Budjet intizomiga rioya qilinishi, budjet mablagʻlarining belgilangan maqsadda sarflanishi ustidan qattiq nazoratni taʼminlashga doir ishlarni samarali tashkil etish maqsadida Vazirlar Mahkamasi qaror qiladi:

1. Qoraqalpogʻiston Respublikasi Vazirlar Kengashi Raisi, viloyatlar, shaharlar va tumanlar hokimlari, moliya organlari va budjet muassasalari rahbarlarining eʼtibori budjet intizomiga qatʼiy va izchil amal qilinishini taʼminlash zarurligiga qaratilsin hamda ular budjet mablagʻlarining noqonuniy va boshqa maqsadlarga sarflanganligi uchun, amaldagi qonunchilikka muvofiq, shaxsan javobgar ekanliklari toʻgʻrisida ogohlantirilsin.

2. Oʻzbekiston Respublikasi Moliya vazirligi Nazorat-taftish bosh boshqarmasining budjet intizomini mustahkamlashdagi rolini kuchaytirish maqsadga muvofiq deb hisoblansin. Budjet jarayonining barcha bosqichlarida budjet intizomiga rioya qilinishi ustidan doimiy nazoratni amalga oshirish, shu jumladan, quyidagilar uning asosiy vazifasi etib belgilansin:

moliya organlari, budjet muassasalari va tijorat banklarining birinchi navbatdagi sarf-xarajatlar navbatiga, mablagʻ bilan taʼminlash hamda budjet muassasalari xodimlariga ish haqi, ijtimoiy nafaqalar, stipendiyalarni toʻlash muddatlariga va toʻliqligiga rioya qilish, shuningdek, budjet muassasalariga koʻrsatib oʻtilgan maqsadlar uchun naqd pul berish boʻyicha faoliyati ustidan nazorat va monitoringni amalga oshirish;

davlat ehtiyojlari uchun xarid qilinadigan qishloq xoʻjaligi mahsulotlarining hisob-kitob Jamgʻarmasi mablagʻlaridan belgilangan maqsadda foydalanilishini, toʻlovlarning oʻz vaqtida oʻtishini, hisob-kitoblarning toʻliq va oʻz vaqtida amalga oshirilishini nazorat qilish;

shtat-smeta intizomiga va budjet mablagʻlarini xoʻjalik ehtiyojlariga sarflash limitlariga rioya qilinishi ustidan nazoratni amalga oshirish;

hokimiyat va boshqaruv organlari rahbarlari va mansabdor shaxslarning budjet jarayoniga asossiz aralashishlari hollarining oldini olish;

investitsiya dasturlarini amalga oshirishga ajratiladigan davlat valyuta mablagʻlari va markazlashtirilgan mablagʻlardan toʻgʻri va belgilangan maqsadda foydalanilishini nazorat qilish.

3. Nazorat-taftish bosh boshqarmasi va uning hududiy nazorat-taftish boshqarmalari toʻgʻrisidagi Nizom ilovaga muvofiq tasdiqlansin.

4. Belgilab qoʻyilsinki:

Nazorat-taftish bosh boshqarmasining viloyatlar va tumanlardagi tarkibiy boʻlinmalari rahbarlari budjet intizomi buzilishi hollari ular xodimlarining ishtirokisiz aniqlangan taqdirda amaldagi qonunchilikka muvofiq qattiq javobgarlikka tortiladilar;

Nazorat-taftish bosh boshqarmasi apparati xodimlari bundan buyon huquqni muhofaza qilish organlarining alohida muhim ishlar boʻyicha jinoiy ishlar qoʻzgʻash toʻgʻrisidagi qarorlari boʻyicha taftishlar va tekshirishlarga respublika huquqni muhofaza qilish organlari rahbarlarining soʻrovnomalari asosida faqat Oʻzbekiston Respublikasi Moliya vazirligining roziligi bilan jalb etiladilar.

5. Oʻzbekiston Respublikasi Vazirlar Mahkamasining “Oʻzbekiston Respublikasi Moliya vazirligining Nazorat-taftish bosh boshqarmasi toʻgʻrisidagi Nizomni tasdiqlash haqida” 1992-yil 28-dekabrdagi 594-son qarori oʻz kuchini yoʻqotgan deb hisoblansin.

