Fuqarolarning konstitutsiyaviy huquq va manfaatlarini ta’minlash, mulkchilik shakllaridan qat’i nazar, korxonalar va tashkilotlar xodimlariga ish haqi o‘z vaqtida va to‘liq to‘lanishi uchun xo‘jalik yurituvchi subyektlarning javobgarligini oshirish maqsadida Vazirlar Mahkamasi qaror qiladi:

1. 2002-yil 1-apreldan boshlab mulkchilik shakllaridan qat’i nazar korxonalar va tashkilotlarning ish haqini tovarlar bilan natura shaklida to‘lashi taqiqlansin, qishloq xo‘jaligi tovar ishlab chiqaruvchilari tomonidan yetishtirilgan va qayta ishlangan, xodimlarning yozma arizasiga ko‘ra shartnomaviy narxlarda beriladigan qishloq xo‘jaligi mahsulotlari bundan mustasno, yagona ijtimoiy to‘lov hamda 2019-yil 1-yanvarga qadar bo‘lgan davr uchun fuqarolarning budjetdan tashqari Pensiya jamg‘armasiga majburiy sug‘urta badallari bo‘yicha qarzdorlik mavjud bo‘lmagan taqdirda.

2. Tijorat banklari:

tegishli kafolat bilan, shu jumladan yuqori likvidli mol-mulk garovi asosida (shu jumladan korxonalar va tashkilotlarning ishlab chiqarish va infratuzilma obyektlari, transport vositalari hamda boshqa likvidli aktivlari) ish haqi to‘lash uchun xo‘jalik yurituvchi subyektlarga kreditlar bersinlar. Belgilansinki, ko‘rsatib o‘tilgan kreditlar o‘z vaqtida qaytarilmagan taqdirda garovga qo‘yilgan mol-mulk, qarz oluvchining roziligidan qat’i nazar, keyinchalik belgilangan tartibda uni sotish huquqi bilan tijorat bankining mulkiga o‘tadi;

tegishli ravishda bankomatlar tarmog‘ini ko‘paytirgan holda elektron plastik kartochkalar vositasida ish haqi to‘lashga doir bank xizmatlari hajmini kengaytirsinlar.

3. Belgilansinki, vazirliklar, idoralar, xo‘jalik birlashmalari, mulkchilik shakllaridan qat’i nazar korxonalar va tashkilotlar rahbarlari xodimlarga ish haqi o‘z vaqtida va to‘liq to‘lanishi uchun shaxsan javob beradilar.

Xo‘jalik birlashmalari, mulkchilik shakllaridan qat’i nazar xo‘jalik hisobidagi korxonalar va tashkilotlar rahbarlari:

mehnatga haq to‘lash tarif setkalarining rag‘batlantiruvchi rolini oshirishni, mehnatga haq to‘lash jamg‘armasining tarif qismi va tarifga qo‘shimcha qismlari o‘rtasidagi maqbul nisbatni ta’minlashni hisobga olgan holda mehnatga haq to‘lashning tarif setkalarini bir oy muddatda qayta ko‘rib chiqsinlar;

har bir xodimni tegishli davrda unga to‘lanadigan ish haqining tarkibiy qismlari, ushlab qolingan pul miqdorlari va uning asoslari, shuningdek to‘lanadigan umumiy pul summasi to‘g‘risida majburiy tartibda yozma shaklda xabardor qilsinlar.

4. O‘zbekiston Respublikasi Prokuraturasi xo‘jalik yurituvchi subyektlar rahbarlarining ish haqini o‘z vaqtida to‘lashning amaldagi qonun hujjatlariga muvofiq belgilangan tartibiga rioya qilishi ustidan nazoratni kuchaytirsin hamda ish haqi bo‘yicha muddati o‘tkazib yuborilgan qarzlar hosil bo‘lgan hollarda aybdor shaxslarni jinoiy jazolashgacha javobgarlikka tortsin.

5. O‘zbekiston Kasaba uyushmalari Federatsiyasi Kengashiga, kasaba uyushmalarining tarmoq kengashlariga vazirliklar va idoralar bilan birgalikda mehnatga haq to‘lashni tartibga solishda va u o‘z vaqtida to‘lanishini ta’minlashda jamoa shartnomalarining, xo‘jalik yurituvchi subyektlarning boshqa normativ hujjatlarining rolini oshirishga doir qo‘shimcha chora-tadbirlar ko‘rish tavsiya etilsin, chora-tadbirlarda ish haqi o‘z vaqtida to‘lanmaganligi uchun ish beruvchilarning moddiy javobgarligi choralari nazarda tutilsin.

6. O‘zbekiston Respublikasi Adliya vazirligi manfaatdor vazirliklar va idoralar bilan birgalikda ikki hafta muddatda:

Vazirlar Mahkamasiga amaldagi qonun hujjatlariga mazkur qarordan kelib chiquvchi o‘zgartirish va qo‘shimchalar to‘g‘risidagi, shuningdek ish haqi o‘z vaqtida to‘lanishi ta’minlanmaganligi yoxud ish haqi taqiqlangan shaklda to‘langanligi uchun vazirliklar, idoralar, xo‘jalik yurituvchi subyektlar va tijorat banklari rahbarlarining javobgarligini, shu jumladan moddiy javobgarligini kuchaytirishni nazarda tutuvchi takliflarni kiritsin;

idoraviy normativ hujjatlarni mazkur qaror talablariga muvofiqlashtirsin.

7. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.S. Azimov va O‘zbekiston Respublikasi Markaziy banki raisi F.M. Mullajonov zimmasiga yuklansin.