Zamonaviy energiya tejovchi texnologiyalarni joriy etish orqali ishlab chiqarish quvvatlarini yanada rivojlantirish hamda respublika isteʼmolchilari va aholini barqaror elektr energiyasi bilan taʼminlash maqsadida Vazirlar Mahkamasi qaror qiladi:

1. Osiyo taraqqiyot banki (keyingi oʻrinlarda — OTB) Direktorlar kengashi tomonidan 2014-yil 15-iyulda Oʻzbekiston Respublikasiga “Taxiatosh IESda 230-280 MVt quvvati ikkita bugʻ-gaz qurilmalarini qurish” investitsiya loyihasini amalga oshirish uchun 5 yil imtiyozli davr bilan 25 yil muddatda toʻladigan 300,0 mln AQSH dollari miqdorida qarz ajratilishi qoʻllab-quvvatlangani maʼlumot uchun qabul qilinsin.

2. Belgilansinki:

“Oʻzbekenergo” AJ OTB kreditidan maqsadli va samarali foydalanish, shuningdek, “Taxiatosh issiqlik elektr stansiyasida 230 — 280 MVt quvvatli ikkita bugʻ-gaz qurilmalarini qurish” loyihasini amalga oshirish uchun masʼul ijro etuvchi hisoblanadi;

OTB qarzini soʻndirish bilan bogʻliq xarajatlar, shuningdek, u boʻyicha foizlar, ustamalar, komissiyalar va boshqa xarajatlar toʻlovi “Oʻzbekenergo” AJning oʻz mablagʻlari hisobidan amalga oshiriladi.

3. Oʻzbekiston Respublikasi Moliya vaziriga Oʻzbekiston Respublikasi nomidan OTB bilan qarz kelishuvini, shuningdek, Oʻzbekiston Respublikasi “Oʻzbekenergo” AJ va OTB oʻrtasidagi qayta qarz bitimini imzolashga;

“Oʻzbekenergo” AJ boshqaruvi raisiga OTB bilan loyiha kelishuvini imzolashga vakolat berilsin.

4. Oʻzbekiston Respublikasi Adliya vazirligi oʻrnatilgan tartibda Oʻzbekiston Respublikasi bilan OTB oʻrtasida qarz kelishuvi va OTB kreditini Oʻzbekiston Respublikasi va “Oʻzbekenergo” AJ oʻrtasida qayta qarz berish kelishuvi boʻyicha huquqiy xulosa bersin.

5. “Oʻzbekenergo” AJ uch oy muddatda “Taxiatosh IESda 230 — 280 MVt quvvatli ikkita bugʻ-gaz qurilmalarini qurish” investitsiya loyihasining texnik-iqtisodiy asoslarini ishlab chiqsin va vakolatli ekspertiza organlari bilan kelishilgan holda Oʻzbekiston Respublikasi Vazirlar Mahkamasiga tasdiqlash uchun kiritsin.

6. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari Gʻ.I. Ibragimovga yuklatilsin.