6. Oʻzbekiston Respublikasi Adliya vazirligi Moliya vazirligi, boshqa manfaatdor vazirliklar va idoralar bilan birgalikda bir oy muddatda amaldagi qonunchilikka budjet intizomini buzganlik uchun mansabdor shaxslarning jinoiy va maʼmuriy javobgarlik choralarini, shuningdek, Oʻzbekiston Respublikasi Moliya vazirligining Nazorat-taftish bosh boshqarmasiga budjet intizomini buzganlik uchun rahbarlar va mansabdor shaxslarga nisbatan jarimalar solish huquqi berilishini nazarda tutuvchi oʻzgartirish va qoʻshimchalar kiritish toʻgʻrisida takliflar taqdim etsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.S. Hamidov zimmasiga yuklansin.

1. Nazorat-taftish bosh boshqarmasi Oʻzbekiston Respublikasi Moliya vazirligining tarkibiy boʻlinmasi hisoblanadi va bevosita Oʻzbekiston Respublikasi Moliya vaziriga boʻysunadi.

2. Nazorat-taftish bosh boshqarmasining Qoraqalpogʻiston Respublikasida, viloyatlar va Toshkent shahridagi nazorat-taftish boshqarmalari boʻladi, ular oʻz faoliyatida bevosita faqat Nazorat-taftish bosh boshqarmasiga boʻysunadilar.

3. Nazorat-taftish bosh boshqarmasi Qoraqalpogʻiston Respublikasi, viloyatlar va Toshkent shahridagi nazorat-taftish boshqarmalari oʻz ishida Oʻzbekiston Respublikasi qonunlariga, Oʻzbekiston Respublikasi Oliy Majlisining boshqa hujjatlariga, Oʻzbekiston Respublikasi Prezidentining farmonlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasi Moliya vazirligining buyruqlari va yoʻriqnoma koʻrsatmalariga, boshqa qonunchilik hujjatlariga hamda ushbu Nizomga amal qiladilar.

4. Oʻzbekiston Respublikasi Moliya vazirligining Qoraqalpogʻiston Respublikasida, viloyatlar va Toshkent shahridagi nazorat-taftish boshqarmalarining dumaloq muhri, shtampi, firma blankalari boʻladi hamda ular bank muassasalarida ochiladigan maxsus subschyotlar orqali bevosita Oʻzbekiston Respublikasi Moliya vazirligi tomonidan mablagʻ bilan taʼminlanadilar.

5. Budjet jarayonining barcha bosqichlarida budjet intizomiga rioya etilishini nazorat qilish Nazorat-taftish bosh boshqarmasining hamda Qoraqalpogʻiston Respublikasi, viloyatlar va Toshkent shahridagi nazorat-taftish boshqarmalarining asosiy vazifasi hisoblanadi.

6. Quyidagilar Nazorat-taftish bosh boshqarmasining hamda Qoraqalpogʻiston Respublikasi, viloyatlar va Toshkent shahridagi nazorat-taftish boshqarmalarining vazifalari hisoblanadi:

moliya organlari va budjet muassasalari tomonidan budjet va moliya qonunchiligiga rioya etilishini, Oʻzbekiston Respublikasi qonunlari, Oʻzbekiston Respublikasi Oliy Majlisining boshqa hujjatlari, Oʻzbekiston Respublikasi Prezidentining farmonlari va farmoyishlari, Oʻzbekiston Respublikasi Vazirlar Mahkamasining qarorlari va farmoyishlari, Oʻzbekiston Respublikasi Moliya vazirligining buyruqlari va yoʻriqnoma koʻrsatmalari, budjet majburiyatlari ijrosi bilan bogʻliq boshqa qonunchilik hujjatlari bajarilishi taʼminlanishini nazorat qilish;

respublika va mahalliy budjetlarning qatʼiy bajarilishi ustidan doimiy nazoratni taʼminlash;

moliya organlari va tijorat banklarining birinchi navbatdagi sarf-xarajatlar navbatiga, mablagʻ bilan taʼminlash hamda budjet muassasalari xodimlariga ish haqi, ijtimoiy nafaqalar, stipendiyalarni toʻlash muddatlariga va toʻliqligiga rioya qilish, shuningdek, budjet muassasalariga koʻrsatib oʻtilgan maqsadlar uchun naqd pul berish boʻyicha faoliyati ustidan nazorat va monitoringni amalga oshirish;

ijtimoiy nafaqalarning oʻz vaqtida mablagʻ bilan taʼminlanishini va ularni kam taʼminlangan oilalarga mahalla qoʻmitalari orqali berilishini nazorat qilish;

