O‘zbekiston Respublikasining Oliy Kengashi qaror qiladi:

1. O‘zbekiston Respublikasining Vitse-prezidenti lavozimi tugatilsin.

2. O‘zbekiston Respublikasining Bosh Vaziri lavozimi joriy etilsin.

Z. O‘zbekiston Respublikasining Konstitutsiyasi (Asosiy Qonuni)ga quyidagi o‘zgartishlar kiritilsin:

a) 102-moddaning 8-bandidagi “O‘zbekiston SSR Vitse-prezidentining, O‘zbekiston SSR Vazirlar Mahkamasi Raisi birinchi o‘rinbosarlari va o‘rinbosarlarining” degan so‘zlar “O‘zbekiston Respublikasi Bosh vazirining, uning birinchi o‘rinbosarlari va o‘rinbosarlarining” degan so‘zlar bilan almashtirilsin;

b) 107-moddaning birinchi qismi “O‘zbekiston Respublikasining Prezidentiga” degan so‘zlardan keyin “Vazirlar Mahkamasiga” degan so‘zlar bilan to‘ldirilsin;

v) 113-modda “O‘zbekiston Respublikasi Oliy Kengashining Raisiga” degan so‘zlardan keyin “O‘zbekiston Respublikasining Vazirlar Mahkamasiga” degan so‘zlar bilan to‘ldirilsin;

g) 118-4-moddaning 6-bandidagi birinchi xatboshi quyidagi tahrirda bayon etilsin:

“Bosh vazirni, uning birinchi o‘rinbosarlari va o‘rinbosarlarini tayinlab, O‘zbekiston Respublikasi Oliy Kengashining tasdig‘iga kiritadi”;

d) 118-9-modda quyidagi tahrirda bayon etilsin:

“Agar O‘zbekiston Respublikasining Prezidenti biron-bir sabablarga ko‘ra o‘z vazifalarini bajarishni bundan buyon davom ettira olmasa (shu jumladan— salomatligi yomonlashgan va bu hol O‘zbekiston Respublikasi Oliy Kengashi tuzadigan davlat tibbiyot komissiyasining xulosasi bilan tasdiqlangan bo‘lsa), Oliy Kengash yangi Prezident saylovi o‘tkazilgunga qadar Respublika Prezidenti vazifasini vaqtincha bajarib turuvchi kishini saylaydi”;

e) 120-moddaning birinchi va to‘rtinchi qismlari quyidagi tahrirda bayon etilsin:

“O‘zbekiston Respublikasining Hukumati Bosh vazirdan, Bosh vazirning birinchi o‘rinbosarlari va o‘rinbosarlaridan, Respublika vazirlaridan, davlat qo‘mitalarining raislaridan, yirik konsernlarning va birlashmalarning rahbarlaridan iborat bo‘ladi.

O‘zbekiston Respublikasining Bosh vaziri Vazirlar Mahkamasiga rahbarlik qiladi va uning ishini tashkil etadi”.