Oʻzbekiston Respublikasi Prezidentining 2014-yil 21-noyabrdagi PF-4672-son “Ish haqi, pensiyalar, stipendiyalar va nafaqalar miqdorini oshirish toʻgʻrisida”gi Farmoniga muvofiq buyuraman:

1. Oʻzbekiston Respublikasi Prezidentining 2014-yil 21-noyabrdagi PF-4672-son “Ish haqi, pensiyalar, stipendiyalar va nafaqalar miqdorini oshirish toʻgʻrisida”gi Farmoni boʻyicha pensiyalarni qayta hisoblash tartibi toʻgʻrisidagi nizom ilovaga muvofiq tasdiqlansin.

2. Oʻzbekiston Respublikasi moliya vazirining 2014-yil 14-avgustdagi 55-son “Oʻzbekiston Respublikasi Prezidentining 2014-yil 31-iyuldagi PF-4639-son “Ish haqi, pensiyalar, stipendiyalar va nafaqalar miqdorini oshirish toʻgʻrisida”gi Farmoni boʻyicha pensiyalarni qayta hisoblash tartibi toʻgʻrisidagi nizomni tasdiqlash haqida”gi buyrugʻi (roʻyxat raqami 2611, 2014-yil 18-avgust) (Oʻzbekiston Respublikasi qonun hujjatlari toʻplami, 2014-y. 34-son, 438-modda) oʻz kuchini yoʻqotgan deb hisoblansin.

3. Mazkur buyruq rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasi Prezidentining 2014-yil 21-noyabrdagi PF-4672-son “Ish haqi, pensiyalar, stipendiyalar va nafaqalar miqdorini oshirish toʻgʻrisida”gi Farmonining 4-bandiga muvofiq, pensiyalarni qayta hisoblash tartibini belgilaydi.

1. 2014-yilning 15-dekabridan boshlab Oʻzbekiston Respublikasi hududida eng kam:

ish haqi — oyiga 118 400 soʻm;

yoshga doir pensiyalar — oyiga 231 575 soʻm;

bolalikdan nogironlarga beriladigan nafaqa — oyiga 231 575 soʻm;

zarur ish stajiga ega boʻlmagan keksa yoshdagi va mehnatga layoqatsiz fuqarolarga beriladigan nafaqa — oyiga 142 100 soʻm belgilandi.

2. 2014-yil 15-dekabrdan keyin ish haqining yakka tartibdagi koeffitsiyentlarni (2011-yil 1-oktabrdan amalga kiritilgan) qoʻllagan holda yangi tayinlanadigan pensiyalarni hisoblab chiqarish uchun olinadigan ish haqini tenglashtirish uchun ushbu Nizomning ilovasiga muvofiq eng kam oylik ish haqi miqdorlari qoʻllaniladi.

3. 2014-yilning dekabr oyi uchun Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining tuman (shahar) boʻlimlari tomonidan pensiyalar va nafaqalar hamda pochta pul oʻtkazmalari boʻyicha toʻlash qaydnomalari qonun hujjatlarida belgilangan muddatlarda pensiyalar va nafaqalar miqdorlari 1,05 baravarga oshirishni inobatga olgan holda tuziladi.

4. Pensiyani hisob-kitob qilish uchun eng kam ish haqining sakkiz baravaridan (118 400 soʻm x 8 = 947 200 soʻm) ortiq boʻlmagan oʻrtacha oylik ish haqi inobatga olinadi.

5. Ish haqining yakka tartibdagi koeffitsiyenti qoʻllanilgan yangi oʻrtacha oylik ish haqi miqdori eng kam oylik ish haqining sakkiz baravari va undan yuqori miqdorida boʻlgan hollarda, pensiyalarni qayta hisoblashni amalga oshirishda ish haqi miqdori eng kam ish haqining sakkiz baravari 947 200 soʻm (118 400 soʻm x 8) bilan chegaralanib, ish stajining davomiyligiga bogʻliq ravishda pensiyalarni hisoblab chiqarish uchun qabul qilinadigan foizlarga koʻpaytiriladi.

6. Yoshga doir yoki I va II guruh nogironlik boʻyicha pensionyerlar “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonunining 7 va 17-moddalariga muvofiq, pensiya tayinlash uchun zarur ish stajiga ega boʻlmagan taqdirda, qayta hisoblashdagi pensiya miqdori mavjud stajga mutanosib ravishda belgilanadi.

7. Barcha hollarda pensiyalarga ustama eng kam oylik ish haqidan (118 400 soʻm) kelib chiqib aniqlanadi.

8. Mazkur Nizom Oʻzbekiston Respublikasi Mehnat va aholini ijtimoiy muhofaza qilish vazirligi bilan kelishilgan.