davlat ehtiyojlari uchun xarid qilinadigan qishloq xoʻjaligi mahsulotlarining hisob-kitob Jamgʻarmasi mablagʻlaridan belgilangan maqsadda foydalanilishini, toʻlovlarning oʻz vaqtida oʻtishini, hisob-kitoblarning toʻliq va oʻz vaqtida amalga oshirilishini nazorat qilish;

investitsiya dasturlarini amalga oshirishga ajratiladigan markazlashtirilgan budjet mablagʻlaridan belgilangan maqsadda foydalanilishini nazorat qilish;

budjet mablagʻlarini kommunal xizmatlar va elektr energiyasiga sarflash limitlariga rioya etilishini muntazam ravishda tekshirib borish;

budjet muassasalari tomonidan shtat-smeta intizomiga rioya etish taʼminlanishini nazorat qilish;

hokimiyat va boshqaruv organlari rahbarlari va mansabdor shaxslari tomonidan budjet jarayoniga noqonuniy aralashish hollarining oldini olish;

davlat valyuta mablagʻlarining toʻgʻri va belgilangan maqsadda sarflanishini nazorat qilish;

fuqarolarning moliya va budjet intizomining buzilishi hollari toʻgʻrisidagi xatlari, shikoyatlari va arizalarini koʻrib chiqish.

7. Nazorat-taftish bosh boshqarmasi oʻz zimmasiga yuklangan vazifalarga muvofiq quyidagi funksiyalarni bajaradi:

Qoraqalpogʻiston Respublikasi, viloyatlar va Toshkent shahridagi nazorat-taftish boshqarmalarining mahalliy budjetlarning ijro etilishini hamda moliya va budjet intizomiga rioya qilishini taftish qilish va tekshirishlar (monitoring)ni tashkil etish boʻyicha faoliyatini muvofiqlashtirib borish;

respublika budjet muassasalarining xarajatlar smetasining ijrosi hamda moliya va budjet intizomiga rioya etish boʻyicha faoliyati ustidan muntazam nazoratni tashkil qilish;

Qoraqalpogʻiston Respublikasi, viloyatlar va Toshkent shahridagi nazorat-taftish boshqarmalari faoliyatini tekshirish va ularga uslubiy yordam koʻrsatish;

Oʻzbekiston Respublikasi Moliya vazirligining boshqa tarkibiy boʻlinmalari mutaxassislari bilan birgalikda Qoraqalpogʻiston Respublikasi Moliya vazirligining, viloyatlar va Toshkent shahar hokimliklari moliya boshqarmalarining, shahar va tumanlar hokimliklari moliya boʻlimlari ishlarini tekshirishni tashkil qilish va oʻtkazish;

Qoraqalpogʻiston Respublikasi Vazirlar Kengashi, viloyatlar, Toshkent shahri, shaharlar va tumanlar apparatlari xarajatlari smetalari ijrosini taftish qilish va tekshirishlar oʻtkazish;

tekshirishlar natijalari boʻyicha axborotlar, maʼlumotnomalar, Oʻzbekiston Respublikasi Moliya vazirligining hayʼat qarorlari va buyruqlari loyihalarini tayyorlash;

taftishlar va tekshirishlar natijalari boʻyicha Qoraqalpogʻiston Respublikasi Vazirlar Kengashiga, viloyatlar va Toshkent shahar hokimliklariga taqdimnomalar tayyorlash;

taftishlar va tekshirishlar natijalari boʻyicha qarorlarning moliya organlari va budjet muassasalari tomonidan bajarilishi ustidan nazoratni amalga oshirish;

markazlashtirilgan topshiriqlar boʻyicha taftishlar va tekshirishlar materiallarini umumlashtirish, ular yuzasidan tegishli axborotlar va takliflar tayyorlash;

moliya va budjet intizomining aniqlangan xarakterli buzilishlari boʻyicha taftishlar va tekshirishlar materiallarini umumlashtirish hamda kelgusida ularni bartaraf etish va ularning oldini olishga doir takliflar tayyorlash;

maxsus vakolatli organ qarori asosida xoʻjalik yurituvchi subyektlarning moliya-xoʻjalik faoliyatini taftish qilish va tekshirishlarni amalga oshirish.

