Xalqaro taraqqiyot uyushmasi bilan hamkorlikni yanada kengaytirish, shuningdek uyushmaning ustav kapitali ko‘payishi munosabati bilan O‘zbekiston Respublikasining undagi boshlang‘ich ulushini saqlab qolish maqsadida:

1. Xalqaro taraqqiyot uyushmasi (XTU) Boshqaruvchilar kengashi tomonidan XTUning ustav kapitalini ko‘paytirish va XTUga a’zo mamlakatlarning XTU ustav kapitalidagi ulushlarini saqlab qolish maqsadida qo‘shimcha aksiyalarga obuna bo‘lishlarini tashkil etish to‘g‘risida qaror qabul qilinganligi ma’lumot uchun qabul qilinsin.

2. O‘zbekiston Respublikasi Iqtisodiyot vazirligi, Moliya vazirligi va Markaziy bankining XTUning ustav kapitalidagi 7972 ta aksiyaga, shu jumladan nominal qiymati 25 AQSH dollari bo‘lgan jami 54,3 ming AQSH dollari miqdoridagi 2172 ta haq to‘lanadigan aksiya hamda 5800 ta haq to‘lanmaydigan aksiyalarga obuna bo‘lish to‘g‘risidagi taklifi ma’qullansin.

3. O‘zbekiston Respublikasi moliya vaziriga O‘zbekiston Respublikasini XTUning ustav kapitalidan qo‘shimcha aksiyalar xarid qilish niyati borligi to‘g‘risidagi yozma majburiyatni O‘zbekiston Respublikasi nomidan imzolash vakolati berilsin.

4. Belgilab qo‘yilsinki, XTUning ustav kapitalidagi 2172 ta haq to‘lanadigan aksiyalar uchun to‘lov O‘zbekiston Respublikasi Markaziy banki tomonidan XTUning O‘zbekiston Respublikasi Markaziy bankidagi hisobvarag‘ida joylashtiriladigan hamda XTUning talabiga binoan belgilangan tartibda so‘ndiriladigan milliy valyutada ekvivalent qiymatda boshqaga o‘tkazilmaydigan veksel chiqarish yo‘li bilan amalga oshiriladi.

5. O‘zbekiston Respublikasi Markaziy banki obuna bo‘lish to‘g‘risidagi hujjat yuborilgandan so‘ng 31 kun mobaynida milliy valyutada 54300 AQSH dollariga ekvivalent qiymatdagi boshqaga o‘tkazilmaydigan foizsiz veksel chiqarib, uni XTUning O‘zbekiston Respublikasi Markaziy bankidagi qimmatli qog‘ozlar hisobvarag‘iga joylashtirsin.

6. O‘zbekiston Respublikasi Iqtisodiyot vazirligi Jahon banki guruhi bilan hamkorlik qilish doirasida vakolatli ishchi organ sifatida:

O‘zbekiston Respublikasi nomidan XTUning ustav kapitalidagi qo‘shimcha aksiyalarga obuna bo‘lish to‘g‘risidagi hujjatning XTUga o‘z vaqtida yo‘llanishini ta’minlasin;

boshqaga o‘tkazilmaydigan foizsiz veksel chiqarilib, XTUning O‘zbekiston Respublikasi Markaziy bankidagi qimmatli qog‘ozlar hisobvarag‘iga qo‘yilganligi to‘g‘risida XTUni xabardor qilsin.

7. Ushbu qarorning ijrosini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov zimmasiga yuklansin.