrdagi PQ-2454-son “Aksiyadorlik jamiyatlariga xorijiy investorlarni jalb qilish borasidagi qoʻshimcha chora-tadbirlar toʻgʻrisida”gi qaroriga muvofiq Oʻzbekiston Respublikasi Markaziy banki Boshqaruvi qaror qiladi:

1. Oʻzbekiston Respublikasi Markaziy banki Boshqaruvining 2009-yil 15-avgustdagi 23/3-son qarori (roʻyxat raqami 2014, 2009-yil 8-oktabr) (Oʻzbekiston Respublikasi qonun hujjatlari toʻplami, 2009-y., 41-son, 447-modda) bilan tasdiqlangan Banklarni roʻyxatga olish va ular faoliyatini litsenziyalash tartibi toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Mazkur qaror 2016-yil 10-iyundan kuchga kiradi.

1. 2-band quyidagi mazmundagi xatboshi bilan toʻldirilsin:

“2016-yilning 1-iyulidan boshlab aksiyadorlik jamiyatlari tarzida tashkil etiladigan tijorat banklari Oʻzbekiston Respublikasi Prezidenti va Vazirlar Mahkamasining qarorlarida nazarda tutiladigan holatlardan tashqari, faqat xorijiy investorning ustav kapitalidagi ishtiroki ulushi 15 foizdan kam boʻlmagan taqdirdagina tashkil qilinishi mumkin.”.

2. 49-bandda:

birinchi xatboshi quyidagi tahrirda bayon etilsin:

“Muassislar tomonidan taʼsis shartnomasi imzolanganidan soʻng bir oy mobaynida Markaziy bankka bankni ochish uchun dastlabki ruxsatni berish toʻgʻrisidagi arizani taqdim etadilar. Bankni ochish uchun dastlabki ruxsatni berish toʻgʻrisidagi arizada muassislarning elektron manzili koʻrsatilishi mumkin. Bankni ochish uchun dastlabki ruxsatni berish toʻgʻrisidagi arizada muassislarning elektron manzili koʻrsatilganligi uning arizasi boʻyicha qabul qilingan qaror haqida axborot tizimi orqali elektron shaklda xabarnoma olishga boʻlgan roziligidir. Arizaga quyidagi hujjatlar ilova qilinadi:”;

oʻn toʻrtinchi xatboshi quyidagi tahrirda bayon etilsin:

“yuridik shaxsning soʻnggi uch yil uchun, shu jumladan soliq organlariga taqdim etilgan, auditorlik tashkiloti tomonidan tasdiqlangan balans hisobotlari;”.

3. 59-bandning “g” kichik bandi quyidagi tahrirda bayon etilsin:

“g) muassisning toʻlovga layoqatliligini (ustav kapitalidagi oʻz ulushini toʻlashga layoqatliligini) va ustav kapitaliga yoʻnaltiradigan mablagʻlarining kelib chiqish manbalarini, shu jumladan ularning kredit va boshqa jalb qilingan mablagʻlardan shakllantirilmaganligini tasdiqlovchi birinchi darajali chet el banki tomonidan berilgan tasdiqnoma, shuningdek uning mablagʻlarining qonuniyligi toʻgʻrisidagi xorijiy davlat vakolatli organining maʼlumotnomasi ilova qilinadi (xorijiy moliyaviy tashkilotlar bundan mustasno);”.

4. 61-band quyidagi tahrirda bayon etilsin:

“61. Bankni tashkil etishda norezident jismoniy shaxs qatnashsa, mazkur Nizomning 49-bandida keltirilgan hujjatlarga qoʻshimcha ravishda uning toʻlovga layoqatliligini (ustav kapitalidagi oʻz ulushini toʻlashga layoqatliligini) va ustav kapitaliga yoʻnaltiradigan mablagʻlarining kelib chiqish manbalarini, shu jumladan ularning kredit va boshqa jalb qilingan mablagʻlardan shakllantirilmaganligini tasdiqlovchi birinchi darajali chet el banki tomonidan berilgan tasdiqnoma, shuningdek uning mablagʻlarining qonuniyligi toʻgʻrisidagi xorijiy davlat vakolatli organining maʼlumotnomasi ilova qilinadi.”.

5. 67-banddagi “koʻrsatilgan holda” degan soʻzlar “koʻrsatilgan dastlabki ruxsatni berishni rad etish haqidagi xabarnoma yozma shaklda, shu jumladan axborot tizimi orqali elektron shaklda” degan soʻzlar bilan almashtirilsin.

6. 69-band quyidagi mazmundagi xatboshi bilan toʻldirilsin:

“Dastlabki ruxsatni berish toʻgʻrisida qaror qabul qilinganligi haqidagi xabarnoma yozma shaklda, shu jumladan axborot tizimi orqali elektron shaklda yuboriladi (topshiriladi).”.

7. 74-bandning “a” kichik bandi quyidagi mazmundagi jumlalar bilan toʻldirilsin:

“Litsenziya berish toʻgʻrisidagi arizada litsenziya daʼvogarining elektron manzili koʻrsatilishi mumkin. Litsenziya berish toʻgʻrisidagi arizada litsenziya daʼvogarining elektron manzili koʻrsatilganligi uning arizasi boʻyicha qabul qilingan qaror haqida axborot tizimi orqali elektron shaklda xabarnoma olishga boʻlgan roziligidir.”.

8. 76-band quyidagi mazmundagi xatboshi bilan toʻldirilsin:

“Litsenziya berish toʻgʻrisida qaror qabul qilinganligi haqidagi xabarnoma litsenziya daʼvogariga yozma shaklda, shu jumladan axborot tizimi orqali elektron shaklda bank hisobvaragʻi rekvizitlari va davlat bojini toʻlash muddati koʻrsatilgan holda yuboriladi (topshiriladi).”.

9. 77¹-bandning birinchi xatboshisi “yozma shaklda” degan soʻzlardan keyin “, shu jumladan axborot tizimi orqali elektron shaklda” degan soʻzlar bilan toʻldirilsin.

10. 113-band “yozma ravishda” degan soʻzlardan keyin “, shu jumladan axborot tizimi orqali elektron shaklda” degan soʻzlar bilan toʻldirilsin.