8. Qoraqalpogʻiston Respublikasi, viloyatlar va Toshkent shahar nazorat-taftish boshqarmalarining funksiyalariga quyidagilar kiradi:

mahalliy budjetlar ijrosiga hamda moliya va budjet intizomiga rioya qilinishini taftish qilish va tekshirishni (monitoring) tashkil etish va oʻtkazish;

xarajatlar smetasini bajarish hamda moliya va budjet intizomiga rioya qilinishi boʻyicha mahalliy budjet muassasalari faoliyati ustidan muntazam nazoratni tashkil etish;

budjet ijro etilishi va budjet intizomiga rioya etilishi boʻyicha Qoraqalpogʻiston Respublikasi Moliya vazirligi, viloyatlar va Toshkent shahar hokimliklari moliya boshqarmalari, shahar va tumanlar hokimliklari moliya boʻlimlari ishini tekshirishni tashkil etish va oʻtkazish;

Qoraqalpogʻiston Respublikasi Vazirlar Kengashi, viloyatlar, Toshkent shahar, shaharlar va tumanlar hokimliklari apparatlari xarajatlari smetasi bajarilishini taftish qilish va tekshirish;

tekshirish natijalari boʻyicha axborotnomalar, maʼlumotnomalar tayyorlash;

taftishlar va tekshirish natijalari boʻyicha Qoraqalpogʻiston Respublikasi Vazirlar Kengashiga, viloyatlar va Toshkent shahar, shaharlar va tumanlar hokimliklariga koʻrsatmalar tayyorlash;

moliya organlari va budjet muassasalari tomonidan taftishlar va tekshirish natijalari boʻyicha qabul qilingan qarorlar bajarilishi ustidan nazoratni amalga oshirish;

markazlashtirilgan topshiriqlar boʻyicha taftish va tekshirishlarni tashkil etish va oʻtkazish, ular boʻyicha tegishli axborotlar va takliflar tayyorlash,

moliya va budjet intizomining aniqlangan xarakterli buzilishlari boʻyicha taftishlar va tekshirishlar materiallarini umumlashtirish hamda ularni bartaraf etish va kelgusida oldini olish boʻyicha takliflar tayyorlash;

maxsus vakolatli organning qarori asosida xoʻjalik yurituvchi subyektlar moliya-xoʻjalik faoliyatini taftish qilish va tekshirish.

9. Nazorat-taftish bosh boshqarmasi va uning hududiy boʻlinmalariga yuklangan vazifalar va funksiyalarni amalga oshirish uchun ularga quyidagi huquqlar berilgan;

mahalliy budjetlar ijrosi boʻyicha hududiy moliyaviy organlar faoliyatini taftish qilish va tekshirish (monitoring); barcha darajalardagi budjet muassasalarini xarajatlar smetasi bajarilishi va budjet intizomiga rioya qilinishi boʻyicha taftish qilish va tekshirish;

barcha darajalardagi hududiy moliya organlari va budjet muassasalarida pul va buxgalteriya hujjatlarini, hisobotlar, smetalar va boshqa hujjatlarni, moddiy boyliklar mavjudligini tekshirish;

maxsus vakolatli organning qarori asosida xoʻjalik yurituvchi subyektlar moliya-xoʻjalik faoliyatini taftish qilish va tekshirish,

tijorat bank muassasalaridan, soliq organlaridan, boshqa idoralardan taftishlar va tekshirishlari oʻtkazish paytida paydo boʻluvchi masalalar boʻyicha zarur maʼlumotlar va axborotlarni olish;

qurilish, montaj, tuzatish ishlarini, boshqa ishlarni nazorat tartibida oʻlchash va boshqa tekshirishlar uchun mutaxassislarni belgilangan tartibda jalb qilish;

barcha darajalardagi hududiy moliyaviy organlar va bank muassasalari, shuningdek, xoʻjalik yurituvchi subyektlar rahbarlari va mansabdor shaxslaridan taftishlar va tekshirish davomida paydo boʻluvchi masalalar, moliya va budjet intizomi buzilishi hollari boʻyicha tushuntirishlar berishni, shuningdek, maʼlumotnomalar, taftishlar va tekshirishlar dalolatnomalarini imzolashni talab qilish;

zarur hollarda kassa va kassa binolari, omborlar, arxivlar muhrlanishini, qalbaki, soxtalashtirilgan hujjatlar va boshqa suiisteʼmolliklar aniqlangan taqdirda esa hujjatlarni olib qoʻyish, tekshirilayotgan obyektlar rahbarlaridan asosiy vositalar, tovar-moddiy boyliklar, pul mablagʻlari va hisob-kitoblar xatlanishini talab qilish;

taftishlar va tekshirishlar materiallari boʻyicha moliyaviy va budjet intizomi buzilishlarini bartaraf etish, moddiy zararni undirish, aybdor shaxslarni javobgarlikka tortish yuzasidan tegishli takliflar kiritish;

moliya va budjet intizomi buzilishi aniqlangan taqdirda taftishlar va tekshirish materiallarini huquqni muhofaza qilish organlariga berish.

