Oʻzbekiston Respublikasi Hukumati bilan Ozarbayjon Respublikasi Hukumati, keyingi oʻrinlarda “Tomonlar” deb ataladi,

har ikkala davlat xalqlari oʻrtasidagi umumiy tarixiy ildizlarni va anʼanaviy doʻstlik munosabatlarni eʼtiborga olib,

Oʻzbekiston Respublikasi bilan Ozarbayjon Respublikasi oʻrtasida madaniyat sohasidagi hamkorlikni yanada rivojlantirish va mustahkamlashga intilib,

bunday hamkorlik har ikkala davlat xalqlarining tub manfaatlariga javob berishiga, davlatlararo aloqalarni kengaytirishi va mustahkamlashiga, umuminsoniy qadriyatlar qaror topishiga, ikki mamlakat madaniyatlari boyishiga koʻmaklashishiga ishonch hosil qilib,

quyidagilar toʻgʻrisida ahdlashdilar:

Tomonlar anʼanaviy madaniy aloqalarni saqlash va rivojlantirish, teatr, musiqa, tasviriy sanʼat, estrada va sirk sanʼati, kino, televideniye va radioeshittirish, kutubxona va muzey ishi, tarixiy va madaniy yodgorliklarni muhofaza qilish, taʼmirlash va ulardan foydalanish, xalq badiiy havaskorligi, xalq hunarmandligi va madaniy faoliyatning boshqa turlari sohalarida almashish va hamkorlik qilish uchun qulay sharoitlar yaratilishiga yordam beradilar.

Tomonlar har ikkala davlatning tegishli vazirliklari, idoralari oʻrtasida, shuningdek jamoat tashkilotlari, ijodiy birlashmalar, uyushmalar, jamgʻarmalar yoʻnalishidagi hamkorlikni va toʻgʻridan toʻgʻri aloqalarni ragʻbatlantiradilar.

Tomonlar boshqa davlatning fuqarolariga oʻz mamlakatlari xalqlarining madaniy boyliklariga, jumladan tarixan shakllangan butunligini oʻzlari tasdiqlaydigan madaniy qadriyatlar kolleksiyalari bilan keng tanishish imkoniyatini taʼminlaydilar.

Tomonlar oʻzaro foydali ikki tomonlama madaniy hamkorlik rivojlanishiga koʻmaklashadilar.

Mana shu maqsadlarda ular mamlakatlarning har biridagi madaniy hayot toʻgʻrisidagi axborot ayirboshlanishini ragʻbatlantiradilar, festivallar, gastrollarni oʻtkazishga boshqa mamlakat mualliflarining musiqali va teatr asarlari sahnalashtirilishiga, delegatsiyalar ayirboshlanishiga, ijodiy uchrashuvlar oʻtkazilishiga, badiiy koʻrgazmalar ayirboshlanishiga koʻmaklashadilar.

Tomonlar har ikkala davlat madaniy boyliklarini, shu jumladan tarixiy, madaniy va diniy yodgorliklarini saqlash sohasida hamkorlik qiladilar.

U yoki bu madaniy va tarixiy boyliklarga egalik qilish huquqi masalasida nizolar paydo boʻlgan taqdirda, Tomonlar ularni oʻz davlatlarining amaldagi qonunchiligi asosida muzokaralar yoʻli bilan hal etish majburiyatini oʻz zimmalariga oladilar.

Tomonlar madaniyatning moddiy-texnika bazasini rivojlantirish va mustahkamlash, yangi texnologiyalarni ayirboshlash, madaniyat va sanʼat muassasalari uchun asbob-uskunalar va texnik vositalarni oʻzaro foydali asosda yetkazib berish tashkil etilishi masalalaridagi hamkorlikni qoʻllab-quvvatlaydilar.

Tomonlar madaniyat va sanʼat sohasida xalqaro tashkilotlar yoʻnalishida oʻz faoliyatlarini muvofiqlashtiradilar.

Tomonlar kinofestivallar oʻtkazilishiga, kinofilmlar, delegatsiya va mutaxassislar ayirboshlanishiga, birgalikda sahna asarlari qoʻyilishiga, kino arxivlari oʻrtasidagi hamkorlikka, kinematografiya sohasida adabiyot va materiallar ayirboshlanishiga koʻmaklashadilar.

Tomonlar televideniye va radioeshittirish sohasida hamkorlik qiladilar.

Tomonlar kitob nashr etish ishi sohasidagi ayirboshlashni ragʻbatlantiradilar, kutubxonalararo aloqalarni, yozuvchilar, jurnalistlar va noshirlar delegatsiyalari ayirboshlanishini, siyosiy, iqtisodiy, madaniy va ilmiy hayot toʻgʻrisidagi materiallar eʼlon qilinishini, gazeta va jurnallar nashr qilinishini har tomonlama qoʻllab-quvvatlaydilar.

Tomonlar Oʻzbekiston Respublikasi bilan Ozarbayjon Respublikasi oʻrtasida mualliflik huquqini himoya qilish sohasidagi hamkorlikni rivojlantirishga koʻmaklashadilar.

Tomonlar jismoniy tarbiya va sport sohasidagi aloqalar, eng avvalo sport tashkilotlari, jamiyatlari va klublari oʻrtasidagi bevosita hamkorlikni rivojlantirishga, musobaqalar oʻtkazilishiga, sportchilar va trenyerlarni, ilmiy-metodiy axborotni va xalqaro musobaqalarda qatnashish tajribasini ayirboshlash yoʻli bilan koʻmaklashadilar.

Mazkur Bitimni bajarish maqsadida almashishlar davlat dasturlari va tegishli vazirliklar, idoralar va tashkilotlar oʻrtasidagi hamkorlikning ishchi rejalari (protokollari) ishlab chiqiladi va imzolanadi.

Mazkur Bitimda nazarda tutilgan sohalardagi hamkorlikning aniq shakllari va shartlari tegishli vazirliklar, idoralar va tashkilotlar oʻrtasidagi alohida Bitimlar bilan tartibga solinadi.

Tomonlar zarurat boʻlganda mazkur Bitimni amalga oshirish, Tomonlarning oʻzaro hamkorligi boʻyicha tavsiyalar tayyorlash uchun Aralash Komissiya tashkil etishlari mumkin.

Mazkur Bitim imzolangan kundan boshlab kuchga kiradi, besh yil davomida amal qiladi va, agar Tomonlardan biri tegishli muddat tamom boʻlguniga qadar uning amal qilishini toʻxtatish haqidagi oʻz niyati haqida kamida olti oy oldin ikkinchi Tomonni yozma ravishda xabardor qilmasa, keyingi besh yillik davrlarga oʻz-oʻzidan uzaytiriladi.

1996-yil 27-mayda Baku shahrida har biri oʻzbek, ozarbayjon va rus tillarida boʻlgan ikki nusxada tuzildi, barcha matnlar bir xil kuchga egadir.

Mazkur Bitimning qoidalarini talqin qilish maqsadida rus tilidagi matndan foydalaniladi.