10. Nazorat-taftish bosh boshqarmasi va Qoraqalpogʻiston Respublikasi, viloyatlar va Toshkent shahar nazorat-taftish boshqarmalari quyidagilarga majburdir:

yuklangan vazifalar va funksiyalar bajarilishi yuzasidan ishni puxta tashkil etish;

mazkur Nizom talablarini soʻzsiz bajarish;

Oʻzbekiston Respublikasining qonun hujjatlari va normativ hujjatlari toʻgʻri qoʻllanilishini taʼminlash;

taftishlar va tekshirishlar oʻtkazishda hududiy moliya organlari, budjet muassasalari va xoʻjalik yurituvchi subyektlar faoliyatiga malakali, prinsipial, toʻgʻri, asosli baho berish;

davlat siriga va olib borilayotgan ishlar maxfiyligi rejimiga, oʻtkazilayotgan taftish va tekshirishlar maxfiyligiga qatʼiy rioya qilish;

Oʻzbekiston Respublikasi Moliya vazirligi va Nazorat-taftish bosh boshqarmasi rahbariyatini moliya va budjet intizomi buzilishi aniqlangan hollar toʻgʻrisida oʻz vaqtida xabardor qilish.

11. Nazorat-taftish bosh boshqarmasi quyidagi tashkiliy tuzilmaga egadir:

11.1. Budjet intizomiga rioya etilishini nazorat qilish boshqarmasi, uning tarkibiga:

hududiy moliya organlari tomonidan budjet intizomiga rioya etilishini nazorat qilish boʻlimi;

respublika budjet muassasalari tomonidan budjet intizomiga rioya etilishini nazorat qilish boʻlimi.

11.2. Valyuta va tashqi savdo operatsiyalarini nazorat qilish boʻlimi.

11.3. Tashkiliy-uslubiy ishlar va auditorlik faoliyatini nazorat qilish boʻlimi.

11.4. Xoʻjalik yurituvchi subyektlar faoliyatini taftish qilish boʻlimi.

12. Qoraqalpogʻiston Respublikasi, viloyatlar va Toshkent shahar nazorat-taftish boshqarmalari quyidagi tashkiliy tuzilmaga egadirlar:

12.1. Budjet intizomiga rioya etilishini nazorat qilish boʻlimlari.

12.2. Tashkiliy-uslubiy ishlar boʻlimlari.

12.3. Xoʻjalik yurituvchi subyektlar faoliyatini taftish qilish hamda valyuta va tashqi savdo operatsiyalarini nazorat qilish boʻlimlari.

13. Nazorat-taftish bosh boshqarmasiga Oʻzbekiston Respublikasi Moliya vaziri tomonidan tayinlanadigan boshliq boshchilik qiladi.

14. Budjet intizomiga rioya etilishini nazorat qilish boshqarmasiga Oʻzbekiston Respublikasi Moliya vaziri tomonidan tayinlanadigan boshliq boshchilik qiladi. Budjet intizomiga rioya etilishini nazorat qilish boshqarmasi boshligʻi ayni vaqtda Nazorat-taftish bosh boshqarmasi boshligʻining birinchi oʻrinbosari hisoblanadi.

15. Qoraqalpogʻiston Respublikasi, viloyatlar va Toshkent shahar nazorat-taftish boshqarmalariga Oʻzbekiston Respublikasi Moliya vaziri tomonidan tayinlanadigan boshliqlar boshchilik qiladi.

16. Qoraqalpogʻiston Respublikasi, viloyatlar va Toshkent shahar nazorat-taftish boshqarmalarining budjet intizomiga rioya etilishini nazorat qilish boʻlimlariga Oʻzbekiston Respublikasi Moliya vaziri tomonidan tayinlanadigan boshliqlar boshchilik qiladi. Budjet intizomiga rioya etilishini nazorat qilish boʻlimlari boshliqlari ayni vaqtda Qoraqalpogʻiston Respublikasi, viloyatlar va Toshkent shahar nazorat-taftish boshqarmalari boshliqlarining birinchi oʻrinbosarlari hisoblanadi.

17. Nazorat-taftish bosh boshqarmasi va Qoraqalpogʻiston Respublikasi, viloyatlar va Toshkent shahar nazorat-taftish boshqarmalari oʻz ishini Oʻzbekiston Respublikasi Moliya vaziri va Nazorat-taftish bosh boshqarmasi boshligʻi tomonidan tasdiqlanadigan yillik rejalar boʻyicha amalga oshiradi.

18. Nazorat-taftish bosh boshqarmasi va Qoraqalpogʻiston Respublikasi, viloyatlar va Toshkent shahar nazorat-taftish boshqarmalari zarur hollarda moliyaviy organlar va budjet muassasalari faoliyatini rejadan tashqari taftish qiladi va tekshiradi, maxsus vakolatli organning ruxsati boʻyicha esa xoʻjalik yurituvchi subyektlarning moliya-xoʻjalik faoliyatini taftish qiladi va tekshiradi.

19. Nazorat-taftish bosh boshqarmasi va Qoraqalpogʻiston Respublikasi, viloyatlar va Toshkent shahar nazorat-taftish boshqarmalari kadrlar tarkibi barqaror hayotiy prinsiplarga ega boʻlgan yuqori malakali mutaxassislardan va iqtisodiyot oliy oʻquv yurtlarining professional tayyorgarlik koʻrgan yosh bitiruvchilaridan butlanadi.

20. Nazorat-taftish bosh boshqarmasi va Qoraqalpogʻiston Respublikasi, viloyatlar va Toshkent shahar nazorat-taftish boshqarmalari xodimlari attestatsiyasi har 3 yilda oʻtkaziladi. Attestatsiyani oʻtkazish tartibi Oʻzbekiston Respublikasi Moliya vaziri tomonidan belgilanadi.

21. Nazorat-taftish bosh boshqarmasi boshligʻi oʻziga yuklangan vazifalarni amalga oshirishda quyidagi huquqlarga ega:

Oʻzbekiston Respublikasi Moliya vazirligi rahbariyatiga xodimlarni ishdan boʻshatish va ishdan ishga oʻtkazish toʻgʻrisida, Oʻzbekiston Respublikasi Mehnat kodeksiga muvofiq ragʻbatlantirishlar va intizomiy jazolar qoʻllash, xodimlarning xizmat safarlariga borishi toʻgʻrisida takliflar kiritish;

Xatlar, xizmat guvohnomalarini va xodimlarga taftishlar va tekshirish oʻtkazish huquqini beruvchi bir martalik yozma koʻrsatmalarni imzolash.

22. Qoraqalpogʻiston Respublikasi, viloyatlar va Toshkent shahar nazorat-taftish boshqarmasi boshliqlari quyidagi huquqlarga egadir:

nazorat-taftish boshqarmalari xodimlarini ishga qabul qilish va ishdan boʻshatish va ishdan ishga oʻtkazish, Oʻzbekiston Respublikasi Mehnat kodeksiga muvofiq ragʻbatlantirish va intizomiy jazolarni qoʻllash, xodimlarning xizmat safarlariga borishi boʻyicha buyruqlar chiqarish;

xatlar, xizmat guvohnomalarini va xodimlarga taftishlar va tekshirishlar oʻtkazish huquqini beruvchi bir martalik yozma koʻrsatmalarni imzolash.

23. Nazorat-taftish bosh boshqarmasi va Qoraqalpogʻiston Respublikasi, viloyatlar va Toshkent shahar nazorat-taftish boshqarmasi boshliqlari oʻzlariga yuklangan vazifalarni amalga oshirishda quyidagilarga majburdir:

nazorat-taftish bosh boshqarmasi va Qoraqalpogʻiston Respublikasi, viloyatlar va Toshkent shahar nazorat-taftish boshqarmasi ishini puxta tashkil etish;

taftishlar va tekshirishlar oʻtkazishda qonun hujjatlari toʻgʻri qoʻllanishini taʼminlash;

amaliy malaka oshirishga, ijro va mehnat intizomi mustahkamlanishiga qaratilgan tadbirlarni ishlab chiqish va amalga oshirish;

davlat siri saqlanishini va olib borilayotgan ishlar maxfiyligi rejimini taʼminlash.